[656] Sadhammapūjā ca panā tathevāti katamā sadhammapūjā.
Sakaṁ satthāraṁ sakkaroti garukaroti māneti pūjeti ayaṁ satthā
sabbaññūti ayaṁ sadhammapūjā. Sakaṁ dhammakkhānaṁ sakaṁ gaṇaṁ
sakaṁ diṭṭhiṁ sakaṁ paṭipadaṁ sakaṁ maggaṁ sakkaroti garukaroti māneti
pūjeti ayaṁ maggo niyyānikoti ayaṁ sadhammapūjā. Sadhammapūjā
ca panā tathevāti sadhammapūjā tathā tacchā bhūtā yāthāvā
aviparītāti sadhammapūjā ca panā tatheva.

[657] Yathā pasaṁsanti sakāyanānīti dhammo sakāyanaṁ diṭṭhi
sakāyanaṁ paṭipadā sakāyanaṁ maggo sakāyanaṁ. Sakāyanāni pasaṁsanti
thomenti kittenti vaṇṇentīti yathā pasaṁsanti sakāyanāni.

[658] Sabbe pavādā tathivā bhaveyyunti sabbe pavādā
tathā tacchā bhūtā yāthāvā aviparītā bhaveyyunti sabbe pavādā
tathivā bhaveyyuṁ.
1 Ma. saddhammapūjā. sabbattha īdisameva 2 Po. Ma. sabbeva vādā.

[659] Suddhī hi nesaṁ paccattamevāti paccattameva tesaṁ
samaṇabrāhmaṇānaṁ suddhi visuddhi parisuddhi mutti vimutti parimuttīti
suddhī hi nesaṁ paccattameva. Tenāha bhagavā
sadhammapūjā ca panā tatheva
yathā pasaṁsanti sakāyanāni
sabbe pavādā tathivā bhaveyyuṁ
suddhī hi nesaṁ paccattamevāti.

[660] Na brāhmaṇassa paraneyyamatthi
dhammesu niccheyya samuggahītaṁ
tasmā vivādāni upātivatto
na hi seṭṭhato passati dhammamaññaṁ.

[661] Na brāhmaṇassa paraneyyamatthīti nāti paṭikkhepo.
Brāhmaṇoti sattannaṁ dhammānaṁ bāhitattā brāhmaṇo .pe.
Anissito 1 tādi pavuccate sa brahmā. Na brāhmaṇassa paraneyyamatthīti
brāhmaṇassa paraneyyatā natthi brāhmaṇo na paraneyyo
na parapattiyo na parapaccayo na parapaṭibaddhagū jānāti passati
asammūḷho sampajāno paṭissato. Sabbe saṅkhārā aniccāti
brāhmaṇassa paraneyyatā natthi brāhmaṇo na paraneyyo na
parapattiyo na parapaccayo na parapaṭibaddhagū jānāti passati
asammūḷho sampajāno paṭissato. Sabbe saṅkhārā dukkhāti .pe.
1 Po. Ma. asito.
Yaṅkiñci samudayadhammaṁ sabbantaṁ nirodhadhammanti brāhmaṇassa
paraneyyatā natthi brāhmaṇo na paraneyyo na parapattiyo na
parapaccayo na parapaṭibaddhagū jānāti passati asammūḷho sampajāno
paṭissatoti na brāhmaṇassa paraneyyamatthi.

[662] Dhammesu niccheyya samuggahītanti dhammesūti dvāsaṭṭhiyā
diṭṭhigatesu. Niccheyyāti nicchinitvā vinicchinitvā
vicinitvā pavicinitvā tulayitvā tīrayitvā vibhāvayitvā vibhūtaṁ katvā
odhiggāho vilaggāho varaggāho koṭṭhāsaggāho uccayaggāho
samuccayaggāho idaṁ saccaṁ tathaṁ tacchaṁ bhūtaṁ yāthāvaṁ aviparītanti
gahitaṁ parāmaṭṭhaṁ abhiniviṭṭhaṁ ajjhositaṁ adhimuttaṁ natthi na saṁvijjati
nupalabbhati pahīnaṁ samucchinnaṁ vūpasantaṁ paṭippassaddhaṁ abhabbuppattikaṁ
ñāṇagginā daḍḍhanti dhammesu niccheyya samuggahītaṁ.

[663] Tasmā vivādāni upātivattoti tasmāti tasmā
taṁkāraṇā taṁhetu tappaccayā taṁnidānā diṭṭhikalahāni diṭṭhibhaṇḍanāni
diṭṭhiviggahāni diṭṭhivivādāni diṭṭhimedhagāni upātivatto atikkanto
samatikkanto vītivattoti tasmā vivādāni upātivatto.

[664] Na hi seṭṭhato passati dhammamaññanti aññaṁ satthāraṁ
dhammakkhānaṁ gaṇaṁ diṭṭhiṁ paṭipadaṁ maggaṁ aññatra satipaṭṭhānehi
aññatra sammappadhānehi aññatra iddhippādehi aññatra
indriyehi aññatra balehi aññatra bojjhaṅgehi aññatra
Ariyā aṭṭhaṅgikā maggā aggaṁ seṭṭhaṁ viseṭṭhaṁ pāmokkhaṁ uttamaṁ
pavaraṁ dhammaṁ na passati na dakkhati na oloketi na nijjhāyati na
upaparikkhatīti na hi seṭṭhato passati dhammamaññaṁ. Tenāha bhagavā
na brāhmaṇassa paraneyyamatthi
dhammesu niccheyya samuggahītaṁ
tasmā vivādāni upātivatto
na hi seṭṭhato passati dhammamaññanti.

[665] Jānāmi passāmi tatheva etaṁ
diṭṭhiyā eke paccenti suddhiṁ
addakkhi ce kiñhi tumassa tena
atisitvā aññena vadanti suddhiṁ.