[646] Sakaṁ hi dhammaṁ paripuṇṇamāhūti sakaṁ hi dhammaṁ diṭṭhiṁ
paṭipadaṁ maggaṁ eke samaṇabrāhmaṇā idaṁ samattaṁ paripuṇṇaṁ
anomanti evamāhaṁsu evaṁ kathenti evaṁ bhaṇanti evaṁ dīpayanti
evaṁ voharantīti sakaṁ hi dhammaṁ paripuṇṇamāhu.

[647] Aññassa dhammaṁ pana hīnamāhūti aññassa dhammaṁ diṭṭhiṁ
Paṭipadaṁ maggaṁ eke samaṇabrāhmaṇā hīnaṁ etaṁ nihīnaṁ etaṁ
omakaṁ etaṁ lāmakaṁ ekaṁ jatukkaṁ etaṁ parittakaṁ etanti
evamāhaṁsu evaṁ kathenti evaṁ bhaṇanti evaṁ dīpayanti evaṁ
voharantīti aññassa dhammaṁ pana hīnamāhu.

[648] Evampi viggayha vivādayantīti evaṁ gahetvā gaṇhitvā
parāmasitvā abhinivisitvā vivādayanti kalahaṁ karonti bhaṇḍanaṁ karonti
viggahaṁ karonti vivādaṁ karonti medhagaṁ karonti na tvaṁ imaṁ
dhammavinayaṁ ājānāsi .pe. Nibbedhehi vā sace pahosīti evampi
viggayha vivādayanti.

[649] Sakaṁ sakaṁ sammatimāhu saccanti sassato loko .pe.
Neva hoti na na hoti tathāgato parammaraṇā idameva saccaṁ
moghamaññanti sakaṁ sakaṁ sammatimāhu saccaṁ. Tenāha bhagavā
sakaṁ hi dhammaṁ paripuṇṇamāhu
aññassa dhammaṁ pana hīnamāhu
evampi viggayha vivādayanti
sakaṁ sakaṁ sammatimāhu saccanti.

[650] Parassa ce vambhayitena hīno
na koci dhammesu visesi assa
puthū hi aññassa vadanti dhammaṁ
nihīnato samhi daḷhaṁvadānā.

[651] Parassa ce vambhayitena hīnoti parassa ce vambhayitakāraṇā
ninditakāraṇā garahitakāraṇā upavaditakāraṇā paro bālo
hoti hīno nihīno omako lāmako jatukko parittoti parassa
ce vambhayitena hīno.

[652] Na koci dhammesu visesi assāti dhammesu na koci
aggo seṭṭho viseṭṭho pāmokkho uttamo pavaro assāti na
koci dhammesu visesi assa.

[653] Puthū hi aññassa vadanti dhammaṁ nihīnatoti bahukāpi
bahunnaṁ dhammaṁ vadanti upavadanti nindanti garahanti hīnato nihīnato
omakato lāmakato jatukkato parittato bahukāpi ekassa dhammaṁ
vadanti upavadanti nindanti garahanti hīnato nihīnato omakato
lāmakato jatukkato parittato ekopi bahunnaṁ dhammaṁ vadati
upavadati nindati garahati hīnato nihīnato omakato lāmakato
jatukkato parittato ekopi ekassa dhammaṁ vadati upavadati
nindati garahati hīnato nihīnato omakato lāmakato jatukkato
parittatoti puthū hi aññassa vadanti dhammaṁ nihīnato.

[654] Samhi daḷhaṁvadānāti dhammo sakāyanaṁ diṭṭhi sakāyanaṁ
paṭipadā sakāyanaṁ maggo sakāyanaṁ. Sakāyane daḷhavādā thiravādā
balikavādā avaṭṭhitavādāti samhi daḷhaṁvadānā. Tenāha
bhagavā
Parassa ce vambhayitena hīno
na koci dhammesu visesi assa
puthū hi aññassa vadanti dhammaṁ
nihīnato samhi daḷhaṁvadānāti.

[655] Sadhammapūjā 1 ca panā tatheva
yathā pasaṁsanti sakāyanāni
sabbe 2 pavādā tathivā bhaveyyuṁ
suddhī hi nesaṁ paccattameva.