[776] Pharusena ne na paṭivajjāti pharusenāti kakkhaḷena. Na
paṭivajjāti na paṭibhaṇeyya akkosantaṁ na paccakkoseyya rosantaṁ
na paṭiroseyya bhaṇḍanaṁ na paṭibhaṇḍeyya na kalahaṁ kareyya na
bhaṇḍanaṁ kareyya na viggahaṁ kareyya na vivādaṁ kareyya na medhagaṁ
kareyya kalahabhaṇḍanaviggahavivādamedhagaṁ pajaheyya vinodeyya byantīkareyya
anabhāvaṅgameyya kalahabhaṇḍanaviggahavivādamedhagā ārato
assa virato paṭivirato nikkhanto nissaṭṭho vippamutto visaññutto
vimariyādikatena cetasā vihareyyāti pharusena ne na paṭivajjā.

[777] Na hi santo paṭisenikarotīti santoti rāgassa
santattā santo dosassa mohassa kodhassa upanāhassa .pe.
1 Ma. hiṁseyyuṁ vihiṁseyyuṁ.
Sabbākusalābhisaṅkhārānaṁ santattā samitattā vūpasamitattā
vijjhātattā nibbutattā vigatattā paṭippassaddhattā santo
upasanto vūpasanto nibbuto paṭippassaddhoti santo. Na hi
santo paṭisenikarotīti santo paṭiseniṁ paṭimallaṁ paṭikaṇṭakaṁ paṭipakkhaṁ
na karoti na janeti na sañjaneti na nibbatteti nābhinibbattetīti
na hi santo paṭisenikaroti. Tenāha bhagavā
sutvā rusito bahuṁ vācaṁ
samaṇānaṁ vā puthuvacanānaṁ
pharusena ne na paṭivajjā
na hi santo paṭisenikarotīti.

[778] Etañca dhammamaññāya
vicinaṁ bhikkhu sadā sato sikkhe
santīti nibbutiṁ ñatvā
sāsane gotamassa nappamajjeyya.

[779] Etañca dhammamaññāyāti etanti ācikkhitaṁ desitaṁ
paññāpitaṁ paṭṭhapitaṁ vivaṭaṁ vibhattaṁ uttānīkataṁ pakāsitaṁ.
Dhammamaññāyāti jānitvā tulayitvā tīrayitvā vibhāvayitvā vibhūtaṁ
katvāti evampi etañca dhammamaññāya. Athavā samañca visamañca
pathañca vipathañca sāvajjañca anavajjañca hīnañca paṇītañca
kaṇhañca sukkañca viññūgarahitañca viññūpasatthañca dhammaṁ aññāya
Jānitvā tulayitvā tīrayitvā vibhāvayitvā vibhūtaṁ katvāti evampi
etañca dhammamaññāya. Athavā sammāpaṭipadaṁ anulomapaṭipadaṁ
apaccanīkapaṭipadaṁ [1]- anvatthapaṭipadaṁ dhammānudhammapaṭipadaṁ sīlesu
paripūrikāritaṁ indriyesu guttadvārataṁ bhojane mattaññutaṁ jāgariyānuyogaṁ
satisampajaññaṁ cattāro satipaṭṭhāne cattāro sammappadhāne
cattāro iddhippāde pañcindriyāni pañca balāni satta
bojjhaṅge ariyaṁ aṭṭhaṅgikaṁ maggaṁ nibbānañca nibbānagāminiñca
paṭipadaṁ dhammaṁ aññāya jānitvā tulayitvā tīrayitvā vibhāvayitvā
vibhūtaṁ katvāti evampi etañca dhammamaññāya.

