[736] Phassena yadā phuṭṭhassa
paridevaṁ bhikkhu na kareyya kuhiñci
bhavañca nābhijappeyya
bheravesu ca na sampavedheyya.

[737] Phassena yadā phuṭṭhassāti 1 rogaphassena phuṭṭho pareto
samohito samannāgato assa cakkhurogena phuṭṭho pareto samohito
samannāgato assa sotarogena ghānarogena jivhārogena kāyarogena
sīsarogena kaṇṇarogena mukharogena dantarogena kāsena sāsena
pināsena ḍahena jarena kucchirogena mucchāya pakkhandikāya sulāya
visūcikāya kuṭṭhena gaṇḍena kilāsena sosena apamārena dadduyā
1 Ma. phassoti rogaphasso. Yu. phassoti.
Kaṇḍuyā kacchuyā rakhasāya vitacchikāya lohitena pittena madhumehena
aṁsāya piḷakāya bhagandalāya pittasamuṭṭhānehi ābādhehi
semhasamuṭṭhānehi ābādhehi vātasamuṭṭhānehi ābādhehi sannipātikehi
ābādhehi utupariṇāmajehi ābādhehi visamaparihārajehi ābādhehi
opakkamikehi ābādhehi kammavipākajehi ābādhehi sītena uṇhena
jighacchāya pipāsāya uccārena passāvena ḍaṁsamakasavātātapasiriṁsapasamphassehi
phuṭṭho pareto samohito samannāgato assāti phassena
yadā phuṭṭhassa.

[738] Paridevaṁ bhikkhu na kareyya kuhiñcīti ādevaṁ paridevaṁ
ādevanaṁ paridevanaṁ ādevitattaṁ paridevitattaṁ vācāpalāpaṁ vippalāpaṁ
lālappaṁ lālappāyanaṁ lālappāyitattaṁ na kareyya na janeyya na
sañjaneyya na nibbatteyya nābhinibbatteyya. Kuhiñcīti kuhiñci
kimhici katthaci ajjhattaṁ vā bahiddhā vā ajjhattabahiddhā vāti
paridevaṁ bhikkhu na kareyya kuhiñci.

[739] Bhavañca nābhijappeyyāti kāmabhavaṁ na jappeyya rūpabhavaṁ
na jappeyya arūpabhavaṁ na jappeyya na pajappeyya nābhijappeyyāti
bhavañca nābhijappeyya.

[740] Bheravesu ca na sampavedheyyāti bheravāti ekena
ākārena bhayampi bheravampi taññeva. Vuttaṁ hetaṁ bhagavatā etaṁ
nūna taṁ bhayaṁ bheravaṁ [1]- āgacchatīti. Bahiddhārammaṇaṁ vuttaṁ sīhā
1 Ma. na jahe.
Byagghā dīpi acchā taracchā kokā gomahisā [1]- hatthī ahi vicchikā
satapadī corā vā assu māṇavā katakammā vā akatakammā
vā. Athāparena ākārena bhayaṁ vuccati ajjhattikaṁ cittasamuṭṭhānaṁ
bhayaṁ bhayānakaṁ chambhitattaṁ lomahaṁso cetaso ubbego utrāso
jātibhayaṁ jarābhayaṁ byādhibhayaṁ maraṇabhayaṁ rājabhayaṁ corabhayaṁ aggibhayaṁ
udakabhayaṁ attānuvādabhayaṁ parānuvādabhayaṁ daṇḍabhayaṁ duggatibhayaṁ
ūmibhayaṁ kumbhilabhayaṁ āvaṭṭabhayaṁ suṁsukārabhayaṁ 2 ājīvakabhayaṁ 3 asilokabhayaṁ
parisāya sārajjabhayaṁ [4]- bhayānakaṁ chambhitattaṁ lomahaṁso cetaso ubbego
utrāso. Bheravesu ca na sampavedheyyāti bherave passitvā
vā suṇitvā vā na vedheyya na pavedheyya na sampavedheyya na
taseyya na uttaseyya na parittaseyya na bhāyeyya na santāsaṁ
āpajjeyya abhiru 5 assa acchambhī anutrāsī apalāyī pahīnabhayabheravo
vigatalomahaṁso vihareyyāti bheravesu ca na sampavedheyya.
Tenāha bhagavā
phassena yadā phuṭṭhassa
paridevaṁ bhikkhu na kareyya kuhiñci
bhavañca nābhijappeyya
bheravesu ca na sampavedheyyāti.

