[496] Kathaṁsametassa vibhoti rūpaṁ
sukhaṁ dukkhaṁ vāpi kathaṁ vibhoti
etamme pabrūhi yathā vibhoti
taṁ jāniyāma iti me mano ahu.

[497] Kathaṁsametassa vibhoti rūpanti kathaṁsametassa kathaṁpaṭipannassa
kathaṁiriyantassa kathaṁpavattentassa kathaṁpālentassa kathaṁyapentassa
kathaṁyāpentassa rūpaṁ vibhoti vibhāviyyati atikkamiyyati samatikkamiyyati
vītivattiyyatīti kathaṁsametassa vibhoti rūpaṁ.

[498] Sukhaṁ dukkhaṁ vāpi kathaṁ vibhotīti sukhañca dukkhañca kathaṁ
vibhoti vibhāviyyati atikkamiyyati samatakkamiyyati vītivattiyyatīti sukhaṁ
dukkhaṁ vāpi kathaṁ vibhoti.

[499] Etamme pabrūhi yathā vibhotīti etanti yaṁ pucchāmi
yaṁ yācāmi yaṁ ajjhesāmi yaṁ pasādemīti etaṁ. Me pabrūhīti me
brūhi 1 ācikkha desehi paññāpehi paṭṭhapehi vivara vibhaja uttānīkarohi
pakāsehīti etamme pabrūhi. Yathā vibhotīti yathā vibhoti
vibhāviyyati atikkamiyyati samatikkamiyyati vītivattiyyatīti etamme
pabrūhi yathā vibhoti.

[500] Taṁ jāniyāma iti me mano ahūti taṁ jāniyāmāti
taṁ jāneyyāma ājāneyyāma vijāneyyāma paṭivijāneyyāma
paṭivijjheyyāmāti taṁ jāniyāma. Iti me mano ahūti [2]- iti me cittaṁ
1 Ma. pabrūhi. 2 Ma. iti me mano ahu.
Ahu iti me saṅkappo ahu iti me viññāṇaṁ ahūti taṁ
jāniyāma iti me mano ahu. Tenāha so nimmito
kathaṁsametassa vibhoti rūpaṁ
sukhaṁ dukkhaṁ vāpi kathaṁ vibhoti
etamme pabrūhi yathā vibhoti
taṁ jāniyāma iti me mano ahūti.

[501] Na saññasaññī na visaññasaññī
nopi asaññī na vibhūtasaññī
evaṁsametassa vibhoti rūpaṁ
saññānidānā hi papañcasaṅkhā.

[502] Na saññasaññī na visaññasaññīti saññasaññino
vuccanti ye pakatisaññāya ṭhitā napi so pakatisaññāya ṭhito.
Visaññasaññino vuccanti ummattakā ye ca ukkhittacittā 1 napi
so ummattako nopi khittacittoti na saññasaññī na visaññasaññī.

[503] Nopi asaññī na vibhūtasaññīti asaññino vuccanti
nirodhasamāpannā ye ca asaññasattā napi so nirodhasamāpanno
nopi asaññasatto. Vibhūtasaññino vuccanti ye catunnaṁ arūpasamāpattīnaṁ
lābhino napi so catunnaṁ arūpasamāpattīnaṁ lābhīti
nopi asaññī na vibhūtasaññī.
1 Ma. khittacittā.

[504] Evaṁsametassa vibhoti rūpanti idha bhikkhu sukhassa ca
pahānā .pe. Catutthaṁ jhānaṁ upasampajja viharati so evaṁ
samāhite citte parisuddhe pariyodāte anaṅgaṇe vigatūpakkilese
mudubhūte kammanīye ṭhite āneñjappatte ākāsānañcāyatana-
samāpattipaṭilābhatthāya cittaṁ abhinīharati abhininnāmeti arūpamaggasamaṅgīti
evaṁsametassa 1 evaṁpaṭipannassa evaṁiriyantassa evaṁvattentassa
evaṁpālentassa evaṁyapentassa evaṁyāpentassa rūpaṁ vibhoti
vibhāviyyati atikkamiyyati samatikkamiyyati vītivattiyyatīti
evaṁsametassa vibhoti rūpaṁ.

[505] Saññānidānā hi papañcasaṅkhāti papañcāyeva
papañcasaṅkhā taṇhāpapañcasaṅkhā diṭṭhipapañcasaṅkhā mānapapañcasaṅkhā
saññānidānā saññāsamudayā saññājātikā saññāpabhavāti
saññānidānā hi papañcasaṅkhā. Tenāha bhagavā
na saññasaññī na visaññasaññī
nopi asaññī na vibhūtasaññī
evaṁsametassa vibhoti rūpaṁ
saññānidānā hi papañcasaṅkhāti.