[556] Pavādiyāse kusalāvadānāti pavādiyāseti vippavadantītipi
pavādiyāse. Athavā sakaṁ sakaṁ diṭṭhigataṁ pavadanti
kathenti bhaṇanti dīpayanti voharanti sassato loko idameva
saccaṁ moghamaññanti pavadanti kathenti bhaṇanti dīpayanti voharanti
asassato loko .pe. Neva hoti na na hoti tathāgato
parammaraṇā idameva saccaṁ moghamaññanti pavadanti kathenti bhaṇanti
dīpayanti voharanti. Kusalāvadānāti kusalavādā paṇḍitavādā
dhīravādā ñāṇavādā hetuvādā lakkhaṇavādā kāraṇavādā ṭhānavādā
sakāya laddhiyāti pavādiyāse kusalāvadānā.

[557] Saccāni suttāni bahūni nānāti saccāni sutāni bahūni
Nānāni vividhāni aññoññāni puthūnīti saccāni suttāni bahūni
nānā.

[558] Udāhu te takkamanussarantīti udāhu takkena vitakkena
saṅkappena yāyanti niyyanti vuyhanti saṁhariyantīti evampi udāhu
te takkamanussaranti. Athavā takkapariyāhaṭaṁ vīmaṁsānucaritaṁ sayaṁ
paṭibhāṇaṁ vadanti kathenti bhaṇanti dīpayanti voharantīti evampi
udāhu te takkamanussaranti. Tenāha so nimmito
kasmā nu saccāni vadanti nānā
pavādiyāse kusalāvadānā
saccāni suttāni bahūni nānā
udāhu te takkamanussarantīti.

[559] Naheva saccāni bahūni nānā
aññatra saññāya niccāni loke
takkañca diṭṭhīsu pakappayitvā
saccaṁ musātī dvayadhammamāhu.

[560] Naheva saccāni bahūni nānāti naheva saccāni bahukāni
nānāni vividhāni aññoññāni puthūnīti naheva saccāni bahūni nānā.

[561] Aññatra saññāya niccāni loketi aññatra saññāya
niccaggāhā ekaññeva saccaṁ loke kathiyati bhaṇiyati dīpiyati
vohariyati dukkhanirodho nibbānaṁ yo so sabbasaṅkhārasamatho
Sabbūpadhipaṭinissaggo taṇhakkhayo virāgo nirodho nibbānaṁ.
Athavā ekaṁ saccaṁ vuccati maggasaccaṁ niyyānasaccaṁ dukkhanirodhagāminī
paṭipadā ariyo aṭṭhaṅgiko maggo seyyathīdaṁ sammādiṭṭhi .pe.
Sammāsamādhīti aññatra saññāya niccāni loke.

[562] Takkañca diṭṭhīsu pakappayitvā saccaṁ musātī
dvayadhammamāhūti takkaṁ vitakkaṁ saṅkappaṁ takkayitvā vitakkayitvā
saṅkappayitvā diṭṭhigatāni janenti sañjanenti nibbattenti
abhinibbattenti diṭṭhigatāni janetvā sañjanetvā nibbattetvā
abhinibbattetvā mayhaṁ saccaṁ tuyhaṁ musāti evamāhaṁsu evaṁ kathenti
evaṁ bhaṇanti evaṁ dīpayanti evaṁ voharantīti takkañca diṭṭhīsu
pakappayitvā saccaṁ musātī dvayadhammamāhu. Tenāha bhagavā
naheva saccāni bahūni nānā
aññatra saññāya niccāni loke
takkañca diṭṭhīsu pakappayitvā
saccaṁ musātī dvayadhammamāhūti.

[563] Diṭṭhe sute sīlavate mute vā
ete ca nissāya vimānadassī
vinicchaye ṭhatvā pahassamāno 1
bālo paro akusaloti cāha.
1 Sī. sahassamāno.

[564] Diṭṭhe sute sīlavate mute vā ete ca nissāya
vimānadassīti diṭṭhaṁ vā diṭṭhasuddhiṁ 1 vā sutaṁ vā sutasuddhiṁ vā sīlaṁ
vā sīlasuddhiṁ vā vattaṁ vā vattasuddhiṁ vā mutaṁ vā mutasuddhiṁ vā
nissāya upanissāya gaṇhitvā parāmasitvā abhinivisitvāti diṭṭhe
sute sīlavate mute vā. Ete ca nissāya vimānadassīti na
sammānetītipi vimānadassī. Athavā domanassaṁ janetītipi
vimānadassīti diṭṭhe sute sīlavate mute vā ete ca nissāya
vimānadassī.

[565] Vinicchaye ṭhatvā pahassamānoti vinicchayā vuccanti
dvāsaṭṭhī diṭṭhigatāni vinicchitadiṭṭhiyā 2 ṭhatvā patiṭṭhahitvā
gaṇhitvā parāmasitvā abhinivisitvāti vinicchaye ṭhatvā.
Pahassamānoti tuṭṭho hoti haṭṭho pahaṭṭho attamano
paripuṇṇasaṅkappo. Athavā dantavidaṁsakaṁ hassamānoti vinicchaye
ṭhatvā pahassamāno.