[741] Annānamatho pānānaṁ
khādanīyānaṁ athopi vatthānaṁ
1 Ma. assā. 2 Ma. susukābhayaṁ. 3 Ma. ājīvikabhayaṁ. 4 Ma. madanabhayaṁ
duggatibhayaṁ bhayaṁ. 5 Yu. abhīru.
Laddhā na sannidhiṁ kayirā
na ca parittase tāni alabbhamāno 1 .

[742] Annānamatho pānānaṁ khādanīyānaṁ athopi vatthānanti
annānanti odano kummāso sattu maccho maṁsaṁ. Pānānanti
aṭṭha pānāni ambapānaṁ jambūpānaṁ cocapānaṁ mocapānaṁ madhukapānaṁ
muddhikapānaṁ sālukapānaṁ phārusakapānaṁ. Aparānipi aṭṭha pānāni
kosambapānaṁ kolapānaṁ badarapānaṁ ghaṭapānaṁ telapānaṁ yāgupānaṁ
payopānaṁ rasapānaṁ. Khādanīyānanti piṭṭhakhajjakaṁ puvakhajjakaṁ mūlakhajjakaṁ
tacakhajjakaṁ pattakhajjakaṁ pupphakhajjakaṁ phalakhajjakaṁ. Vatthānanti cha
cīvarāni khomaṁ kappāsikaṁ koseyyaṁ kambalaṁ sāṇaṁ bhaṅganti
annānamatho pānānaṁ khādanīyānaṁ athopi vatthānaṁ.

[743] Laddhā na sannidhiṁ kayirāti laddhāti laddhā labhitvā
adhigantvā vinditvā paṭilabhitvā na kuhanāya na lapanāya na nemittakatāya
na nippesikatāya na lābhena lābhaṁ nijigiṁsanatāya 2 na dārudānena
na veḷudānena na pattadānena na pupphadānena na phaladānena na
sinānadānena na cuṇṇadānena na mattikadānena na dantakaṭṭhadānena
na mukhodakadānena na pātukamyatāya na muggasūpatāya na pāribhaṭyatāya
na pīṭhamaddikatāya na vatthuvijjāya na tiracchānavijjāya na
aṅgavijjāya na nakkhattavijjāya na dūtagamanena na pahīnagamanena na
jaṅghapesanikena 3 na vejjakammena na navakammena na piṇḍapaṭipiṇḍakena
1 Ma. alabhamāno. 2 Ma. nijigīsanatāya. 3 Ma. jaṅghapesaniyena.
Na dānānuppadānena dhammena samena laddhā labhitvā adhigantvā
vinditvā paṭilabhitvāti laddhā. Na sannidhiṁ kayirāti annasannidhiṁ
pānasannidhiṁ vatthasannidhiṁ yānasannidhiṁ sayanasannidhiṁ gandhasannidhiṁ
āmisasannidhiṁ na kareyya na janeyya na sañjaneyya na nibbatteyya
nābhinibbatteyyāti laddhā na sannidhiṁ kayirā.

[744] Na ca parittase tāni alabbhamānoti annaṁ vā na
labhāmi pānaṁ vā na labhāmi vatthaṁ vā na labhāmi kulaṁ vā na
labhāmi gaṇaṁ vā na labhāmi āvāsaṁ vā na labhāmi lābhaṁ
vā na labhāmi yasaṁ vā na labhāmi pasaṁsaṁ vā na labhāmi sukhaṁ
vā na labhāmi cīvaraṁ vā na labhāmi piṇḍapātaṁ vā na labhāmi
senāsanaṁ vā na labhāmi gilānapaccayabhesajjaparikkhāraṁ vā na labhāmi
gilānupaṭṭhākaṁ vā na labhāmi appaññātomhīti na taseyya na
uttaseyya na parittaseyya na bhāyeyya na santāsaṁ āpajjeyya
abhiru assa acchambhī anutrāsī apalāyī pahīnabhayabheravo
vigatalomahaṁso vihareyyāti na ca parittase tāni alabbhamāno.
Tenāha bhagavā
annānamatho pānānaṁ
khādanīyānaṁ athopi vatthānaṁ
laddhā na sannidhiṁ kayirā
na ca parittase tāni alabbhamānoti.

[745] Jhāyī na pādalolassa
virame kukkuccā nappamajjeyya
athāsanesu sayanesu
appasaddesu bhikkhu vihareyya.