[636] Patthayamānassa hi jappitānīti patthanā vuccati taṇhā
yo rāgo sārāgo .pe. Abhijjhā lobho akusalamūlaṁ.
Patthayamānassāti patthayamānassa icchamānassa sādiyamānassa
pihayamānassa abhijappayamānassāti patthayamānassa hi. Jappitānīti
jappanā vuccati taṇhā yo rāgo sārāgo .pe. Abhijjhā
lobho akusalamūlanti patthayamānassa hi jappitāni.

[637] Saṁvedhitaṁ vāpi pakappitesūti pakappanāti dve pakappanā
taṇhāpakappanā ca diṭṭhipakappanā ca .pe. Ayaṁ taṇhāpakappanā
.pe. Ayaṁ diṭṭhipakappanā. Vatthuacchedasaṅkinopi vedhenti
1 pavedhitantipi pāṭho.
Acchijjantepi vedhenti acchinnepi vedhenti vatthuvipariṇāmasaṅkinopi
vedhenti vipariṇāmantepi vedhenti vipariṇatepi vedhenti pavedhenti
sampavedhentīti saṁvedhitaṁ vāpi pakappitesu.

[638] Cutūpapāto idha yassa natthīti yassāti arahato
khīṇāsavassa āgamanaṁ gamanaṁ gamanāgamanaṁ kālaṁ gati bhavābhavo cuti
ca upapatti ca nibbatti ca bhedo ca jātijarāmaraṇaṁ natthi na
santi na saṁvijjanti nupalabbhanti pahīnā samucchinnā vūpasantā
paṭippassaddhā abhabbuppattikā ñāṇagginā daḍḍhāti cutūpapāto
idha yassa natthi.

[639] Sa kena vedheyya kuhiṁ pajappeti so kena rāgena
vedheyya kena dosena vedheyya kena mohena vedheyya kena
mānena vedheyya kāya diṭṭhiyā vedheyya kena uddhaccena vedheyya
kāya vicikicchāya vedheyya kehi anusayehi vedheyya rattoti
vā duṭṭhoti vā mūḷhoti vā vinibandhoti vā parāmaṭṭhoti
vā vikkhepagatoti vā aniṭṭhaṅgatoti vā thāmagatoti vā.
Te abhisaṅkhārā pahīnā abhisaṅkhārānaṁ pahīnattā gatiyā kena
vedheyya nerayikoti vā tiracchānayonikoti vā pittivisayikoti
vā manussoti vā devoti vā rūpīti vā arūpīti vā
saññīti vā asaññīti vā nevasaññīnāsaññīti vā. So
hetu natthi paccayo natthi kāraṇaṁ natthi yena vedheyya pavedheyya
Sampavedheyyāti sa kena vedheyya. Kuhiṁ pajappeti kimhi jappeyya
pajappeyya abhijappeyyāti sa kena vedheyya kuhiṁ pajappe.
Tenāha bhagavā
patthayamānassa hi jappitāni
saṁvedhitaṁ vāpi pakappitesu
cutūpapāto idha yassa natthi
sa kena vedheyya kuhiṁ pajappeti.

[640] Yamāhu dhammaṁ paramanti eke
tameva hīnanti panāhu aññe
sacco nu vādo katamo imesaṁ
sabbeva hīme kusalāvadānā.

[641] Yamāhu dhammaṁ paramanti eketi yaṁ dhammaṁ diṭṭhiṁ paṭipadaṁ
maggaṁ eke samaṇabrāhmaṇā idaṁ paramaṁ aggaṁ seṭṭhaṁ viseṭṭhaṁ
pāmokkhaṁ uttamaṁ pavaranti evamāhaṁsu evaṁ kathenti evaṁ bhaṇanti
evaṁ dīpayanti evaṁ voharantīti yamāhu dhammaṁ paramanti eke.

[642] Tameva hīnanti panāhu aññeti tameva dhammaṁ diṭṭhiṁ
paṭipadaṁ maggaṁ eke samaṇabrāhmaṇā hīnaṁ etaṁ nihīnaṁ etaṁ
omakaṁ etaṁ lāmakaṁ etaṁ jatukkaṁ etaṁ parittakaṁ etanti
evamāhaṁsu evaṁ kathenti evaṁ bhaṇanti evaṁ dīpayanti evaṁ
voharantīti tameva hīnanti panāhu aññe.

[643] Sacco nu vādo katamo imesanti imesaṁ
samaṇabrāhmaṇānaṁ vādo katamo sacco taccho tatho bhūto yāthāvo
aviparītoti sacco nu vādo katamo imesaṁ.

[644] Sabbeva hīme kusalāvadānāti sabbeva hīme
samaṇabrāhmaṇā kusalavādā paṇḍitavādā dhīravādā ñāṇavādā
hetuvādā lakkhaṇavādā kāraṇavādā ṭhānavādā sakāya laddhiyāti
sabbeva hīme kusalāvadānā. Tenāha bhagavā
yamāhu dhammaṁ paramanti eke
tameva hīnanti panāhu aññe
sacco nu vādo katamo imesaṁ
sabbeva hīme kusalāvadānāti.

[645] Sakaṁ hi dhammaṁ paripuṇṇamāhu
aññassa dhammaṁ pana hīnamāhu
evampi viggayha vivādayanti
sakaṁ sakaṁ sammatimāhu saccaṁ.