[308] Sīlabbatenāpi vadanti suddhinti sīlenapi suddhiṁ visuddhiṁ
parisuddhiṁ muttiṁ vimuttiṁ parimuttiṁ vadanti kathenti bhaṇanti dīpayanti
voharanti vattenapi suddhiṁ visuddhiṁ parisuddhiṁ muttiṁ vimuttiṁ parimuttiṁ
vadanti kathenti bhaṇanti dīpayanti voharanti sīlabbatenapi suddhiṁ
visuddhiṁ parisuddhiṁ muttiṁ vimuttiṁ parimuttiṁ vadanti kathenti bhaṇanti
dīpayanti voharantīti sīlabbatenāpi vadanti suddhiṁ.

[309] Anekarūpena vadanti suddhinti anekavidhavattakutūhalamaṅgalena
suddhiṁ visuddhiṁ parisuddhiṁ muttiṁ vimuttiṁ parimuttiṁ vadanti kathenti
bhaṇanti dīpayanti voharantīti anekarūpena vadanti suddhiṁ.

[310] Te ce munī brūsi anoghatiṇṇeti te ceti diṭṭhigatike.
Munīti monaṁ vuccati ñāṇaṁ .pe. Saṅgajālamaticca so
Muni. Brūsi anoghatiṇṇeti kāmoghaṁ bhavoghaṁ diṭṭhoghaṁ avijjoghaṁ
atiṇṇe anuttiṇṇe 1 anittiṇṇe 2 anatikkante asamatikkante
avītivatte antojātijarāmaraṇe parivattante antosaṁsārapathe
parivattante jātiyā anugate jarāya anusaṭe byādhinā abhibhūte
maraṇena abbhāhate atāṇe aleṇe asaraṇe asaraṇībhūte. Brūsīti
brūsi ācikkhasi desesi paññapesi paṭṭhapesi vivarasi vibhajasi
uttānīkarosi pakāsesīti te ce munī brūsi anoghatiṇṇe.

[311] Atha ko carahi devamanussaloke atāri jātiñca
jarañca mārisāti atha ko eso sadevake loke samārake sabrahmake
sassamaṇabrāhmaṇiyā pajāya sadevamanussāya jātijarāmaraṇaṁ atāri
uttāri patari samatikkami vītivattayi. Mārisāti piyavacanaṁ garuvacanaṁ
sagāravasappatissādhivacanametaṁ mārisāti atha ko carahi devamanussaloke
atāri jātiñca jarañca mārisa.

[312] Pucchāmi taṁ bhagavā brūhi me tanti pucchāmi tanti
pucchāmi taṁ yācāmi taṁ ajjhesāmi taṁ pasādemi taṁ kathayassu
meti pucchāmi taṁ. Bhagavāti gāravādhivacanametaṁ .pe. Sacchikā
paññatti yadidaṁ bhagavāti. Brūhi me tanti brūhi ācikkhāhi
desehi paññapehi paṭṭhapehi vivarāhi vibhajāhi uttānīkarohi
pakāsehīti pucchāmi taṁ bhagavā brūhi me taṁ. Tenāha so brāhmaṇo
yekecime samaṇabrāhmaṇā se (iccāyasmā nando)
1-2 Ma. ime dve pāṭhā natthi.
Diṭṭhasutenāpi vadanti suddhiṁ
sīlabbatenāpi vadanti suddhiṁ
anekarūpena vadanti suddhiṁ
te ce munī brūsi anoghatiṇṇe
atha ko carahi devamanussaloke
atāri jātiñca jarañca mārisa
pucchāmi taṁ bhagavā brūhi me tanti.

[313] Nāhaṁ sabbe samaṇabrāhmaṇā se (nandāti bhagavā)
jātijarāya nivutāti brūmi
yesīdha diṭṭhaṁva sutaṁ mutaṁ vā
sīlabbataṁ vāpi pahāya sabbaṁ
anekarūpampi pahāya sabbaṁ
taṇhaṁ pariññāya anāsavā ye 1
te ve narā oghatiṇṇāti brūmi.

[314] Nāhaṁ sabbe samaṇabrāhmaṇā se (nandāti bhagavā)
jātijarāya nivutāti brūmīti nāhaṁ nanda sabbe samaṇabrāhmaṇā
jātijarāya āvutā nivutā ophuṭā 2 pihitā paṭicchannā paṭikujjitāti
vadāmi atthi te samaṇabrāhmaṇā yesaṁ jāti ca jarāmaraṇañca
pahīnā ucchinnamūlā tālāvatthukatā anabhāvaṅgatā āyatiṁ
anuppādadhammāti brūmi ācikkhāmi desemi paññapemi paṭṭhapemi
1 Ma. anāsavā se. evamuparipi. 2 Ma. ovuṭā. evamuparipi.
Vivarāmi vibhajāmi uttānīkaromīti nāhaṁ sabbe samaṇabrāhmaṇā se
(nandāti bhagavā) jātijarāya nivutāti brūmi.

