[626] Sīlabbataṁ vāpi pahāya sabbanti sabbā sīlasuddhiyo
Pahāya pajahitvā vinoditvā byantīkaritvā anabhāvaṅgamitvā sabbā
vattasuddhiyo pahāya pajahitvā vinoditvā byantīkaritvā anabhāvaṅgamitvā
sabbā sīlabbatasuddhiyo pahāya pajahitvā vinoditvā
byantīkaritvā anabhāvaṅgamitvāti sīlabbataṁ vāpi pahāya sabbaṁ.

[627] Kammañca sāvajjanavajjametanti sāvajjakammaṁ vuccati
kaṇhaṁ kaṇhavipākaṁ. Anavajjakammaṁ vuccati sukkaṁ sukkavipākaṁ.
Sāvajjañca kammaṁ anavajjañca kammaṁ pahāya pajahitvā vinoditvā
byantīkaritvā anabhāvaṅgamitvāti kammañca sāvajjanavajjametaṁ.

[628] Suddhiṁ asuddhinti apatthayānoti asuddhiṁ patthenti akusale
dhamme patthenti suddhiṁ patthenti pañca kāmaguṇe patthenti
asuddhiṁ patthenti akusale dhamme patthenti pañca kāmaguṇe
patthenti suddhiṁ patthenti dvāsaṭṭhīdiṭṭhigatāni patthenti asuddhiṁ
patthenti akusale dhamme patthenti pañca kāmaguṇe patthenti
dvāsaṭṭhīdiṭṭhigatāni patthenti suddhiṁ patthenti tedhātuke kusale
dhamme patthenti asuddhiṁ patthenti akusale dhamme patthenti
pañca kāmaguṇe patthenti dvāsaṭṭhīdiṭṭhigatāni patthenti tedhātuke
kusale dhamme patthenti suddhiṁ patthenti kalyāṇaputhujjanā 1
niyāmāvakkantiṁ patthenti sekkhā aggadhammaṁ arahattaṁ patthenti.
Arahattappatte arahā neva akusale dhamme pattheti napi pañca
kāmaguṇe pattheti napi dvāsaṭṭhīdiṭṭhigatāni pattheti napi tedhātuke
1 Po. Ma. puthujjanakalyāṇakā.
Kusale dhamme pattheti napi niyāmāvakkantiṁ pattheti napi aggadhammaṁ
arahattaṁ pattheti. Patthanaṁ samatikkanto arahā vuḍḍhiparihāniṁ
vītivatto. So vuṭṭhavāso ciṇṇacaraṇo .pe. Natthi tassa
punabbhavoti suddhiṁ asuddhinti apatthayāno.

[629] Virato care santimanuggahāyāti viratoti suddhiasuddhiyā
ārato virato paṭivirato nikkhanto nissaṭṭho vippamutto
visaññutto vimariyādikatena cetasā viharatīti virato. Careti careyya
vicareyya iriyeyya vatteyya pāleyya yapeyya yāpeyyāti virato
care. Santimanuggahāyāti santiyo vuccanti dvāsaṭṭhī diṭṭhigatāni
diṭṭhisantiyo aggaṇhanto aparāmasanto anabhinivisantoti virato
care santimanuggahāya. Tenāha bhagavā
sīlabbataṁ vāpi pahāya sabbaṁ
kammañca sāvajjanavajjametaṁ
suddhiṁ asuddhinti apatthayāno
virato care santimanuggahāyāti.

[630] Tamūpanissāya 1 jigucchitaṁ vā
atha vāpi diṭṭhaṁva sutaṁ mutaṁ vā
uddhaṁsarā suddhimanutthunanti
avītataṇhāse bhavābhavesu.
1 Yu. tapūpanissāya.

[631] Tamūpanissāya jigucchitaṁ vāti santeke samaṇabrāhmaṇā
tapojigucchavādā tapojigucchasārā tapojigucchaṁ nissitā sannissitā
allīnā upagatā ajjhositā adhimuttāti tamūpanissāya jigucchitaṁ vā.

[632] Athavāpi diṭṭhaṁva sutaṁ mutaṁ vāti diṭṭhaṁ vā diṭṭhasuddhiṁ
vā sutaṁ vā sutasuddhiṁ vā mutaṁ vā mutasuddhiṁ vā nissāya
upanissāya gaṇhitvā parāmasitvā abhinivisitvāti athavāpi diṭṭhaṁva
sutaṁ mutaṁ vā.

[633] Uddhaṁsarā suddhimanutthunantīti santeke samaṇabrāhmaṇā
uddhaṁsarāvādā. Katame [1]- samaṇabrāhmaṇā uddhaṁsarāvādā. Ye
te samaṇabrāhmaṇā accantasuddhikā saṁsārasuddhikā akiriyadiṭṭhikā
sassatavādā ime te samaṇabrāhmaṇā uddhaṁsarāvādā. Te
saṁsārena 2 suddhiṁ visuddhiṁ parisuddhiṁ muttiṁ vimuttiṁ parimuttiṁ anutthunanti
vadanti kathenti bhaṇanti dīpayanti voharantīti uddhaṁsarā
suddhimanutthunanti.

[634] Avītataṇhāse bhavābhavesūti taṇhāti rūpataṇhā
saddataṇhā gandhataṇhā rasataṇhā phoṭṭhabbataṇhā dhammataṇhā.
Bhavābhavesūti bhavābhave kammabhave punabbhave kāmabhave kammabhave
kāmabhave punabbhave rūpabhave kammabhave rūpabhave punabbhave arūpabhave
kammabhave arūpabhave punabbhave punappunaṁ bhave punappunaṁ gatiyā
punappunaṁ upapattiyā punappunaṁ paṭisandhiyā punappunaṁ attabhāvābhinibbattiyā.
1 Ma. Yu. te. 2 Po. Ma. saṁsāre.
Avītataṇhāseti avītataṇhā avigatataṇhā accattataṇhā
avantataṇhā amuttataṇhā appahīnataṇhā appaṭinissaṭṭhataṇhāti
avītataṇhāse bhavābhavesu. Tenāha bhagavā
tamūpanissāya jigucchitaṁ vā
athavāpi diṭṭhaṁva sutaṁ mutaṁ vā
uddhaṁsarā suddhimanutthunanti
avītataṇhāse bhavābhavesūti.

[635] Patthayamānassa hi jappitāni
saṁvedhitaṁ 1 vāpi pakappitesu
cutūpapāto idha yassa natthi
sa kena vedheyya kuhiṁ pajappe.