[756] Nindāya nappavedheyya
na uṇṇameyya pasaṁsito bhikkhu
lobhaṁ saha macchariyena
kodhaṁ pesuṇiyañca panūdeyya.

[757] Nindāya nappavedheyyāti idhekacce bhikkhuṁ nindanti
jātiyā vā gottena vā kolaputtikena vā vaṇṇapokkharatāya
vā dhanena vā ajjhenena vā kammāyatanena vā sippāyatanena
vā vijjaṭṭhānena vā sutena vā paṭibhāṇena vā aññataraññatarena
vā vatthunā nindanti garahanti upavadanti. Nindito garahito
upavadito nindāya garahāya upavādena akittiyā avaṇṇahārikāya
na vedheyya nappavedheyya na sampavedheyya na taseyya na uttaseyya
na parittaseyya na bhāyeyya na santāsaṁ āpajjeyya abhiru
assa acchambhī anutrāsī apalāyī pahīnabhayabheravo vigatalomahaṁso
Vihareyyāti nindāya nappavedheyya.

[758] Na uṇṇameyya pasaṁsito bhikkhūti idhekacce bhikkhuṁ
pasaṁsanti jātiyā vā .pe. Aññataraññatarena vā vatthunā
pasaṁsanti thomenti kittenti vaṇṇenti. Pasaṁsito thomito
kittito vaṇṇito pasaṁsāya thomanena kittiyā vaṇṇahārikāya
uṇṇatiṁ na kareyya uṇṇamaṁ na kareyya mānaṁ na kareyya thambhaṁ
na kareyya na tena thaddho assa patthaddho paggahitasiroti
na uṇṇameyya pasaṁsito bhikkhu.

[759] Lobhaṁ saha macchariyena kodhaṁ pesuṇiyañca panūdeyyāti
lobhoti yo lobho lubbhanā lubbhitattaṁ sārāgo sārajjanā
sārajjitattaṁ abhijjhā lobho akusalamūlaṁ. Macchariyanti pañca
macchariyāni āvāsamacchariyaṁ .pe. Gāho vuccati macchariyaṁ.
Kodhoti yo cittassa āghāto paṭighāto paṭighaṁ paṭivirodho kopo
pakopo sampakopo doso padoso sampadoso cittassa byāpatti
manopadoso kodho kujjhanā kujjhitattaṁ doso dussanā dussitattaṁ
byāpatti byāpajjanā byāpajjitattaṁ virodho paṭivirodho caṇḍikkaṁ
assuropo anattamanatā cittassa. Pesuṇiyanti idhekacco pisuṇavāco
hoti ito sutvā amutra akkhātā imesaṁ bhedāya amutra
vā sutvā imesaṁ akkhātā amūsaṁ bhedāya iti samaggānaṁ vā
bhettā bhinnānaṁ vā anuppadātā vaggārāmo vaggarato vagganandī
Vaggakaraṇiṁ vācaṁ bhāsitā hoti idaṁ vuccati pesuññaṁ. Apica dvīhi
kāraṇehi pesuññaṁ upasaṁharati piyakamyatāya vā bhedādhippāyo vā.
Kathaṁ piyakamyatāya pesuññaṁ upasaṁharati. Imassa piyo bhavissāmi
manāpo bhavissāmi vissāsiko bhavissāmi abbhantariko bhavissāmi
suhadayo bhavissāmīti evaṁ piyakamyatāya pesuññaṁ upasaṁharati. Kathaṁ
bhedādhippāyo pesuññaṁ upasaṁharati. Kathaṁ ime nānā assu vinā
assu vaggā assu dvidhā assu dvejjhā assu dvepakkhā
assu bhijjeyyuṁ na samāgaccheyyuṁ dukkhaṁ na phāsu vihareyyunti evaṁ
bhedādhippāyo pesuññaṁ upasaṁharati. Lobhaṁ saha macchariyena kodhaṁ
pesuṇiyañca panūdeyyāti lobhañca macchariyañca kodhañca pesuññañca
panūdeyya pajaheyya vinodeyya byantīkareyya anabhāvaṅgameyyāti
lobhaṁ saha macchariyena kodhaṁ pesuṇiyañca panūdeyya. Tenāha bhagavā
nindāya nappavedheyya
na uṇṇameyya pasaṁsito bhikkhu
lobhaṁ saha macchariyena
kodhaṁ pesuṇiyañca panūdeyyāti.

[760] Kayavikkaye na tiṭṭheyya
upavādaṁ bhikkhu na kareyya kuhiñci
gāme ca nābhisajjeyya
lābhakamyā janaṁ na lāpayeyya.

