[258] Sabbesu kāmesu yo vītarāgoti sabbesūti sabbena
sabbaṁ sabbathā sabbaṁ asesaṁ nissesaṁ pariyādāyavacanametaṁ sabbesūti.
Kāmesūti uddānato dve kāmā vatthukāmā ca kilesakāmā ca
.pe. Ime vuccanti vatthukāmā .pe. Ime vuccanti
kilesakāmā. Sabbesu kāmesu yo vītarāgoti sabbesu kāmesu yo
vītarāgo cattarāgo vantarāgo muttarāgo pahīnarāgo paṭinissaṭṭharāgo
vikkhambhitarāgoti sabbesu kāmesu yo vītarāgo. Upasīvāti
bhagavāti upasīvāti bhagavā taṁ brāhmaṇaṁ nāmena ālapati.
Bhagavāti gāravādhivacanametaṁ .pe. Sacchikā paññatti yadidaṁ bhagavāti
upasīvāti bhagavā.

[259] Ākiñcaññaṁ nissito hitvamaññanti heṭṭhimā cha
samāpattiyo hitvā vajjetvā pariccajitvā atikkamitvā samatikkamitvā
vītivattitvā ākiñcaññāyatanasamāpattiṁ nissito allīno
upāgato samupāgato ajjhosito adhimuttoti ākiñcaññaṁ
nissito hitvamaññaṁ.

[260] Saññāvimokkhe paramedhimuttoti saññāvimokkhā vuccanti
Satta saññāsamāpattiyo. Tāsaṁ saññāsamāpattīnaṁ ākiñcaññāyatanasamāpatti
vimokkhā aggā ca seṭṭhā ca viseṭṭhā ca
pāmokkhā ca uttamā ca pavarā ca. Parame agge seṭṭhe
viseṭṭhe pāmokkhe uttame pavare adhimuttivimokkhena adhimutto
tatrādhimutto tadadhimutto taccarito tabbahulo taggaruko tanninno
tappoṇo tappabbhāro tadādhipateyyoti saññāvimokkhe
paramedhimutto.

[261] Tiṭṭheyya so tattha anānuyāyīti tiṭṭheyyāti tiṭṭheyya
saṭṭhīkappasahassāni. Tatthāti ākiñcaññāyatane. Anānuyāyīti
anānuyāyī avedhamāno avigacchamāno anantaradhāyamāno aparihiyamāno.
Athavā arajjamāno adussamāno amuyhamāno akiliyamānoti
tiṭṭheyya so tattha anānuyāyī. Tenāha bhagavā
sabbesu kāmesu yo vītarāgo (upasīvāti bhagavā)
ākiñcaññaṁ nissito hitvamaññaṁ
saññāvimokkhe paramedhimutto
tiṭṭheyya so tattha anānuyāyīti.

[262] Tiṭṭhe ce so tattha anānuyāyī
pūgampi vassānaṁ 1 samantacakkhu
tattheva so sītisiyā vimutto
1 vassānītipi pāṭho.
Bhavetha 1 viññāṇaṁ tathāvidhassa.

[263] Tiṭṭhe ce so tattha anānuyāyīti tiṭṭhe ce soti sace
so tiṭṭheyya saṭṭhīkappasahassāni. Tatthāti ākiñcaññāyatane.
Anānuyāyīti anānuyāyī avedhamāno avigacchamāno anantaradhāyamāno
aparihiyamāno athavā arajjamāno adussamāno amuyhamāno
akiliyamānoti tiṭṭhe ce so tattha anānuyāyī.

[264] Pūgampi vassānaṁ samantacakkhūti pūgampi vassānanti
pūgampi vassānaṁ bahunnaṁ vassānaṁ 2 bahunnaṁ vassasatānaṁ bahunnaṁ vassasahassānaṁ
bahunnaṁ vassasatasahassānaṁ bahunnaṁ kappasatānaṁ bahunnaṁ
kappasahassānaṁ bahunnaṁ kappasatasahassānaṁ. Samantacakkhūti samantacakkhu
vuccati sabbaññutañāṇaṁ .pe. Tathāgato tena samantacakkhūti
pūgampi vassānaṁ samantacakkhu.

[265] Tattheva so sītisiyā vimutto bhavetha viññāṇaṁ
tathāvidhassāti tattheva so sītibhāvamanuppatto dhuvo sassato avipariṇāmadhammo
sassatisamaṁ tattheva tiṭṭheyya. Athavā tassa
viññāṇaṁ caveyya ucchijjeyya [3]- vinasseyya na bhaveyya 4 na
paṭisandhiviññāṇaṁ nibbatteyya kāmadhātuyā vā rūpadhātuyā vā arūpadhātuyā
vāti ākiñcaññāyatane 5 uppannassa sassatañca ucchedañca
pucchati udāhu tattheva anupādisesāya nibbānadhātuyā
1 cavethātipi pāṭho. 2 Ma. vassāni bahūni vassāni .... evamīdisesu padesu.
3 Ma. nasseyya. 4 Ma. bhaveyyāti. 5 Ma. akiñcaññāyatanaṁ. evamuparipi.
Parinibbāyeyya. Athavā tassa viññāṇaṁ caveyya puna
paṭisandhiviññāṇaṁ nibbatteyya kāmadhātuyā vā rūpadhātuyā vā
arūpadhātuyā vāti ākiñcaññāyatane uppannassa parinibbānañca
paṭisandhiñca pucchati. Tathāvidhassāti tathāvidhassa tādisassa
tassaṇṭhitassa tappakārassa tappaṭibhāgassa ākiñcaññāyatane
uppannassāti tattheva so sītisiyā vimutto bhavetha
viññāṇaṁ tathāvidhassa. Tenāha so brāhmaṇo
tiṭṭhe ce so tattha anānuyāyī
pūgampi vassānaṁ samantacakkhu
tattheva so sītisiyā vimutto
bhavetha viññāṇaṁ tathāvidhassāti.

[266] Acci yathā vātavegena khittaṁ 1 (upasīvāti bhagavā)
atthaṁ paleti na upeti saṅkhaṁ
evaṁ muni nāmakāyā vimutto
atthaṁ paleti na upeti saṅkhaṁ.

[267] Acci yathā vātavegena khittanti acci vuccati jālasikhā.
Vātāti puratthimā vātā pacchimā vātā uttarā vātā
dakkhiṇā vātā sarajā vātā aparajā 2 vātā sītā vātā uṇhā
vātā adhimattā vātā verambhavātā pakkhavātā supaṇṇavātā
tālapaṇṇavātā vidhūpanavātā. Vātavegena khittanti vātavegena
1 Ma. khittā. evamuparipi. 2 Ma. arajā. evamīdisesu ṭhānesu.
Khittaṁ ukkhittaṁ nunnaṁ panunnaṁ khambhitaṁ vikkhambhitanti 1 acci yathā
vātavegena khittaṁ. Upasīvāti bhagavāti upasīvāti bhagavā taṁ
brāhmaṇaṁ nāmena ālapati. Bhagavāti gāravādhivacanametaṁ .pe.
Sacchikā paññatti yadidaṁ bhagavāti upasīvāti bhagavā.