[337] Adiṭṭhiyā assutiyā añāṇā asīlatā abbatā nopi
tenāti diṭṭhipi icchitabbā dasavatthukā sammādiṭṭhi atthi
dinnaṁ atthi yiṭṭhaṁ atthi hutaṁ atthi sukatadukkaṭānaṁ kammānaṁ
phalaṁ vipāko atthi ayaṁ loko atthi paro loko atthi
mātā atthi pitā atthi sattā opapātikā atthi loke
samaṇabrāhmaṇā sammaggatā sammāpaṭipannā ye imañca lokaṁ
parañca lokaṁ sayaṁ abhiññā sacchikatvā pavedentīti. Savanampi
icchitabbaṁ parato ghoso suttaṁ geyyaṁ veyyākaraṇaṁ gāthā
udānaṁ itivuttakaṁ jātakaṁ abbhūtadhammaṁ vedallaṁ. Ñāṇampi
icchitabbaṁ kammassakatañāṇaṁ saccānulomikañāṇaṁ abhiññāñāṇaṁ
samāpattiñāṇaṁ. Sīlampi icchitabbaṁ pāṭimokkhasaṁvaro. Vattampi
icchitabbaṁ aṭṭha dhutaṅgāni āraññikaṅgaṁ piṇḍapātikaṅgaṁ
paṁsukūlikaṅgaṁ tecīvarikaṅgaṁ sapadānacārikaṅgaṁ khalupacchābhattikaṅgaṁ nesajjikaṅgaṁ
yathāsanthatikaṅgaṁ. Adiṭṭhiyā assutiyā añāṇā asīlatā abbatā
Nopi tenāti napi sammādiṭṭhimattena napi savanamattena napi ñāṇamattena
napi sīlamattena napi vattamattena ajjhattasantippatto
hoti napi vinā etehi dhammehi ajjhattasantiṁ pāpuṇāti apica
sambhārā ime dhammā honti ajjhattasantiṁ pāpuṇituṁ adhigantuṁ phusituṁ
sacchikātunti adiṭṭhiyā assutiyā añāṇā asīlatā abbatā
nopi tena.

[338] Ete ca nissajja anuggahāyāti etehi 1 kaṇhapakkhikānaṁ
dhammānaṁ samugghātato pahānaṁ icchitabbaṁ. Tedhātukesu kusalesu
dhammesu atammayatā icchitabbā. Yato kaṇhapakkhikā dhammā
samugghātappahānena pahīnā honti ucchinnamūlā tālāvatthukatā
anabhāvaṅgatā āyatiṁ anuppādadhammā tedhātukesu ca kusalesu dhammesu
atammayatā hoti ettāvatāpi na gaṇhāti na parāmasati nābhinivisati
athavā na gaṇhitabbā na parāmasitabbā nābhinivisitabbāti
evampi ete ca nissajja anuggahāya. Yato taṇhā ca diṭṭhi ca
māno ca pahīnā honti ucchinnamūlā tālāvatthukatā anabhāvaṅgatā
āyatiṁ anuppādadhammā ettāvatāpi na gaṇhāti na parāmasati
nābhinivisatīti evampi ete ca nissajja anuggahāya. Yato
puññābhisaṅkhāro ca apuññābhisaṅkhāro ca āneñjābhisaṅkhāro ca
pahīnā honti ucchinnamūlā tālāvatthukatā anabhāvaṅgatā āyatiṁ
anuppādadhammā ettāvatāpi na gaṇhāti na parāmasati nābhinivisatīti
1 Ma. eteti.
Evampi ete ca nissajja anuggahāya.

[339] Santo anissāya bhavaṁ na jappeti santoti rāgassa
santattā 1 santo dosassa santattā 1 santo mohassa santattā 1
santo kodhassa upanāhassa makkhassa paḷāsassa issāya
macchariyassa māyāya sāṭheyyassa thambhassa sārambhassa
mānassa atimānassa madassa pamādassa sabbakilesānaṁ
sabbaduccaritānaṁ sabbadarathānaṁ sabbapariḷāhānaṁ sabbasantāpānaṁ
sabbākusalābhisaṅkhārānaṁ santattā samitattā vūpasamitattā vijjhātattā
nibbutattā vigatattā paṭippassaddhattā santo [2]- vūpasanto
nibbuto paṭippassaddhoti santo. Anissāyāti dve nissayā
taṇhānissayo ca diṭṭhinissayo ca .pe. Ayaṁ taṇhānissayo .pe.
Ayaṁ diṭṭhinissayo. Taṇhānissayaṁ pahāya diṭṭhinissayaṁ
paṭinissajjitvā cakkhuṁ anissāya sotaṁ anissāya ghānaṁ anissāya
jivhaṁ anissāya kāyaṁ anissāya manaṁ anissāya rūpe sadde
gandhe rase phoṭṭhabbe kulaṁ gaṇaṁ āvāsaṁ lābhaṁ yasaṁ pasaṁsaṁ
sukhaṁ cīvaraṁ piṇḍapātaṁ senāsanaṁ gilānapaccayabhesajjaparikkhāraṁ kāmadhātuṁ
rūpadhātuṁ arūpadhātuṁ kāmabhavaṁ rūpabhavaṁ arūpabhavaṁ saññābhavaṁ
asaññābhavaṁ nevasaññānāsaññābhavaṁ ekavokārabhavaṁ catuvokārabhavaṁ
pañcavokārabhavaṁ atītaṁ anāgataṁ paccuppannaṁ diṭṭhasutamutaviññātabbe
dhamme anissāya aggaṇhitvā aparāmasitvā anabhinivisitvāti
1 Ma. samitattā. 2 Po. Ma. upasanto.
Santo anissāya. Bhavaṁ na jappeti kāmabhavaṁ na jappeyya rūpabhavaṁ
na jappeyya arūpabhavaṁ na jappeyya na pajappeyya na abhijappeyyāti
santo anissāya bhavaṁ na jappe. Tenāha bhagavā
na diṭṭhiyā na sutiyā na ñāṇena (māgandiyāti bhagavā)
sīlabbatenāpi na suddhimāha
adiṭṭhiyā assutiyā añāṇā
asīlatā abbatā nopi tena
ete ca nissāya anuggahāya
santo anissāya bhavaṁ na jappeti.

