[208] Tenahātappaṁ karohi (dhotakāti bhagavā)
idheva nipako sato
ito sutvāna nigghosaṁ
sikkhe nibbānamattano.

[209] Tenahātappaṁ karohīti ātappaṁ karohi ussāhaṁ karohi
ussoḷhiṁ karohi vāyāmaṁ karohi dhitiṁ karohi viriyaṁ karohi chandaṁ
janehi sañjanehi upaṭṭhapehi 1 nibbattehi abhinibbattehīti tenahātappaṁ
karohi. Dhotakāti bhagavāti 2 dhotakāti bhagavā taṁ brāhmaṇaṁ
nāmena ālapati. Bhagavāti gāravādhivacanametaṁ .pe. Sacchikā
paññatti yadidaṁ bhagavāti dhotakāti bhagavā.

[210] Idheva nipako satoti idhāti imissā diṭṭhiyā
imissā khantiyā imissā ruciyā imasmiṁ ādāye imasmiṁ dhamme
imasmiṁ vinaye imasmiṁ dhammavinaye imasmiṁ pāvacane imasmiṁ brahmacariye
imasmiṁ satthusāsane imasmiṁ attabhāve imasmiṁ manussaloke.
Nipakoti nipako paṇḍito paññavā buddhimā ñāṇī vībhāvī medhāvī.
1 Ma. samuṭṭhapehi. 2 Ma. ayaṁ pāṭho natthi.
Satoti catūhi kāraṇehi sato kāye kāyānupassanāsatipaṭṭhānaṁ
bhāvento sato .pe. So vuccati satoti idheva nipako sato.

[211] Ito sutvāna nigghosanti ito mayhaṁ vacanaṁ byapathaṁ
desanaṁ anusandhiṁ sutvāna suṇitvā 1 uggahitvā upadhārayitvā
upalakkhayitvāti ito sutvāna nigghosaṁ.

[212] Sikkhe nibbānamattanoti sikkheti tisso sikkhā adhisīlasikkhā
adhicittasikkhā adhipaññāsikkhā .pe. Ayaṁ adhipaññāsikkhā.
Nibbānamattanoti rāgassa nibbāpanāya dosassa nibbāpanāya mohassa
nibbāpanāya kodhassa nibbāpanāya upanāhassa nibbāpanāya .pe.
Sabbākusalābhisaṅkhārānaṁ samāya upasamāya vūpasamāya nibbāpanāya
paṭinissaggāya paṭippassaddhiyā adhisīlampi sikkheyya adhicittampi
sikkheyya adhipaññampi sikkheyya imā tisso sikkhā āvajjento
sikkheyya jānanto sikkheyya .pe. Sacchikātabbaṁ sacchikaronto
sikkheyya samādāya careyya samādāya vatteyyāti sikkhe
nibbānamattano. Tenāha bhagavā
tenahātappaṁ karohi (dhotakāti bhagavā)
idheva nipako sato
ito sutvāna nigghosaṁ
sikkhe nibbānamattanoti.

[213] Passāmahaṁ deva manussaloke
1 Ma. sutvā suṇitvā.
Akiñcanaṁ brāhmaṇaṁ iriyamānaṁ
tantaṁ namassāmi samantacakkhu
pamuñca maṁ sakka kathaṅkathāhi.

[214] Passāmahaṁ deva manussaloketi devāti tayo devā
sammatidevā 1 ca 2 upapattidevā ca 2 visuddhidevā ca 2 . Katame
sammatidevā. Sammatidevā vuccanti rājāno ca rājakumārā ca deviyo
ca. [3]- Katame upapattidevā. Upapattidevā vuccanti cātummahārājikā
devā tāvatiṁsā devā yāmā devā tusitā devā nimmānaratī
devā paranimmitavasavattī devā brahmakāyikā devā ye ca
devā tatrupari 4 . [5]- Katame visuddhidevā. Visuddhidevā vuccanti
tathāgatasāvakā arahanto khīṇāsavā ye ca paccekasambuddhā. [6]-
Bhagavā sammatidevānañca upapattidevānañca visuddhidevānañca devo
ca atidevo ca devātidevo ca sīhasīho nāganāgo gaṇigaṇī munimunī
rājarājā. Passāmahaṁ deva manussaloketi manussaloke devaṁ
passāmi atidevaṁ passāmi devātidevaṁ passāmi dakkhāmi olokemi
nijjhāyāmi upaparikkhāmīti passāmahaṁ deva manussaloke.