[780] Vicinaṁ bhikkhu sadā sato sikkheti vicinanti vicinanto
pavicinanto tulayanto tīrayanto vibhāvayanto vibhūtaṁ karonto
sabbe saṅkhārā aniccāti .pe. Yaṅkiñci samudayadhammaṁ sabbantaṁ
nirodhadhammanti vicinanto pavicinanto tulayanto tīrayanto vibhāvayanto
vibhūtaṁ karontoti vicinaṁ bhikkhu. Sadāti sadā sabbadā
sabbakālaṁ .pe. Pacchime vayokhandhe. Satoti catūhi kāraṇehi
sato kāye kāyānupassanāsatipaṭṭhānaṁ bhāvento .pe. So
vuccati sato. Sikkheti tisso sikkhā adhisīlasikkhā adhicittasikkhā
adhipaññāsikkhā .pe. Ayaṁ adhipaññāsikkhā. Imā tisso
sikkhā āvajjanto sikkheyya .pe. Sikkheyya ācareyya
samācareyya samādāya vatteyyāti vicinaṁ bhikkhu sadā sato sikkhe.
1 Ma. aviruddhapaṭipadaṁ.

[781] Santīti nibbutiṁ ñatvāti rāgassa nibbutiṁ santīti
ñatvā dosassa mohassa .pe. Sabbākusalābhisaṅkhārānaṁ nibbutiṁ
santīti ñatvā jānitvā tulayitvā tīrayitvā vibhāvayitvā vibhūtaṁ
katvāti santīti nibbutiṁ ñatvā.

[782] Sāsane gotamassa nappamajjeyyāti gotamasāsane
buddhasāsane jinasāsane tathāgatasāsane devasāsane arahantasāsane.
Nappamajjeyyāti sakkaccakārī assa sātaccakārī aṭṭhitakārī
anolīnavuttiko anikkhittacchando anikkhittadhuro appamatto kusalesu
dhammesu kadāhaṁ aparipūraṁ vā sīlakkhandhaṁ paripūreyyaṁ .pe.
Aparipūraṁ vā samādhikkhandhaṁ paññākkhandhaṁ vimuttikkhandhaṁ vimuttiñāṇadassanakkhandhaṁ
kadāhaṁ apariññātaṁ vā dukkhaṁ parijāneyyaṁ
appahīne vā kilese pajaheyyaṁ abhāvitaṁ vā maggaṁ bhāveyyaṁ
asacchikataṁ vā nirodhaṁ sacchikareyyanti yo tattha chando ca vāyāmo
ca ussāho ca ussoḷhī ca thāmo ca appaṭivānī ca
satisampajaññañca ātappaṁ padhānaṁ adhiṭṭhānaṁ anuyogo appamādo
kusalesu dhammesūti sāsane gotamassa nappamajjeyya. Tenāha bhagavā
etañca dhammamaññāya
vicinaṁ bhikkhu sadā sato sikkhe
santīti nibbutiṁ ñatvā
sāsane gotamassa nappamajjeyyāti.

[783] Abhibhū hi so anabhibhūto
sakkhidhammaṁ anītihamadassī
tasmā hi tassa bhagavato sāsane
appamatto sadā namassamanusikkheti bhagavā.

[784] Abhibhū hi so anabhibhūtoti abhibhūtarūpā 1 abhibhūtasaddā
abhibhūtagandhā abhibhūtarasā abhibhūtaphoṭṭhabbā abhibhūtadhammā abhibhū 1
anabhibhūto kehici kilesehi abhibhū hi pāpake akusale dhamme
saṅkilesike ponobbhavike sadare dukkhavipāke āyatiṁ jātijarāmaraṇīyeti
abhibhū hi so anabhibhūto.

[785] Sakkhidhammaṁ anītihamadassīti sakkhidhammanti na itihitihaṁ
na itikirāya na paramparāya na piṭakasampadāya na takkahetu na
nayahetu na ākāraparivitakkena na diṭṭhinijjhānakkhantiyā sāmaṁ
sayamabhiññātaṁ attapaccakkhaṁ dhammaṁ addasi addakkhi apassi paṭivijjhīti
sakkhidhammaṁ anītihamadassī.