[876] Khemaṁ passati sabbadhīti bhayakaro rāgo bhayakaro doso
bhayakaro moho .pe. Bhayakarā kilesā. Bhayakarassa rāgassa
pahīnattā .pe. Bhayakarānaṁ kilesānaṁ pahīnattā sabbattha khemaṁ
passati sabbattha abhayaṁ passati sabbattha anītikaṁ passati
1 Yu. vihareyyāti.
Sabbattha anupaddavaṁ passati sabbattha anupasaggaṁ passati sabbattha
passaddhaṁ 1 passatīti khemaṁ passati sabbadhi. Tenāha bhagavā
anejassa vijānato natthi kāci nisaṅkhiti
virato so viyārambhā khemaṁ passati sabbadhīti.

[877] Na samesu na omesu na ussesu vadate muni
santo so vītamaccharo nādeti na nirassatīti (bhagavā).

[878] Na samesu na omesu na ussesu vadate munīti [2]- monaṁ
vuccati ñāṇaṁ yā paññā pajānanā .pe. Saṅgajālamaticca
so munīti. Muni seyyohamasmīti vā sadisohamasmīti vā
hīnohamasmīti vā na vadati na katheti na bhaṇati na dīpayati na
voharatīti na samesu na omesu na ussesu vadate muni.

[879] Santo so vītamaccharoti santoti rāgassa santattā 3
santo dosassa mohassa .pe. Sabbākusalābhisaṅkhārānaṁ santattā
samitattā vūpasamitattā vijjhātattā nibbutattā vigatattā paṭippassaddhattā
santo upasanto vūpasanto nibbuto paṭippassaddhoti
santo so. Vītamaccharoti pañca macchariyāni āvāsamacchariyaṁ .pe.
Gāho idaṁ vuccati macchariyaṁ. Yassetaṁ macchariyaṁ pahīnaṁ samucchinnaṁ
vūpasantaṁ paṭippassaddhaṁ abhabbuppattikaṁ ñāṇagginā daḍḍhaṁ so
vuccati vītamaccharo vigatamaccharo cattamaccharo vantamaccharo muttamaccharo
pahīnamaccharo paṭinissaṭṭhamaccharoti santo so vītamaccharo.
1 Ma. anupasaṭṭhattaṁ. 2 Ma. munīti. 3 Po. Ma. samitattā.

[880] Nādeti na nirassatīti bhagavāti nādetīti rūpaṁ nādeti 1
nādiyati na upādiyati na gaṇhāti na parāmasati nābhinivisati
vedanaṁ saññaṁ saṅkhāre viññāṇaṁ gatiṁ upapattiṁ paṭisandhiṁ
bhavaṁ saṁsāraṁ vaṭṭaṁ nādeti 2 nādiyati na upādiyati na gaṇhāti
na parāmasati nābhinivisatīti nādeti. Na nirassatīti rūpaṁ na
pajahati na vinodeti na byantīkaroti na anabhāvaṅgameti vedanaṁ
saññaṁ saṅkhāre viññāṇaṁ gatiṁ upapattiṁ paṭisandhiṁ bhavaṁ
saṁsāraṁ vaṭṭaṁ na pajahati na vinodeti na byantīkaroti na
anabhāvaṅgametīti na nirassati. Bhagavāti gāravādhivacanaṁ .pe.
Sacchikā paññatti yadidaṁ bhagavāti. Tenāha bhagavā
na samesu na omesu na ussesu vadate muni
santo so vītamaccharo nādeti na nirassatīti (bhagavā).
Paṇṇarasamo attadaṇḍasuttaniddeso niṭṭhito.
--------------------
1-2 Ma. ayaṁ pāṭho natthi.
Soḷasamo sārīputtasuttaniddeso 1

[881] Na me diṭṭho ito pubbe (iccāyasmā sārīputto)
na suto uda kassaci
evaṁ vagguvado 2 satthā
tusitā gaṇimāgato.