[215] Akiñcanaṁ brāhmaṇaṁ iriyamānanti akiñcananti
rāgakiñcanaṁ dosakiñcanaṁ mohakiñcanaṁ mānakiñcanaṁ diṭṭhikiñcanaṁ kilesakiñcanaṁ
duccaritakiñcanaṁ te kiñcanā buddhassa bhagavato pahīnā
ucchinnamūlā tālāvatthukatā anabhāvaṅgatā āyatiṁanuppādadhammā
1 Ma. sammutidevā. evamuparipi. 2 Ma. ca saddo natthi. 3 Ma. ime vuccanti
sammutidevā. 4 Ma. taduttari. 5 Ma. ime vaccanti upapattidevā. 6 Ma.
ime vuccanti visuddhidevā.
Tasmā buddho akiñcano. Brāhmaṇanti bhagavā sattannaṁ dhammānaṁ
bāhitattā brāhmaṇo sakkāyadiṭṭhi bāhitā hoti vicikicchā
bāhitā hoti sīlabbataparāmāso bāhito hoti rāgo bāhito
hoti doso bāhito hoti moho bāhito hoti māno bāhito
hoti bāhitassa honti pāpakā akusalā dhammā saṅkilesikā
ponobbhavikā sadarā dukkhavipākā āyatiṁjātijarāmaraṇīyā.
Bāhetvā sabbapāpakāni (sabhiyāti bhagavā)
bhagavā vimalo sādhusamāhito ṭhitatto
saṁsāramaticca kevalī so
anissito tādi pavuccate brahmā 1 .
Iriyamānanti carantaṁ vicarantaṁ 2 iriyantaṁ vattentaṁ pālentaṁ yapentaṁ
yāpentanti akiñcanaṁ brāhmaṇaṁ iriyamānaṁ.

[216] Tantaṁ namassāmi samantacakkhūti tanti bhagavantaṁ bhaṇati.
Namassāmīti kāyena vā namassāmi vācāya vā namassāmi cittena
vā namassāmi anvatthapaṭipattiyā vā namassāmi dhammānudhammapaṭipattiyā
vā namassāmi sakkaromi garukaromi mānemi pūjemi.
Samantacakkhūti samantacakkhu vuccati sabbaññutañāṇaṁ. Bhagavā tena 3
sabbaññutañāṇena upeto samupeto upāgato samupāgato
upapanno samupapanno samannāgato.
Na tassa adiṭṭhamidhatthi kiñci
1 Ma. sa brahmāti. evamuparipi. 2 Ma. viharantaṁ. 3 Ma. ayaṁ pāṭho natthi.
Atho aviññātamajānitabbaṁ
sabbaṁ abhiññāsi yadatthi neyyaṁ
tathāgato tena samantacakkhūti.
Tantaṁ namassāmi samantacakkhu.

[217] Pamuñca maṁ sakka kathaṅkathāhīti sakkāti [1]- bhagavā
sakyakulā pabbajitotipi sakko. Athavā addho mahaddhano dhanavātipi
sakko. Tassimāni dhanāni seyyathīdaṁ saddhādhanaṁ sīladhanaṁ hiridhanaṁ
ottappadhanaṁ sutadhanaṁ cāgadhanaṁ paññādhanaṁ satipaṭṭhānadhanaṁ sammappadhānadhanaṁ
iddhipādadhanaṁ indriyadhanaṁ baladhanaṁ bojjhaṅgadhanaṁ maggadhanaṁ
phaladhanaṁ nibbānadhanaṁ. Imehi anekavidhehi dhanaratanehi addho mahaddhano
dhanavātipi sakko. Athavā sakko pahu visavī alamatto sūro
vīro vikkanto abhiru 2 acchambhī anutrāsī apalāyī pahīnabhayabheravo
vigatalomahaṁsotipi sakko. Kathaṅkathā vuccati vicikicchā dukkhe
kaṅkhā dukkhasamudaye kaṅkhā dukkhanirodhe kaṅkhā dukkhanirodhagāminiyā
paṭipadāya kaṅkhā pubbante kaṅkhā aparante kaṅkhā pubbantāparante
kaṅkhā idappaccayatāpaṭiccasamuppannesu dhammesu kaṅkhā
yā evarūpā kaṅkhā kaṅkhāyanā kaṅkhāyitattaṁ vimati vicikicchā dveḷhakaṁ
dvedhāpatho saṁsayo anekaṁsaggāho āsappanā parisappanā
apariyogāhanā chambhitattaṁ cittassa manovilekho. Pamuñca maṁ sakka
kathaṅkathāhīti muñca maṁ mocehi maṁ pamocehi maṁ uddhara maṁ samuddhara
1 Ma. sakko. 2 Ma. abhīrū. evamuparipi.
Maṁ vuṭṭhāpehi maṁ kathaṅkathāsallatoti pamuñca maṁ sakka kathaṅkathāhi.
Tenāha so brāhmaṇo
passāmahaṁ deva manussaloke
akiñcanaṁ brāhmaṇaṁ iriyamānaṁ
tantaṁ namassāmi samantacakkhu
pamuñca maṁ sakka kathaṅkathāhīti.