[761] Kayavikkaye na tiṭṭheyyāti ye kayavikkayā vinaye
paṭikkhittā na te imasmiṁ atthe adhippetā. Kathaṁ kayavikkaye
tiṭṭhati. Pañcannaṁ saddhiṁ pattaṁ vā cīvaraṁ vā aññaṁ vā kiñci
parikkhāraṁ vañcaniyaṁ vā karonto udayaṁ vā patthayanto parivatteti
evaṁ kayavikkaye tiṭṭhati. Kathaṁ kayavikkaye na tiṭṭhati. Pañcannaṁ
saddhiṁ pattaṁ vā cīvaraṁ vā aññaṁ vā kiñci parikkhāraṁ na vañcaniyaṁ
vā karonto na udayaṁ vā patthayanto parivatteti evaṁ kayavikkaye
na tiṭṭhati. Kayavikkaye na tiṭṭheyyāti kayavikkaye na tiṭṭheyya
na santiṭṭheyya kayavikkayaṁ pajaheyya vinodeyya byantīkareyya
anabhāvaṅgameyya kayavikkayā ārato assa virato paṭivirato
nikkhanto nissaṭṭho vippamutto visaññutto vimariyādikatena cetasā
vihareyyāti kayavikkaye na tiṭṭheyya.

[762] Upavādaṁ bhikkhu na kareyya kuhiñcīti katame upavādakarā
kilesā. Santeke samaṇabrāhmaṇā iddhimanto dibbacakkhukā
paracittaviduno te dūratopi passanti āsannāpi na dissanti
cetasāpi cittaṁ pajānanti. Devatāpi kho santi iddhimantiniyo
dibbacakkhukā paracittaviduniyo tā dūratopi passanti āsannāpi
na dissanti cetasāpi cittaṁ pajānanti. Te oḷārikehi vā
kilesehi majjhimehi vā kilesehi sukhumehi vā kilesehi upavadeyyuṁ.
Katame oḷārikā kilesā. Kāyaduccaritaṁ vacīduccaritaṁ manoduccaritaṁ
Ime vuccanti oḷārikā kilesā. Katame majjhimā kilesā.
Kāmavitakko byāpādavitakko vihiṁsāvitakko ime vuccanti majjhimā
kilesā. Katame sukhumā kilesā. Ñātivitakko janapadavitakko
amaravitakko parānuddayatāpaṭisaññutto vitakko lābhasakkārasilokapaṭisaññutto
vitakko anavaññattipaṭisaññutto vitakko ime
vuccanti sukhumā kilesā. Te oḷārikehi vā kilesehi majjhimehi
vā kilesehi sukhumehi vā kilesehi upavadeyyuṁ 1 . Upavādaṁ na
kareyya upavādakare kilese na kareyya na janeyya na sañjaneyya
na nibbatteyya nābhinibbatteyya upavādakare kilese pajaheyya
vinodeyya byantīkareyya anabhāvaṅgameyya upavādakarehi kilesehi
ārato assa virato paṭivirato nikkhanto nissaṭṭho vippamutto
visaññutto vimariyādikatena cetasā vihareyya. Kuhiñcīti kuhiñci
kimhici katthaci ajjhattaṁ vā bahiddhā vā ajjhattabahiddhā vāti
upavādaṁ bhikkhu na kareyya kuhiñci.

[763] Gāme ca nābhisajjeyyāti kathaṁ gāme sajjati. Idha
bhikkhu gāme gihīhi saṁsaṭṭho viharati sahanandī sahasokī sukhitesu
sukhito dukkhitesu dukkhito uppannesu kiccakaraṇīyesu attanā voyogaṁ
āpajjati evampi gāme sajjati. Athavā bhikkhu pubbaṇhasamayaṁ
nivāsetvā pattacīvaramādāya gāmaṁ vā nigamaṁ vā piṇḍāya pāvisati 2
arakkhiteneva kāyena arakkhitāya vācāya arakkhitena cittena
1 Ma. upavadeyya. 2 Po. Ma. pavisati. ito paraṁ evaṁ ñātabbaṁ.
Anupaṭṭhitāya satiyā asaṁvutehi indriyehi so tatra tatra sajjati
tatra tatra gaṇhāti tatra tatra bajjhati tatra tatra anayabyasanaṁ
āpajjati evampi gāme sajjati. Kathaṁ gāme na sajjati.
Idha bhikkhu gāme gihīhi asaṁsaṭṭho viharati na sahanandī na sahasokī
na sukhitesu sukhito na dukkhitesu dukkhito uppannesu kiccakaraṇīyesu
na attanā voyogaṁ āpajjati evampi gāme na sajjati. Athavā
bhikkhu pubbaṇhasamayaṁ nivāsetvā pattacīvaramādāya gāmaṁ vā nigamaṁ
vā piṇḍāya pāvisati rakkhiteneva kāyena rakkhitāya vācāya
rakkhitena cittena upaṭṭhitāya satiyā saṁvutehi indriyehi so
tatra tatra na sajjati tatra tatra na gaṇhāti tatra tatra na
bajjhati tatra tatra na anayabyasanaṁ āpajjati evampi gāme
na sajjati. Gāme ca nābhisajjeyyāti gāme na sajjeyya na
gaṇheyya na bajjheyya na palibajjheyya agiddho assa agadhito
amucchito anajjhopanno vītagedho vigatagedho cattagedho .pe.
Brahmabhūtena attanā vihareyyāti gāme ca nābhisajjeyya.