[882] Na me diṭṭho ito pubbeti ito pubbe 3 na mayā
diṭṭhapubbo so bhagavā iminā cakkhunā iminā attabhāvena.
Yadā bhagavā tāvatiṁsabhavane pāricchattakamūle paṇḍukambalasilāyaṁ vassaṁ
vuṭṭho devagaṇaparivuto majjhe maṇimayena sopāṇena saṅkassanagaraṁ
otiṇṇo imaṁ dassanaṁ pubbe na diṭṭhoti na me diṭṭho ito
pubbe.

[883] Iccāyasmā sārīputtoti iccāti padasandhi
padasaṁsaggo padapāripūri akkharasamavāyo byañjanasiliṭṭhatā
padānupubbatāmetaṁ iccāti. Āyasmāti piyavacanaṁ garuvacanaṁ
sagāravasappatissavacanametaṁ āyasmāti. Sārīputtoti tassa therassa
nāmaṁ saṅkhā samaññā paññatti vohāro nāmaṁ nāmakammaṁ
nāmadheyyaṁ nirutti byañjanaṁ abhilāpoti iccāyasmā sārīputto.

[884] Na suto uda kassacīti nāti paṭikkhepo. Udāti
1 Ma. atha sārīputtasuttaniddesaṁ vakkhati. 2 Sī. vaggugado.
3 Ma. ... me mayā na diṭṭhapubbo.
Padasandhi padasaṁsaggo padapāripūri akkharasamavāyo byañjanasiliṭṭhatā
padānupubbatāmetaṁ udāti. Kassacīti kassaci khattiyassa vā
brāhmaṇassa vā vessassa vā suddassa vā gahaṭṭhassa vā
pabbajitassa vā devassa vā manussassa vāti na suto uda kassaci.

[885] Evaṁ vagguvado satthāti evaṁ vagguvado madhuravado
pemanīyavado hadayaṅgamavado karavikarudamañjussaro 1 . Aṭṭhaṅgasamannāgato
kho pana tassa bhagavato mukhato ghoso niccharati vissattho
ca suviññeyyo 2 ca mañju ca savanīyo ca bindu ca avisārī ca
gambhīro ca ninnādi ca. Yadā 3 parisaṁ kho pana so bhagavā
sarena viññāpeti na tassa bahiddhā parisāya ghoso niccharati.
Brahmassaro kho pana so bhagavā karavikabhāṇīti evaṁ vagguvado.
Satthāti bhagavā satthavāho. Yathā satthavāho satthe kantāraṁ
tāreti corakantāraṁ tāreti vāḷakantāraṁ tāreti dubbhikkhakantāraṁ
tāreti nirudakakantāraṁ tāreti uttāreti nittāreti pattāreti
khemantabhūmiṁ sampāpeti evameva bhagavā satthavāho satte kantāraṁ
tāreti jātikantāraṁ tāreti jarākantāraṁ tāreti byādhikantāraṁ
tāreti maraṇasokaparidevadukkhadomanassupāyāsakantāraṁ tāreti
rāgakantāraṁ tāreti dosamohamānadiṭṭhikilesaduccaritakantāraṁ tāreti
rāgagahanaṁ tāreti dosamohamānadiṭṭhigahanaṁ tāreti kilesagahanaṁ
tāreti uttāreti nittāreti pattāreti khemantaṁ amataṁ nibbānaṁ
1 Ma. karavikarutamañjughoso. 2 Ma. viññeyyo. 3 Po. Ma. yathā.
Sampāpetīti evampi bhagavā satthavāho. Athavā bhagavā netā
vinetā anunetā saññāpetā nijjhāpetā pekkhatā pasādetāti
evampi bhagavā satthavāho. Athavā bhagavā anuppannassa maggassa
uppādetā asañjātassa maggassa sañjanetā anakkhātassa maggassa
akkhātā maggaññū maggavidū maggakovido. Maggānugā ca pana
etarahi sāvakā viharanti pacchāsamannāgatāti evampi bhagavā
satthavāhoti evaṁ vagguvado satthā.