[546] Tamāhu aññepi tucchaṁ musātīti tameva dhammaṁ diṭṭhiṁ
paṭipadaṁ maggaṁ eke samaṇabrāhmaṇā etaṁ tucchaṁ etaṁ musā
etaṁ abhūtaṁ etaṁ alikaṁ etaṁ ayāthāvanti evamāhaṁsu evaṁ kathenti
evaṁ bhaṇanti evaṁ dīpayanti evaṁ voharantīti tamāhu aññepi
tucchaṁ musāti.

[547] Evampi viggayha vivādayantīti evaṁ gahetvā uggahetvā
gaṇhitvā parāmasitvā abhinivisitvā vivādayanti kalahaṁ karonti
bhaṇḍanaṁ karonti viggahaṁ karonti vivādaṁ karonti medhagaṁ karonti
na tvaṁ imaṁ dhammavinayaṁ ājānāsi .pe. Nibbedhehi vā sace
pahosīti evampi viggayha vivādayanti.

[548] Kasmā na ekaṁ samaṇā vadantīti kasmāti kasmā
kiṁkāraṇā kiṁhetu kiṁpaccayā kiṁnidānā kiṁsamudayā kiṁjātikā kiṁpabhavā
na ekaṁ vadanti nānā vadanti vividhaṁ vadanti aññoññaṁ vadanti
puthu vadanti kathenti bhaṇanti dīpayanti voharantīti kasmā na
ekaṁ samaṇā vadanti. Tenāha so nimmito
yamāhu saccaṁ tathivanti eke
tamāhu aññepi tucchaṁ musāti
evampi viggayha vivādayanti
kasmā na ekaṁ samaṇā vadantīti.

[549] Ekaṁ hi saccaṁ na dutīyamatthi
yasmiṁ pajā no vivade pajānaṁ
nānā te saccāni sayaṁ thunanti
tasmā na ekaṁ samaṇā vadanti.

[550] Ekaṁ hi saccaṁ na dutīyamatthīti ekaṁ saccaṁ vuccati
dukkhanirodho nibbānaṁ yo so sabbasaṅkhārasamatho sabbūpadhipaṭinissaggo
taṇhakkhayo virāgo nirodho nibbānaṁ. Athavā ekaṁ saccaṁ
vuccati maggasaccaṁ niyyānasaccaṁ dukkhanirodhagāminī paṭipadā ariyo
aṭṭhaṅgiko maggo seyyathīdaṁ sammādiṭṭhi sammāsaṅkappo
sammāvācā sammākammanto sammāājīvo sammāvāyāmo
sammāsati sammāsamādhīti ekaṁ hi saccaṁ na dutīyamatthi.

[551] Yasmiṁ pajā no vivade pajānanti yasminti yamhi sacce.
Pajāti sattādhivacanaṁ. Pajā yaṁ saccaṁ pajānantā ājānantā
vijānantā paṭivijānantā paṭivijjhantā na kalahaṁ kareyya 1 na bhaṇḍanaṁ
kareyya na viggahaṁ kareyya na vivādaṁ kareyya na medhagaṁ kareyya
kalahaṁ bhaṇḍanaṁ viggahaṁ vivādaṁ medhagaṁ pajaheyya vinodeyya byantīkareyya
anabhāvaṅgameyyāti yasmiṁ pajā no vivade pajānaṁ.

[552] Nānā te saccāni sayaṁ thunantīti nānā te saccāni
sayaṁ thunanti vadanti kathenti bhaṇanti dīpayanti voharanti sassato
loko idameva saccaṁ moghamaññanti sayaṁ thunanti vadanti kathenti
bhaṇanti dīpayanti voharanti asassato loko .pe. Neva hoti
na na hoti tathāgato parammaraṇā idameva saccaṁ moghamaññanti
sayaṁ thunanti vadanti kathenti bhaṇanti dīpayanti voharantīti nānā
te saccāni sayaṁ thunanti.

[553] Tasmā na ekaṁ samaṇā vadantīti tasmāti tasmā
taṁkāraṇā taṁhetu tappaccayā taṁnidānā na ekaṁ vadanti nānā
vadanti vividhaṁ vadanti aññoññaṁ vadanti puthu vadanti kathenti
bhaṇanti dīpayanti voharantīti tasmā na ekaṁ samaṇā vadanti.
Tenāha bhagavā
ekaṁ hi saccaṁ na dutīyamatthi
yasmiṁ pajā no vivade pajānaṁ
1 Ma. kareyayuṁ .. anabhāvaṅgameyyuṁ.
Nānā te saccāni sayaṁ thunanti
tasmā na ekaṁ samaṇā vadantīti.

[554] Kasmā nu saccāni vadanti nānā
pavādiyāse kusalāvadānā
saccāni suttāni bahūni nānā
udāhu te takkamanussaranti.

[555] Kasmā nu saccāni vadanti nānāti kasmāti kasmā
kiṁkāraṇā kiṁhetu kiṁpaccayā kiṁnidānā saccāni nānā vadanti vividhāni
vadanti aññoññāni vadanti puthūni vadanti kathenti bhaṇanti
dīpayanti voharantīti kasmā nu saccāni vadanti nānā.