[78] Sotānaṁ saṁvaraṁ brūmīti sotānaṁ āvaraṇaṁ nīvaraṇaṁ
saṁvaraṇaṁ rakkhanaṁ gopanaṁ brūmi ācikkhāmi desemi paññapemi paṭṭhapemi
vivarāmi vibhajāmi uttānīkaromi pakāsemīti sotānaṁ saṁvaraṁ brūmi.

[79] Paññāyete pithiyyareti paññāti yā paññā
pajānanā .pe. Amoho dhammavicayo sammādiṭṭhi. Paññāyete
pithiyyareti paññāya ete sotā pithiyyanti pacchijjanti na savanti
na āsavanti na sandanti nappavattanti. Sabbe saṅkhārā aniccāti
jānato passato paññāya ete sotā pithiyyanti pacchijjanti
1 Ma. pakittitāni. 2 Ma. satibalaṁ sammāsati.
Na savanti na āsavanti na sandanti nappavattanti. Sabbe saṅkhārā
dukkhāti jānato passato paññāya ete sotā pithiyyanti
pacchijjanti na savanti na āsavanti na sandanti nappavattanti.
Sabbe dhammā anattāti jānato passato paññāya ete sotā
pithiyyanti pacchijjanti na savanti na āsavanti na sandanti
nappavattanti. Avijjāpaccayā saṅkhārāti jānato passato paññāya
ete sotā pithiyyanti pacchijjanti na savanti na āsavanti na
sandanti nappavattanti. Saṅkhārapaccayā viññāṇanti viññāṇapaccayā
nāmarūpanti nāmarūpaccayā saḷāyatananti saḷāyatanapaccayā
phassoti phassapaccayā vedanāti vedanāpaccayā taṇhāti
taṇhāpaccayā upādānanti upādānapaccayā bhavoti bhavapaccayā
jātīti jātipaccayā jarāmaraṇanti jānato passato paññāya
ete sotā pithiyyanti pacchijjanti na savanti na āsavanti na
sandanti nappavattanti. Avijjānirodhā saṅkhāranirodhoti saṅkhāranirodhā
viññāṇanirodhoti viññāṇanirodhā nāmarūpanirodhoti
nāmarūpanirodhā saḷāyatananirodhoti saḷāyatananirodhā phassanirodhoti
phassanirodhā vedanānirodhoti vedanānirodhā taṇhānirodhoti taṇhānirodhā
upādānanirodhoti upādānanirodhā bhavanirodhoti bhavanirodhā
jātinirodhoti jātinirodhā jarāmaraṇanirodhoti jānato passato
paññāya ete sotā pithiyyanti pacchijjanti na savanti na
Āsavanti na sandanti nappavattanti. Idaṁ dukkhanti ayaṁ
dukkhasamudayoti ayaṁ dukkhanirodhoti ayaṁ dukkhanirodhagāminī
paṭipadāti jānato passato paññāya ete sotā pithiyyanti
pacchijjanti na savanti na āsavanti na sandanti nappavattanti.
Ime [1]- āsavāti ayaṁ āsavasamudayoti ayaṁ āsavanirodhoti ayaṁ
āsavanirodhagāminī paṭipadāti jānato passato paññāya ete
sotā pithiyyanti pacchijjanti na savanti na āsavanti na sandanti
nappavattanti. Ime dhammā abhiñañeyyāti ime dhammā
pariññeyyāti ime dhammā pahātabbāti ime dhammā bhāvetabbāti
ime dhammā sacchikātabbāti jānato passato paññāya
ete sotā pithiyyanti pacchijjanti na savanti na āsavanti na
sandanti nappavattanti. Channaṁ phassāyatanānaṁ samudayañca atthaṅgamañca
assādañca ādīnavañca nissaraṇañca jānato passato
paññāya ete sotā pithiyyanti pacchijjanti na savanti na
āsavanti na sandanti nappavattanti. Pañcannaṁ upādānakkhandhānaṁ
samudayañca atthaṅgamañca assādañca ādīnavañca nissaraṇañca
jānato passato catunnaṁ mahābhūtānaṁ samudayañca atthaṅgamañca
assādañca ādīnavañca nissaraṇañca jānato passato yaṅkiñci
samudayadhammaṁ sabbantaṁ nirodhadhammanti jānato passato paññāya
ete sotā pithiyyanti pacchijjanti na savanti na āsavanti na
1 Ma. dhammā.
Sandanti nappavattantīti paññāya ete sotā pithiyyare.
Tenāha bhagavā
yāni sotāni lokasmiṁ (ajitāti bhagavā)
sati tesaṁ nivāraṇaṁ
sotānaṁ saṁvaraṁ brūmi
paññāyete pithiyyareti.

