[836] Gedhaṁ brūmi mahoghoti ācamaṁ 1 brūmi jappanaṁ
ārammaṇaṁ pakappanaṁ kāmapaṅko duraccayo.

[837] Gedhaṁ brūmi mahoghoti 2 gedho vuccati taṇhā yo
rāgo sārāgo .pe. Abhijjhā lobho akusalamūlaṁ. Mahogho
vuccati taṇhā yo rāgo sārāgo .pe. Abhijjhā lobho
akusalamūlaṁ. Gedhaṁ brūmi mahoghoti gedhaṁ mahoghoti brūmi ācikkhāmi
desemi paññāpemi paṭṭhapemi vivarāmi vibhajāmi uttānīkaromi
pakāsemīti gedhaṁ brūmi mahoghoti.

[838] Ācamaṁ brūmi jappananti ācamā vuccati taṇhā
yo rāgo sārāgo .pe. Abhijjhā lobho akusalamūlaṁ.
Jappanāpi vuccati taṇhā yo rāgo sārāgo .pe. Abhijjhā
lobho akusalamūlaṁ. Ācamaṁ brūmi jappananti ācamaṁ jappanāti
brūmi ācikkhāmi desemi paññāpemi paṭṭhapemi vivarāmi vibhajāmi
uttānīkaromi pakāsemīti ācamaṁ brūmi jappanaṁ.

[839] Ārammaṇaṁ pakappananti ārammaṇā 3 vuccati taṇhā
1 Ma. Yu. ājavaṁ. 2 Ma. Yu. mahoghotīti. 3 Ma. ārammaṇampi.
Yo rāgo sārāgo .pe. Abhijjhā lobho akusalamūlaṁ.
Pakappanāpi vuccati taṇhā yo rāgo sārāgo .pe. Abhijjhā
lobho akusalamūlanti ārammaṇaṁ pakappanaṁ.

[840] Kāmapaṅko duraccayoti kāmapaṅko kāmakaddamo kāmakileso
kāmapalipo kāmapalibodho duraccayo durativatto duttaro
duppataro dussamatikkamo dubbītivattoti kāmapaṅko duraccayo.
Tenāha bhagavā
gedhaṁ brūmi mahoghoti ācamaṁ brūmi jappanaṁ
ārammaṇaṁ pakappanaṁ kāmapaṅko duraccayoti.

[841] Saccā avokkamaṁ muni thale tiṭṭhati brāhmaṇo
sabbaṁ so paṭinissajja save santoti vuccati.

[842] Saccā avokkamaṁ munīti saccavācāya avokkamanto
sammādiṭṭhiyā avokkamanto ariyā aṭṭhaṅgikā maggā
avokkamanto. Munīti monaṁ vuccati ñāṇaṁ yā paññā
pajānanā .pe. Saṅgajālamaticca so munīti saccā avokkamaṁ muni.

[843] Thale tiṭṭhati brāhmaṇoti thalaṁ vuccati amataṁ nibbānaṁ
yo so sabbasaṅkhārasamatho sabbūpadhipaṭinissaggo taṇhakkhayo virāgo
nirodho nibbānaṁ. Brāhmaṇoti sattannaṁ dhammānaṁ vāhitattā
brāhmaṇo .pe. Anissito tādi pavuccate sa brahmā.
Thale tiṭṭhati brāhmaṇoti brāhmaṇo thale tiṭṭhati dīpe tiṭṭhati
Tāṇe tiṭṭhati leṇe tiṭṭhati saraṇe tiṭṭhati abhaye tiṭṭhati
accute tiṭṭhati amate tiṭṭhati nibbāne tiṭṭhatīti thale tiṭṭhati
brāhmaṇo.

[844] Sabbaṁ so paṭinissajjāti sabbaṁ vuccati dvādasāyatanāni
cakkhuñceva rūpā ca .pe. Manoceva dhammā ca. Yato ajjhattikabāhiresu
āyatanesu chandarāgo pahīno hoti ucchinnamūlo tālāvatthukato
anabhāvaṅgato āyatiṁ anuppādadhammo ettāvatāpi sabbaṁ
cattaṁ hoti vantaṁ muttaṁ pahīnaṁ paṭinissaṭṭhaṁ. Yato taṇhā ca
diṭṭhi ca māno ca pahīnā honti ucchinnamūlā tālāvatthukatā
anabhāvaṅgatā 1 āyatiṁ anuppādadhammā ettāvatāpi sabbaṁ cattaṁ
hoti vantaṁ muttaṁ pahīnaṁ paṭinissaṭṭhaṁ. Yato puññābhisaṅkhāro
ca apuññābhisaṅkhāro ca āneñjābhisaṅkhāro ca pahīnā honti
ucchinnamūlā tālāvatthukatā anabhāvaṅgatā āyatiṁ anuppādadhammā
ettāvatāpi sabbaṁ cattaṁ hoti vantaṁ muttaṁ pahīnaṁ paṭinissaṭṭhanti
sabbaṁ so paṭinissajja.

[845] Save santoti vuccatīti so santo upasanto vūpasanto
nibbuto paṭippassaddhoti vuccati kathiyati bhaṇiyati dīpiyati vohariyatīti
save santoti vuccati. Tenāha bhagavā
saccā avokkamaṁ muni thale tiṭṭhati brāhmaṇo
sabbaṁ so paṭinissajja save santoti vuccatīti.
1 Ma. anabhāvaṅkatā. Po. Yu. abhāvaṅgatā.