[526] Bālo paro akusaloti cāhūti paro bālo hīno
nihīno omako lāmako jatukko paritto akusalo aviddhā avijjāgato
añāṇī avibhāvī duppaññoti evamāhaṁsu evaṁ kathenti evaṁ
bhaṇanti evaṁ dīpayanti evaṁ voharantīti bālo paro akusaloti cāhu.

[527] Sacco nu vādo katamo imesanti imesaṁ samaṇabrāhmaṇānaṁ
vādo katamo sacco taccho tatho bhūto yāthāvo aviparītoti
sacco nu vādo katamo imesaṁ.

[528] Sabbeva hīme kusalāvadānāti sabbevime samaṇabrāhmaṇā
kusalavādā paṇḍitavādā dhīravādā ñāṇavādā hetuvādā
lakkhaṇavādā kāraṇavādā ṭhānavādā sakāya laddhiyāti sabbeva
hīme kusalāvadānā. Tenāha so nimmito
evampi viggayha vivādayanti
bālo paro akusaloti cāhu
sacco nu vādo katamo imesaṁ
sabbeva hīme kusalāvadānāti.

[529] Parassa ve 1 dhammamanānujānaṁ
bālomako hoti nihīnapañño
1 Po. Ma. ce.
Sabbeva bālā sunihīnapaññā
sabbevime diṭṭhiparibbasānā.

[530] Parassa ve dhammamanānujānanti parassa dhammaṁ diṭṭhiṁ
paṭipadaṁ maggaṁ anānujānanto anānupassanto anānumaññanto
anānumodantoti parassa ve dhammamanānujānaṁ.

[531] Bālomako hoti nihīnapaññoti paro bālo hoti
hīno nihīno omako lāmako jatukko paritto hīnapañño
nihīnapañño omakapañño lāmakapañño jatukkapañño parittapaññoti
bālomako hoti nihīnapañño.

[532] Sabbeva bālā sunihīnapaññāti sabbevime samaṇabrāhmaṇā
bālā hīnā nihīnā omakā lāmakā jatukkā parittā sabbeva
hīnapaññā nihīnapaññā omakapaññā lāmakapaññā jatukkapaññā
parittapaññāti sabbeva bālā sunihīnapaññā.

[533] Sabbevime diṭṭhiparibbasānāti sabbevime samaṇabrāhmaṇā
diṭṭhigatikā te dvāsaṭṭhiyā diṭṭhigatānaṁ aññataraññataraṁ diṭṭhigataṁ
gahetvā uggahetvā gaṇhitvā parāmasitvā abhinivisitvā sakāya
sakāya diṭṭhiyā vasanti saṁvasanti āvasanti parivasanti. Yathā
āgārikā vā gharesu vasanti sāpattikā vā āpattīsu vasanti
sakilesā vā kilesesu vasanti evameva sabbevime samaṇabrāhmaṇā
diṭṭhigatikā te dvāsaṭṭhiyā diṭṭhigatānaṁ aññataraññataraṁ diṭṭhigataṁ
Gahetvā uggahetvā gaṇhitvā parāmasitvā abhinivisitvā sakāya
sakāya diṭṭhiyā vasanti saṁvasanti āvasanti parivasantīti sabbevime
diṭṭhiparibbasānā. Tenāha bhagavā
parassa ve dhammamanānujānaṁ
bālomako hoti nihīnapañño
sabbeva bālā sunihīnapaññā
sabbevime diṭṭhiparibbasānāti.

[534] Sandiṭṭhiyā ce pana vīvadātā 1
saṁsuddhapaññā kusalā matīmā 2
na tesaṁ koci parihīnapañño
diṭṭhī hi tesaṁpi tathā samattā.

[535] Sandiṭṭhiyā ce pana vīvadātāti sakāya diṭṭhiyā sakāya
khantiyā sakāya ruciyā sakāya laddhiyā vīvadātā 3 pariyodātā 4
asaṅkiliṭṭhāti sandiṭṭhiyā ce pana vīvadātā.