[80] Paññā ceva sati cāpi (iccāyasmā ajito)
nāmarūpañca mārisa
etamme puṭṭho pabrūhi
katthetaṁ uparujjhati.

[81] Paññā ceva sati cāpīti paññāti yā paññā
pajānanā vicayo pavicayo [1]- sallakkhaṇā upalakkhaṇā paccupalakkhaṇā
paṇḍiccaṁ kosallaṁ nepuññaṁ vebhabyā cintā upaparikkhā bhūrī medhā
pariṇāyikā vipassanā sampajaññaṁ patodo paññā paññindriyaṁ
paññābalaṁ paññāsatthaṁ paññāpāsādo paññāāloko paññāobhāso
paññāpajjoto paññāratanaṁ amoho dhammavicayo sammādiṭṭhi.
Satīti yā sati anussati .pe. Sammāsatīti paññā
ceva sati cāpi iccāyasmā ajito.

[82] Nāmarūpañca mārisāti nāmanti cattāro arūpino
khandhā. Rūpanti cattāro ca mahābhūtā catunnañca mahābhūtānaṁ
1 Ma. dhammavicayo.
Upādāyarūpaṁ. Mārisāti piyavacanaṁ garuvacanaṁ sagāravasappatissādhivacanametaṁ
mārisāti nāmarūpañca mārisa.

[83] Etamme puṭṭho pabrūhīti etammeti yaṁ pucchāmi yaṁ
yācāmi yaṁ ajjhesāmi yaṁ pasādemi. Puṭṭhoti pucchito yācito
ajjhesito pasādito. Pabrūhīti brūhi ācikkhāhi desehi
paññapehi paṭṭhapehi vivarāhi vibhajāhi uttānīkarohi pakāsehīti
etamme puṭṭho pabrūhi.

[84] Katthetaṁ uparujjhatīti katthetaṁ nirujjhati vūpasammati atthaṁ
gacchati paṭippassambhatīti katthetaṁ uparujjhati. Tenāha so
brāhmaṇo
paññā ceva sati cāpi (iccāyasmā ajito)
nāmarūpañca mārisa
etamme puṭṭho pabrūhi
katthetaṁ uparujjhatīti.

[85] Yametaṁ pañhaṁ apucchi ajita taṁ vadāmi te
yattha nāmañca rūpañca asesaṁ uparujjhati
viññāṇassa nirodhena etthetaṁ uparujjhati.

[86] Yametaṁ pañhaṁ apucchīti yametanti paññañca satiñca
nāmarūpañca. Apucchīti āpucchasi āyācasi ajjhesasi pasādesīti
yametaṁ pañhaṁ apucchi.

[87] Ajita taṁ vadāmi teti ajitāti bhagavā taṁ brāhmaṇaṁ
nāmena ālapati. Tanti paññañca satiñca nāmarūpañca.
Vadāmīti taṁ vadāmi ācikkhāmi desemi paññapemi paṭṭhapemi vivarāmi
vibhajāmi uttānīkaromi pakāsemīti ajita taṁ vadāmi te.