[666] Jānāmi passāmi tatheva etanti jānāmīti paracittañāṇena
vā jānāmi pubbenivāsānussatiñāṇena vā jānāmi.
Passāmīti maṁsacakkhunā vā passāmi dibbena vā cakkhunā passāmi.
Tatheva etanti etaṁ tathaṁ tacchaṁ bhūtaṁ yāthāvaṁ aviparītanti jānāmi
passāmi tatheva etaṁ.

[667] Diṭṭhiyā eke paccenti suddhinti diṭṭhiyā eke
samaṇabrāhmaṇā suddhiṁ visuddhiṁ parisuddhiṁ muttiṁ vimuttiṁ parimuttiṁ
paccenti. Sassato loko idameva saccaṁ moghamaññanti diṭṭhiyā
eke samaṇabrāhmaṇā suddhiṁ visuddhiṁ parisuddhiṁ muttiṁ vimuttiṁ
Parimuttiṁ paccenti. Asassato loko .pe. Neva hoti na na
hoti tathāgato parammaraṇā idameva saccaṁ moghamaññanti diṭṭhiyā
eke samaṇabrāhmaṇā suddhiṁ visuddhiṁ parisuddhiṁ muttiṁ vimuttiṁ
parimuttiṁ paccentīti diṭṭhiyā eke paccenti suddhiṁ.

[668] Addakkhi ce kiñhi tumassa tenāti addakkhīti
paracittañāṇena vā addakkhi pubbenivāsānussatiñāṇena vā
addakkhi maṁsacakkhunā vā addakkhi dibbena vā cakkhunā addakkhīti
addakkhi ce. Kiñhi tumassa tenāti tassa tena dassanena kiṁ
kathaṁ [1]- dukkhapariññā atthi na samudayassa pahānaṁ atthi na maggabhāvanā
atthi na phalasacchikiriyā atthi na rāgassa samucchedappahānaṁ
atthi na dosassa samucchedappahānaṁ atthi na mohassa
samucchedappahānaṁ atthi na kilesānaṁ samucchedappahānaṁ atthi na
saṁsāravaṭṭassa ucchedo 2 atthīti addakkhi ce kiñhi tumassa tena.

[669] Atisitvā aññena vadanti suddhinti te diṭṭhiyā 3
suddhimaggaṁ visuddhimaggaṁ parisuddhimaggaṁ vodātamaggaṁ pariyodātamaggaṁ 4
atikkamitvā samatikkamitvā vītikkamitvā aññatra satipaṭṭhānehi
aññatra sammappadhānehi aññatra iddhippādehi aññatra
indriyehi aññatra balehi aññatra bojjhaṅgehi aññatra ariyā
aṭṭhaṅgikā maggā suddhiṁ visuddhiṁ parisuddhiṁ muttiṁ vimuttiṁ parimuttiṁ
vadanti kathenti bhaṇanti dīpayanti voharantīti evampi atisitvā
1 Ma. nasaddo atthi. 2 Ma. upacchedo. 3 Ma. Yu. titthiyā. 4 parivodātamaggaṁ
itipi pāṭho.
Aññena vadanti suddhiṁ. Athavā buddhā ca buddhasāvakā ca
paccekabuddhā ca tesaṁ diṭṭhiyā 1 asuddhimaggaṁ avisuddhimaggaṁ aparisuddhimaggaṁ
avodātamaggaṁ apariyodātamaggaṁ atikkamitvā samatikkamitvā
vītivattitvā catūhi satipaṭṭhānehi catūhi sammappadhānehi catūhi
iddhippādehi pañcahi indriyehi pañcahi balehi sattahi bojjhaṅgehi
ariyena aṭṭhaṅgikena maggena suddhiṁ visuddhiṁ parisuddhiṁ muttiṁ vimuttiṁ
parimuttiṁ vadanti kathenti bhaṇanti dīpayanti voharantīti evampi
atisitvā aññena vadanti suddhiṁ. Tenāha bhagavā
jānāmi passāmi tatheva etaṁ
diṭṭhiyā eke paccenti suddhiṁ
addakkhi ce kiñhi tumassa tena
atisitvā aññena vadanti suddhinti.

[670] Passaṁ naro dakkhati nāmarūpaṁ
disvāna vāññassati 2 tānimeva
kāmaṁ bahuṁ passatu appakaṁ vā
na hi tena suddhiṁ kusalā vadanti.

[671] Passaṁ naro dakkhati nāmarūpanti passaṁ naroti paracittañāṇena
vā passanto pubbenivāsānussatiñāṇena vā passanto
maṁsacakkhunā vā passanto dibbena vā cakkhunā passanto nāmarūpaññeva
dakkhati niccato sukhato attato na tesaṁ dhammānaṁ samudayaṁ
1 Ma. Yu. titthiyānaṁ. 2 Ma. disvāna vā ñāyati.
Vā atthaṅgamaṁ vā assādaṁ vā ādīnavaṁ vā nissaraṇaṁ vā dakkhatīti
passaṁ naro dakkhati nāmarūpaṁ.

[672] Disvāna vāññassati tānimevāti disvāti paracittañāṇena
vā disvā pubbenivāsānussatiñāṇena vā disvā
maṁsacakkhunā vā disvā dibbena vā cakkhunā disvā nāmarūpaññeva
disvā ñassati niccato sukhato attato na tesaṁ dhammānaṁ
samudayaṁ vā atthaṅgamaṁ vā assādaṁ vā ādīnavaṁ vā nissaraṇaṁ
vā ñassatīti disvāna vāññassati tānimeva.

[673] Kāmaṁ bahuṁ passatu appakaṁ vāti kāmaṁ bahukaṁ vā
passanto nāmarūpaṁ appakaṁ vā niccato sukhato attatoti kāmaṁ
bahuṁ passatu appakaṁ vā.

[674] Na hi tena suddhiṁ kusalā vadantīti kusalāti ye te
khandhakusalā dhātukusalā āyatanakusalā paṭiccasamuppādakusalā
satipaṭṭhānakusalā sammappadhānakusalā iddhippādakusalā indriyakusalā
balakusalā bojjhaṅgakusalā maggakusalā phalakusalā nibbānakusalā
te kusalā paracittañāṇena vā pubbenivāsānussatiñāṇena vā
maṁsacakkhunā vā dibbena vā cakkhunā nāmarūpadassanena suddhiṁ
visuddhiṁ parisuddhiṁ muttiṁ vimuttiṁ parimuttiṁ na vadanti na kathenti na
bhaṇanti na dīpayanti na voharantīti na hi tena suddhiṁ kusalā
vadanti. Tenāha bhagavā
Passaṁ naro dakkhati nāmarūpaṁ
disvāna vāññassati tānimeva
kāmaṁ bahuṁ passatu appakaṁ vā
na hi tena suddhiṁ kusalā vadantīti.

[675] Nivissavādī na hi subbināyo
pakappitaṁ 1 diṭṭhi purekkharāno
yaṁ nissito tattha subhaṁvadāno
suddhiṁvado tattha tathaddasā so.