[506] Yantaṁ apucchimha akittayī no
aññantaṁ pucchāma tadiṅgha brūhi
1 Po. Yu. itisaddo atthi.
Ettāvataggaṁ no 1 vadanti heke
yakkhassa suddhiṁ idha paṇḍitāse
udāhu aññaṁpi vadanti etto.

[507] Yantaṁ apucchimha akittayī noti yantaṁ apucchimha
ayācimha ajjhesimha pasādayimha. Akittayī noti kittitaṁ pakittitaṁ
ācikkhitaṁ desitaṁ paññāpitaṁ paṭṭhapitaṁ vivaṭaṁ vibhattaṁ uttānīkataṁ
pakāsitanti yantaṁ apucchimha akittayī no.

[508] Aññantaṁ pucchāma tadiṅgha brūhīti aññantaṁ pucchāma
aññantaṁ yācāma aññantaṁ ajjhesāma aññantaṁ pasādema
uttariṁ taṁ pucchāma. Tadiṅgha brūhīti iṅgha brūhi ācikkha
desehi paññāpehi paṭṭhapehi vivara vibhaja uttānīkarohi pakāsehīti
aññantaṁ pucchāma tadiṅgha brūhi.

[509] Ettāvataggaṁ no vadanti heke yakkhassa suddhiṁ idha
paṇḍitāseti eke samaṇabrāhmaṇā ettāvatā 2 arūpasamāpattiyā
aggaṁ seṭṭhaṁ viseṭṭhaṁ pāmokkhaṁ uttamaṁ pavaraṁ vadanti kathenti
bhaṇanti dīpayanti voharanti. Yakkhassāti sattassa narassa mānavassa
posassa puggalassa jīvassa jātussa jantussa indagussa manujassa.
Suddhinti suddhiṁ visuddhiṁ parisuddhiṁ muttiṁ vimuttiṁ parimuttiṁ. Idha
paṇḍitāseti idha paṇḍitavādā dhīravādā ñāṇavādā hetuvādā
lakkhaṇavādā kāraṇavādā ṭhānavādā sakāya laddhiyāti ettāvataggaṁ
1 Ma. na. 2 Po. Ma. etā arūpasamāpattiyo.
No vadanti heke yakkhassa suddhiṁ idha paṇḍitāse.

[510] Udāhu aññaṁpi vadanti ettoti udāhu eke samaṇabrāhmaṇā
etā arūpasamāpattiyo atikkamitvā samatikkamitvā
vītivattitvā etto arūpato aññaṁ uttariṁ yakkhassa suddhiṁ visuddhiṁ
parisuddhiṁ muttiṁ vimuttiṁ parimuttiṁ vadanti kathenti bhaṇanti dīpayanti
voharantīti udāhu aññaṁpi vadanti etto. Tenāha so nimmito
yantaṁ apucchimha akittayī no
aññantaṁ pucchāma tadiṅgha brūhi
ettāvataggaṁ no vadanti heke
yakkhassa suddhiṁ idha paṇḍitāse
udāhu aññaṁpi vadanti ettoti.

[511] Ettāvataggaṁpi vadanti heke
yakkhassa suddhiṁ idha paṇḍitāse
tesaṁ puneke samayaṁ vadanti
anupādisese kusalāvadānā.

[512] Ettāvataggaṁpi vadanti heke yakkhassa suddhiṁ idha
paṇḍitāseti santeke samaṇabrāhmaṇā sassatavādā ettāvatā
arūpasamāpattiyā aggaṁ seṭṭhaṁ viseṭṭhaṁ pāmokkhaṁ uttamaṁ pavaraṁ
vadanti kathenti bhaṇanti dīpayanti voharanti. Yakkhassāti sattassa
narassa mānavassa posassa puggalassa jīvassa jātussa jantussa
Indagussa manujassa. Suddhinti suddhiṁ visuddhiṁ parisuddhiṁ muttiṁ vimuttiṁ
parimuttiṁ. Idha paṇḍitāseti idha paṇḍitavādā dhīravādā
ñāṇavādā hetuvādā lakkhaṇavādā kāraṇavādā ṭhānavādā sakāya
laddhiyāti ettāvataggaṁpi vadanti heke yakkhassa suddhiṁ idha
paṇḍitāse.

[513] Tesaṁ puneke samayaṁ vadanti anupādisese kusalāvadānāti
tesaṁyeva samaṇabrāhmaṇānaṁ eke samaṇabrāhmaṇā ucchedavādā
bhavatajjitā vibhavaṁ abhinandanti te sattassa samaṁ upasamaṁ vūpasamaṁ
nirodhaṁ paṭippassaddhaṁ vadanti yato kira bho ayaṁ attā kāyassa
bhedā ucchijjati vinassati na hoti parammaraṇā ettāvatā
anupādisesoti. Kusalāvadānāti kusalavādā paṇḍitavādā dhīravādā
ñāṇavādā hetuvādā lakkhaṇavādā kāraṇavādā ṭhānavādā sakāya
laddhiyāti tesaṁ puneke samayaṁ vadanti anupādisese kusalāvadānā.
Tenāha bhagavā
ettāvataggaṁpi vadanti heke
yakkhassa suddhiṁ idha paṇḍitāse
tesaṁ puneke samayaṁ vadanti
anupādisese kusalāvadānāti.

[514] Ete ca ñatvā upanissitāti
ñatvā munī nissaye so vimaṁsī
Ñatvā vimutto na vivādameti
bhavābhavāya na sameti dhīro.

[515] Ete ca ñatvā upanissitāti eteti diṭṭhigatike.
Upanissitāti sassatadiṭṭhinissitāti ñatvā ucchedadiṭṭhinissitāti
ñatvā sassatucchedadiṭṭhinissitāti ñatvā jānitvā tulayitvā
tīrayitvā vibhāvayitvā vibhūtaṁ katvāti ete ca ñatvā upanissitāti.