[315] Yesīdha diṭṭhaṁva sutaṁ mutaṁ vā sīlabbataṁ vāpi pahāya
sabbanti ye sabbā diṭṭhasuddhiyo pahāya [1]- pajahitvā vinodetvā
byantīkaritvā anabhāvaṅgametvā ye sabbā sutasuddhiyo ye
sabbā diṭṭhasutasuddhiyo ye sabbā mutasuddhiyo ye sabbā
sīlasuddhiyo ye sabbā vattasuddhiyo ye sabbā sīlabbattasuddhiyo
pahāya pajahitvā vinodetvā byantīkaritvā anabhāvaṅgametvāti
yesīdha diṭṭhaṁva sutaṁ mutaṁ vā sīlabbataṁ vāpi pahāya sabbaṁ.

[316] Anekarūpampi pahāya sabbanti anekavidhavattakutūhalamaṅgalena
suddhiṁ visuddhiṁ parisuddhiṁ muttiṁ vimuttiṁ parimuttiṁ pahāya
pajahitvā vinodetvā byantīkaritvā anabhāvaṅgametvāti anekarūpampi
pahāya sabbaṁ.

[317] Taṇhaṁ pariññāya anāsavā ye te ve narā oghatiṇṇāti
brūmīti taṇhanti rūpataṇhā saddataṇhā gandhataṇhā
rasataṇhā phoṭṭhabbataṇhā dhammataṇhā. Pariññāyāti taṇhaṁ
tīhi pariññāhi parijānitvā ñātapariññāya tīraṇapariññāya
pahānapariññāya.
Katamā ñātapariññā. Taṇhaṁ pajānāti 2 ayaṁ rūpataṇhā ayaṁ
saddataṇhā ayaṁ gandhataṇhā ayaṁ rasataṇhā ayaṁ phoṭṭhabbataṇhā
1 Ma. jahitvā. evamuparipi. 2 Ma. jānāti.
Ayaṁ dhammataṇhāti pajānāti passati ayaṁ ñātapariññā.
Katamā tīraṇapariññā. Evaṁ ñātaṁ katvā taṇhaṁ tīreti
aniccato dukkhato rogato gaṇḍato .pe. Anissaraṇato tīreti
ayaṁ tīraṇapariññā.
Katamā pahānapariññā. Evaṁ tīretvā taṇhaṁ pajahati
vinodeti byantīkaroti anabhāvaṅgameti. Vuttaṁ hetaṁ bhagavatā yo
bhikkhave taṇhāya chandarāgo taṁ pajahatha evaṁ sā taṇhā pahīnā
bhavissati ucchinnamūlā tālāvatthukatā anabhāvaṅgatā āyatiṁ
anuppādadhammāti. Ayaṁ pahānapariññā. Taṇhaṁ imāhi tīhi
pariññāhi parijānitvāti taṇhaṁ pariññāya.
Anāsavāti cattāro āsavā kāmāsavo bhavāsavo diṭṭhāsavo
avijjāsavo yesaṁ ime āsavā pahīnā ucchinnamūlā tālāvatthukatā
anabhāvaṅgatā āyatiṁ anuppādadhammā te vuccanti anāsavā.
Yeti 1 arahanto khīṇāsavā.
Taṇhaṁ pariññāya anāsavā ye te ve narā oghatiṇṇāti
brūmīti ye taṇhaṁ pariññāya anāsavā te kāmoghaṁ tiṇṇā
bhavoghaṁ tiṇṇā diṭṭhoghaṁ tiṇṇā avijjoghaṁ tiṇṇā sabbaṁ
saṁsārapathaṁ tiṇṇā uttiṇṇā nittiṇṇā 2 atikkantā samatikkantā
vītivattāti brūmi ācikkhāmi desemi paññapemi paṭṭhapemi
vivarāmi vibhajāmi uttānīkaromi pakāsemīti taṇhaṁ pariññāya
1 Ma. ayaṁ pāṭho natthi. 2 Ma. nitthiṇṇā. evamuparipi.
Anāsavā ye te ve narā oghatiṇṇāti brūmi. Tenāha bhagavā
nāhaṁ sabbe samaṇabrāhmaṇā se (nandāti bhagavā)
jātijarāya nivutāti brūmi
yesīdha diṭṭhaṁva sutaṁ mutaṁ vā
sīlabbataṁ vāpi pahāya sabbaṁ
anekarūpampi pahāya sabbaṁ
taṇhaṁ pariññāya anāsavā ye
te ve narā oghatiṇṇāti brūmīti.