[340] No ce kira diṭṭhiyā na sutiyā na ñāṇena (iti māgandiyo)
sīlabbatenāpi na suddhimāha
adiṭṭhiyā assutiyā añāṇā
asīlatā abbatā nopi tena
maññāmahaṁ momuhameva dhammaṁ
diṭṭhiyā eke paccenti suddhiṁ.

[341] No ce kira diṭṭhiyā na sutiyā na ñāṇenāti
diṭṭhiyāpi suddhiṁ visuddhiṁ parisuddhiṁ muttiṁ vimuttiṁ parimuttiṁ nāha
na kathesi na bhaṇasi na dīpayasi na voharasi. Sutenapi suddhiṁ
visuddhiṁ parisuddhiṁ muttiṁ vimuttiṁ parimuttiṁ nāha na kathesi na
bhaṇasi na dīpayasi na voharasi. Diṭṭhasutenapi suddhiṁ visuddhiṁ
Parisuddhiṁ muttiṁ vimuttiṁ parimuttiṁ nāha na kathesi na bhaṇasi na
dīpayasi na voharasi. Ñāṇenapi suddhiṁ visuddhiṁ parisuddhiṁ muttiṁ
vimuttiṁ parimuttiṁ nāha na kathesi na bhaṇasi na dīpayasi na voharasīti
no ce kira diṭṭhiyā na sutiyā na ñāṇena. Iti māgandiyoti
itīti padasandhi .pe. Padānupubbatāmetaṁ itīti. Māgandiyoti
tassa brāhmaṇassa nāmanti iti māgandiyo.

[342] Sīlabbatenāpi na suddhimāhāti sīlenapi suddhiṁ visuddhiṁ
parisuddhiṁ vattenapi suddhiṁ visuddhiṁ parisuddhiṁ sīlabbatenapi suddhiṁ
visuddhiṁ parisuddhiṁ muttiṁ vimuttiṁ parimuttiṁ nāha na kathesi na bhaṇasi
na dīpayasi na voharasīti sīlabbatenāpi na suddhimāha.

[343] Adiṭṭhiyā assutiyā añāṇā asīlatā abbatā nopi
tenāti diṭṭhipi icchitabbāti evaṁ bhaṇasi savanampi icchitabbanti
evaṁ bhaṇasi ñāṇampi icchitabbanti evaṁ bhaṇasi sīlampi
icchitabbanti evaṁ bhaṇasi vattampi icchitabbanti evaṁ bhaṇasi
na sakkosi ekaṁsena anujānituṁ na 1 sakkosi ekaṁsena paṭikkhipitunti
adiṭṭhiyā assutiyā añāṇā asīlatā abbatā nopi tena.

[344] Maññāmahaṁ momuhameva dhammanti momūhadhammo ayaṁ
tuyhaṁ bāladhammo mūḷhadhammo añāṇadhammo amarāvikkhepadhammoti
evaṁ maññāmi evaṁ jānāmi evaṁ ājānāmi [2]- evaṁ paṭivijjhāmīti
maññāmahaṁ momuhameva dhammaṁ.
1 Ma. napi.. 2 Ma. evaṁ vijānāmi evaṁ paṭivijānāmi.

[345] Diṭṭhiyā eke paccenti suddhinti diṭṭhiyā eke
samaṇabrāhmaṇā suddhiṁ visuddhiṁ parisuddhiṁ muttiṁ vimuttiṁ parimuttiṁ
paccenti. Sassato loko idameva saccaṁ moghamaññanti diṭṭhiyā
eke samaṇabrāhmaṇā suddhiṁ visuddhiṁ parisuddhiṁ muttiṁ vimuttiṁ parimuttiṁ
paccenti. Asassato loko .pe. Neva hoti na na hoti
tathāgato parammaraṇā idameva saccaṁ moghamaññanti diṭṭhiyā eke
samaṇabrāhmaṇā suddhiṁ visuddhiṁ parisuddhiṁ muttiṁ vimuttiṁ parimuttiṁ
paccentīti diṭṭhiyā eke paccenti suddhiṁ. Tenāha so brāhmaṇo
no ce kira diṭṭhiyā na sutiyā na ñāṇena (iti māgandiyo)
sīlabbatenāpi na suddhimāha
adiṭṭhiyā assutiyā añāṇā
asīlatā abbatā nopi tena
maññāmahaṁ momuhameva dhammaṁ
diṭṭhiyā eke paccenti suddhinti.

[346] Diṭṭhīsu 1 nissāya anupucchamāno (māgandiyāti bhagavā)
samuggahītesu pamohamāgā
ito ca nāddakkhi aṇumpi saññaṁ
tasmā tuvaṁ momuhato dahāsi.