[764] Lābhakamyā janaṁ na lāpayeyyāti katamā lapanā.
Lābhasakkārasilokasannissitassa pāpicchassa icchāpakatassa āmisacakkhukassa
lokadhammagarukassa yā paresaṁ ālapanā lapanā sallapanā ullapanā
samullapanā unnahanā samunnahanā ukkāpanā samukkāpanā 1 anuppiyabhāṇitā
pātukamyatā muggasūpatā pāribhaṭyatā parapiṭṭhimaṁsikatā
1 Ma. ukkācanā samukkācanā.
Yā tattha saṇhavācakatā sakhilavācakatā mettavācakatā apharusavācakatā
ayaṁ vuccati lapanā. Apica dvīhi kāraṇehi janaṁ lapati
attānaṁ vā nīcaṁ ṭhapento paraṁ uccaṁ ṭhapento janaṁ lapati attānaṁ
vā uccaṁ ṭhapento paraṁ nīcaṁ ṭhapento janaṁ lapati.
Kathaṁ attānaṁ nīcaṁ ṭhapento paraṁ uccaṁ ṭhapento janaṁ lapati.
Tumhe me bahūpakārā ahaṁ tumhe nissāya labhāmi
cīvarapiṇḍapātasenāsanagilānapaccayabhesajjaparikkhāraṁ yepi me aññe dātuṁ vā
kātuṁ vā maññanti tumhe nissāya tumhe sampassantā yampi [1]-
purāṇaṁ mātāpitikaṁ nāmadheyyaṁ tampi me antarahitaṁ tumhehi
ahaññāyāmi asukassa kulupako asukāya kulupakoti evaṁ attānaṁ
nīcaṁ ṭhapento paraṁ uccaṁ ṭhapento janaṁ lapati.
Kathaṁ attānaṁ uccaṁ ṭhapento paraṁ nīcaṁ ṭhapento janaṁ lapati.
Ahaṁ tumhākaṁ bahūpakāro tumhe maṁ āgamma buddhaṁ saraṇaṁ gatā
dhammaṁ saraṇaṁ gatā saṅghaṁ saraṇaṁ gatā pāṇātipātā paṭiviratā
adinnādānā paṭiviratā kāmesumicchācārā paṭiviratā musāvādā
paṭiviratā surāmerayamajjapamādaṭṭhānā paṭiviratā ahaṁ tumhākaṁ
uddesaṁ demi paripucchaṁ demi uposathaṁ ācikkhāmi navakammaṁ adhiṭṭhāmi
atha ca pana tumhe maṁ ussajjitvā 2 aññe sakkarotha garukarotha
mānetha pūjethāti evampi attānaṁ uccaṁ ṭhapento paraṁ nīcaṁ
ṭhapento janaṁ lapati.
1 Ma. me. 2 Po. Ma. ujjhitvā.
Lābhakamyā janaṁ na lāpayeyyati lābhahetu [1]- lābhakāraṇā
lābhābhinibbattiyā lābhaṁ paripācento janaṁ na lapayeyya lapanaṁ pajaheyya
vinodeyya byantīkareyya anabhāvaṅgameyya ālapanā 2 ārato assa
virato paṭivirato nikkhanto nissaṭṭho vippamutto visaññutto
vimariyādikatena cetasā vihareyyāti lābhakamyā janaṁ na lāpayeyya.
Tenāha bhagavā
kayavikkaye na tiṭṭheyya
upavādaṁ bhikkhu na kareyya kuhiñci
gāme ca nābhisajjeyya
lābhakamyā janaṁ na lāpayeyyāti.

[765] Na ca katthitā 3 siyā bhikkhu
na ca vācaṁ payuttaṁ bhāseyya
pāgabbhiyaṁ na sikkheyya
kathaṁ viggāhikaṁ na kathayeyya.