[866] Mamattaṁ so asaṁvindanti mamattāti dve mamattā
taṇhāmamattañca diṭṭhimamattañca .pe. Idaṁ taṇhāmamattaṁ .pe.
1 Ma. itisaddo na dissati.
Idaṁ diṭṭhimamattaṁ. Taṇhāmamattaṁ pahāya diṭṭhimamattaṁ
paṭinissajjitvā mamattaṁ avindanto asaṁvindanto anadhigacchanto
appaṭilabhantoti mamattaṁ so asaṁvindaṁ.

[867] Natthi meti na socatīti vipariṇataṁ vā vatthuṁ na socati
vipariṇatasmiṁ vā vatthusmiṁ na socati cakkhu me vipariṇatanti na
socati sotaṁ me .pe. Sālohitā me vipariṇatāti na socati
na kilamati na paridevati na urattāḷiṁ kandati na sammohaṁ āpajjatīti
natthi meti na socati. Tenāha bhagavā
yassa natthi idaṁ meti paresaṁ vāpi kiñcanaṁ
mamattaṁ so asaṁvindaṁ natthi meti na socatīti.

[868] Aniṭṭhurī anānugiddho anejo sabbadhī samo
tamānisaṁsaṁ pabrūmi pucchito avikampinaṁ.

[869] Aniṭṭhurī anānugiddhoti 1 katamaṁ niṭṭhuriyaṁ. Idhekacco
niṭṭhurī hoti paralābhasakkāragarukāramānanavandanapūjanāsu issati ussuyati
issaṁ bandhati yaṁ evarūpaṁ niṭṭhuriyaṁ niṭṭhuriyakammaṁ issā issāyanā
issāyitattaṁ ussuyā ussuyanā ussuyitattaṁ idaṁ vuccati niṭṭhuriyaṁ.
Yassetaṁ niṭṭhuriyaṁ pahīnaṁ samucchinnaṁ vūpasantaṁ paṭippassaddhaṁ abhabbuppattikaṁ
ñāṇagginā daḍḍhaṁ so vuccati aniṭṭhurīti aniṭṭhurī.
Anānugiddhoti gedho vuccati taṇhā yo rāgo sārāgo .pe.
Abhijjhā lobho akusalamūlaṁ. Yasseso gedho pahīno samucchinno
1 Po. Ma. Yu. ... samoti.
Vūpasanto paṭippassaddho abhabbuppattiko ñāṇagginā daḍḍho
so vuccati anānugiddho. So rūpe agiddho .pe. Diṭṭha sutamuta
viññātabbesu dhammesu agiddho agadhito amucchito anajjhopanno
vītagedho vigatagedho cattagedho vantagedho muttagedho pahīnagedho
paṭinissaṭṭhagedho vītarāgo vigatarāgo cattarāgo vantarāgo
muttarāgo pahīnarāgo paṭinissaṭṭharāgo nicchāto nibbuto sītibhūto
sukhapaṭisaṁvedī brahmabhūtena attanā viharatīti aniṭṭhurī anānugiddho.

[870] Anejo sabbadhī samoti ejā vuccati taṇhā yo
rāgo sārāgo .pe. Abhijjhā lobho akusalamūlaṁ. Yassesā
ejā taṇhā pahīnā samucchinnā vūpasantā paṭippassaddhā abhabbuppattikā
ñāṇagginā daḍḍhā so vuccati anejo. Ejāya
pahīnattā anejo so lābhepi na iñjati alābhepi na iñjati
yasepi na iñjati ayasepi na iñjati pasaṁsāyapi na iñjati
nindāyapi na iñjati sukhepi na iñjati dukkhepi na iñjati
na calati na vedhati nappavedhati na sampavedhatīti anejo. Sabbadhī
samoti sabbaṁ vuccati dvādasāyatanāni cakkhu ceva rūpā ca .pe.
Mano ceva dhammā ca. Yato ajjhattikabāhiresu āyatanesu
chandarāgo pahīno hoti ucchinnamūlo tālāvatthukato anabhāvaṅgato
āyatiṁ anuppādadhammo so vuccati sabbattha samo sabbattha tādi
sabbattha majjhatto sabbattha upekkhakoti anejo sabbadhī samo.

[871] Tamānisaṁsaṁ pabrūmi pucchito avikampinanti avikampinaṁ
puggalānaṁ 1 puṭṭho pucchito yācito ajjhesito pasādito ime
cattāro ānisaṁse pabrūmi yo so aniṭṭhurī anānugiddho anejo
sabbadhī samoti brūmi ācikkhāmi .pe. Pakāsemīti tamānisaṁsaṁ
pabrūmi pucchito avikampinaṁ. Tenāha bhagavā
aniṭṭhurī anānugiddho anejo sabbadhī samo
tamānisaṁsaṁ pabrūmi pucchito avikampinanti.

[872] Anejassa vijānato natthi kāci nisaṅkhiti 2
virato so viyārambhā 3 khemaṁ passati sabbadhi.

[873] Anejassa vijānatoti ejā vuccati taṇhā yo rāgo
sārāgo .pe. Abhijjhā lobho akusalamūlaṁ. Yassesā ejā
taṇhā pahīnā samucchinnā vūpasantā paṭippassaddhā abhabbuppattikā
ñāṇagginā daḍḍhā so vuccati anejo. Ejāya
pahīnattā anejo so lābhepi na iñjati alābhepi na iñjati
yasepi na iñjati ayasepi na iñjati pasaṁsāyapi na iñjati
nindāyapi na iñjati sukhepi na iñjati dukkhepi na iñjati
na calati na vedhati nappavedhati na sampavedhatīti anejassa.
Vijānatoti jānato ājānato vijānato paṭivijānato paṭivijjhato
sabbe saṅkhārā aniccāti jānato ājānato vijānato paṭivijānato
paṭivijjhato sabbe saṅkhārā dukkhāti .pe. Yaṅkiñci samudayadhammaṁ
1 Ma. puggalaṁ. 2 Ma. nisaṅkhati. 3 Ma. viyārabbhā.
Sabbantaṁ nirodhadhammanti jānato ājānato vijānato paṭivijānato
paṭivijjhatoti anejassa vijānato.

[874] Natthi kāci nisaṅkhitīti nisaṅkhitiyo vuccanti puññābhisaṅkhāro
apuññābhisaṅkhāro āneñjābhisaṅkhāro. Yato puññābhisaṅkhāro
ca apuññābhisaṅkhāro ca āneñjābhisaṅkhāro ca pahīnā
honti ucchinnamūlā tālāvatthukatā anabhāvaṅgatā āyatiṁ anuppādadhammā
ettāvatā nisaṅkhitiyo natthi na saṁvijjanti nupalabbhanti
pahīnā samucchinnā vūpasantā paṭippassaddhā abhabbuppattikā
ñāṇagginā daḍḍhāti natthi kāci nisaṅkhiti.

[875] Virato so viyārambhāti viyārambho vuccati puññābhisaṅkhāro
apuññābhisaṅkhāro āneñjābhisaṅkhāro. Yato puññābhisaṅkhāro
ca apuññābhisaṅkhāro ca āneñjābhisaṅkhāro ca pahīnā
honti ucchinnamūlā tālāvatthukatā anabhāvaṅgatā āyatiṁ anuppādadhammā
ettāvatā viyārambhā ārato assa virato paṭivirato
nikkhanto nissaṭṭho vippamutto visaññutto vimariyādikatena cetasā
viharatīti 1 virato so viyārambhā.