[347] Diṭṭhīsu nissāya anupucchamānoti māgandiyo brāhmaṇo
diṭṭhiṁ nissāya diṭṭhiṁ pucchati lagganaṁ nissāya lagganaṁ pucchati
1 Ma. diṭṭhiñca.
Bandhanaṁ nissāya bandhanaṁ pucchati palibodhaṁ nissāya palibodhaṁ
pucchati. Anupucchamānoti punappunaṁ pucchatīti diṭṭhīsu nissāya
anupucchamāno. Māgandiyāti bhagavā taṁ brāhmaṇaṁ nāmena
ālapati. Bhagavāti gāravādhivacanaṁ .pe. Sacchikā paññatti
yadidaṁ bhagavāti māgandiyāti bhagavā.

[348] Samuggahītesu pamohamāgāti yā diṭṭhi tayā gahitā
parāmaṭṭhā abhiniviṭṭhā ajjhositā adhimuttā tāyeva tvaṁ diṭṭhiyā
mūḷhosi pamūḷho sammūḷho mohaṁ āgatosi pamohaṁ āgatosi
sammohaṁ āgatosi andhakāraṁ pakkhantosīti samuggahītesu
pamohamāgā.

[349] Ito ca nāddakkhi aṇumpi saññanti ito ajjhattasantito
vā paṭipattito 1 vā dhammadesanato vā yuttasaññaṁ vā 2
pattasaññaṁ vā lakkhaṇasaññaṁ vā kāraṇasaññaṁ vā ṭhānasaññaṁ
vā na paṭilabhasi 3 kuto ñāṇanti evampi ito ca nāddakkhi
aṇumpi saññaṁ. Athavā aniccaṁ vā aniccasaññānulomaṁ vā
dukkhaṁ vā dukkhasaññānulomaṁ vā anattaṁ vā anattasaññānulomaṁ
vā saññuppādamattaṁ vā saññānimittaṁ vā na paṭilabhasi 4 kuto
ñāṇanti evampi ito ca nāddakkhi aṇumpi saññaṁ.

[350] Tasmā tuvaṁ momuhato dahāsīti tasmāti tasmā
taṁkāraṇā taṁhetu tappaccayā taṁnidānā momūhadhammato bāladhammato
1 Ma. paṭipadāto. 2 Ma. yuttasaññaṁ ... ṭhānasaññanti imesu pāṭhesu vāsaddo
natthi. 3-4 Ma. paṭilabhati.
Mūḷhadhammato añāṇadhammato amarāvikkhepadhammato dahāsi passasi
dakkhasi olokesi nijjhāyasi upaparikkhasīti tasmā tuvaṁ momuhato
dahāsi. Tenāha bhagavā
diṭṭhīsu nissāya anupucchamāno (māgandiyāti bhagavā)
samuggahītesu pamohamāgā
ito ca nāddakkhi aṇumpi saññaṁ
tasmā tuvaṁ momuhato dahāsīti.

[351] Samo visesī uda vā nihīno
yo maññatī so vivadetha tena
tīsu vidhāsu avikampamāno
samo visesīti na tassa hoti.

[352] Samo visesī uda vā nihīno yo maññatī so
vivadetha tenāti sadisohamasmīti vā seyyohamasmīti vā
hīnohamasmīti 1 vā yo maññati so tena mānena tāya diṭṭhiyā tena
vā puggalena kalahaṁ kareyya bhaṇḍanaṁ kareyya viggahaṁ kareyya
vivādaṁ kareyya medhagaṁ kareyya na tvaṁ imaṁ dhammavinayaṁ ājānāsi
ahaṁ imaṁ dhammavinayaṁ ājānāmi kiṁ tvaṁ imaṁ dhammavinayaṁ
ājānissasi micchāpaṭipanno tvamasi ahamasmi sammāpaṭipanno
sahitamme asahitante pure vacanīyaṁ pacchā avaca pacchā vacanīyaṁ
pure avaca adhiciṇṇante viparāvattaṁ āropito te vādo
1 Po. Yu. nihīno ...
Niggahitosi 1 cara vādappamokkhāya nibbedhehi vā sace pahosīti
samo visesī uda vā nihīno yo maññatī so vivadetha tena.

[353] Tīsu vidhāsu avikampamāno samo visesīti na tassa
hotīti yassetā tisso vidhā pahīnā samucchinnā vūpasantā
paṭippassaddhā abhabbuppattikā ñāṇagginā daḍḍhā so tīsu
vidhāsu na kampati na vikampati avikampamānassa puggalassa
sadisohamasmīti vā seyyohamasmīti vā hīnohamasmīti vā. Na tassa
hotīti na mayhaṁ hotīti 2 tīsu vidhāsu avikampamāno samo visesīti na
tassa hoti. Tenāha bhagavā
samo visesī uda vā nihīno
yo maññatī so vivadetha tena
tīsu vidhāsu avikampamāno
samo visesīti na tassa hotīti.

[354] Saccanti so brāhmaṇo kiṁ vadeyya
musāti vā so vivadetha kena
yasmiṁ samaṁ visamaṁ vāpi natthi
sa kena vādaṁ paṭisaññujeyya.

[355] Saccanti so brāhmaṇo kiṁ vadeyyāti brāhmaṇoti
sattannaṁ dhammānaṁ bāhitattā brāhmaṇo .pe. Anissito tādi
pavuccate sa brahmāti saccanti so brāhmaṇo. Kiṁ vadeyyāti
1 Ma. Yu. niggahito tvamasi. 2. Ma. itisaddo natthi.
Sassato loko idameva saccaṁ moghamaññanti brāhmaṇo kiṁ
vadeyya kiṁ katheyya kiṁ bhaṇeyya kiṁ dīpayeyya kiṁ vohareyya.
Asassato loko .pe. Neva hoti na na hoti tathāgato
parammaraṇā idameva saccaṁ moghamaññanti brāhmaṇo kiṁ vadeyya
kiṁ katheyya kiṁ bhaṇeyya kiṁ dīpayeyya kiṁ vohareyyāti saccanti
so brāhmaṇo kiṁ vadeyya.

[356] Musāti vā so vivadetha kenāti brāhmaṇo mayhaṁva
saccaṁ tuyhaṁ musāti kena mānena kāya diṭṭhiyā kena vā puggalena
kalahaṁ kareyya bhaṇḍanaṁ kareyya viggahaṁ kareyya vivādaṁ kareyya
medhagaṁ kareyya na tvaṁ imaṁ dhammavinayaṁ ājānāsi .pe. Nibbedhehi
vā sace pahosīti musāti vā so vivadetha kena.