[267] Oghatiṇṇassa pihayanti kāmesu gadhitā pajāti pajāti
1 Ma. anapekkhamāno.
Sattādhivacanaṁ. Pajā kāmesu rattā giddhā gadhitā mucchitā
ajjhopannā laggā laggitā palibuddhā tā 1 kāmoghaṁ tiṇṇassa
bhavoghaṁ tiṇṇassa diṭṭhoghaṁ tiṇṇassa avijjoghaṁ tiṇṇassa
sabbasaṁsārapathaṁ tiṇṇassa uttiṇṇassa nittiṇṇassa atikkantassa
samatikkantassa vītivattassa pāragatassa pārappattassa antagatassa
antappattassa koṭigatassa koṭippattassa pariyantagatassa
pariyantappattassa vosānagatassa vosānappattassa tāṇagatassa
tāṇappattassa leṇagatassa leṇappattassa saraṇagatassa saraṇappattassa
abhayagatassa abhayappattassa accutagatassa accutappattassa amatagatassa
amatappattassa nibbānagatassa nibbānappattassa icchanti
sādiyanti patthayanti pihayanti abhijappanti. Yathā iṇāyikā
ānaṇyaṁ patthenti pihayanti yathā ābādhikā ārogyaṁ patthenti
pihayanti yathā bandhanabandhā bandhanamokkhaṁ patthenti pihayanti
yathā dāsā bhujissaṁ patthenti pihayanti yathā kantāraddhānaṁ 2
pakkhannā khemantabhūmiṁ patthenti pihayanti evameva pajā kāmesu
rattā giddhā gadhitā mucchitā ajjhopannā laggā laggitā
palibuddhā tā 3 kāmoghatiṇṇassa bhavoghatiṇṇassa .pe.
Nibbānagatassa nibbānappattassa icchanti sādiyanti patthayanti
pihayanti abhijappantīti oghatiṇṇassa pihayanti kāmesu gadhitā
pajā. Tenāha bhagavā
1-3 Po. Ma. te. 2 Po. Ma. kantāraddhānapakkhandā.
Rittassa munino carato kāmesu anapekkhino
oghatiṇṇassa pihayanti kāmesu gadhitā pajāti.
Sattamo tissametteyyasuttaniddeso niṭṭhito.
----------------
Aṭṭhamo pasūrasuttaniddeso

[268] Idheva suddhiṁ iti vādayanti 1
nāññesu dhammesu visuddhimāhu
yaṁ nissitā tattha subhāvadānā 2
paccekasaccesu puthū niviṭṭhā.

[269] Idheva suddhiṁ iti vādayantīti 3 idheva suddhiṁ visuddhiṁ
parisuddhiṁ muttiṁ vimuttiṁ parimuttiṁ vadanti kathenti bhaṇanti dīpayanti
voharanti sassato loko idameva saccaṁ moghamaññanti suddhiṁ
visuddhiṁ parisuddhiṁ muttiṁ vimuttiṁ parimuttiṁ vadanti kathenti bhaṇanti
dīpayanti voharanti asassato loko antavā loko anantavā
loko taṁ jīvaṁ taṁ sarīraṁ aññaṁ jīvaṁ aññaṁ sarīraṁ hoti
tathāgato parammaraṇā na hoti tathāgato parammaraṇā hoti
ca na ca hoti tathāgato parammaraṇā neva hoti na na hoti
tathāgato parammaraṇā idameva saccaṁ moghamaññanti suddhiṁ visuddhiṁ
parisuddhiṁ muttiṁ vimuttiṁ parimuttiṁ vadanti kathenti bhaṇanti dīpayanti
voharantīti idheva suddhiṁ iti vādayanti 4 .

[270] Nāññesu dhammesu visuddhimāhūti attano satthāraṁ
dhammakkhānaṁ gaṇaṁ diṭṭhiṁ paṭipadaṁ maggaṁ ṭhapetvā sabbe paravāde
khipanti ukkhipanti parikkhipanti so satthā na sabbaññū dhammo na
1-3-4 Yu. vādiyanti. 2 Ma. subhaṁ.
Svākkhāto gaṇo na supaṭipanno diṭṭhi na bhaddikā paṭipadā
na supaññattā maggo na niyyāniko natthettha suddhi vā visuddhi
vā parisuddhi vā mutti vā vimutti vā parimutti vā na tattha
sujjhanti vā visujjhanti vā parisujjhanti vā muccanti vā vimuccanti
vā parimuccanti vā hīnā nihīnā omakā lāmakā jatukkā parittāti
evamāhaṁsu evaṁ kathenti evaṁ bhaṇanti evaṁ dīpayanti evaṁ voharantīti
nāññesu dhammesu visuddhimāhu.

[271] Yaṁ nissitā tattha subhāvadānāti yaṁ nissitāti yaṁ
satthāraṁ dhammakkhānaṁ gaṇaṁ diṭṭhiṁ paṭipadaṁ maggaṁ nissitā sannissitā 1
allīnā upagatā ajjhositā adhimuttā. Tatthāti sakāya diṭṭhiyā
sakāya khantiyā sakāya ruciyā sakāya laddhiyā. Subhāvadānāti
subhavādā sobhanavādā paṇḍitavādā dhīravādā 2 ñāṇavādā hetuvādā
lakkhaṇavādā kāraṇavādā ṭhānavādā sakāya laddhiyāti yaṁ nissitā
tattha subhāvadānā.

[272] Paccekasaccesu puthū niviṭṭhāti puthū samaṇabrāhmaṇā
puthupaccekasaccesu niviṭṭhā patiṭṭhitā allīnā upagatā ajjhositā
adhimuttā sassato loko idameva saccaṁ moghamaññanti niviṭṭhā
patiṭṭhitā allīnā upagatā ajjhositā adhimuttā asassato
loko .pe. Neva hoti na na hoti tathāgato parammaraṇā idameva
saccaṁ moghamaññanti niviṭṭhā patiṭṭhitā allīnā upagatā ajjhositā
1 Ma. ānissitā. 2 Ma. thiravādā.
Adhimuttāti paccekasaccesu puthū niviṭṭhā. Tenāha bhagavā
idheva suddhiṁ iti vādayanti
nāññesu dhammesu visuddhimāhu
yaṁ nissitā tattha subhāvadānā
paccekasaccesu puthū niviṭṭhāti.

[273] Te vādakāmā parisaṁ vigayha
bālaṁ dahanti mithu aññamaññaṁ
vadanti te aññasitā kathojjaṁ
pasaṁsakāmā kusalāvadānā.

[274] Te vādakāmā parisaṁ vigayhāti te vādakāmāti te
vādakāmā vādatthikā vādādhippāyā vādapurekkhārā vādapariyesanaṁ
carantā. Parisaṁ vigayhāti khattiyaparisaṁ brāhmaṇaparisaṁ gahapatiparisaṁ
samaṇaparisaṁ vigayha ogayha ajjhogahetvā pavisitvāti te
vādakāmā parisaṁ vigayha.

[275] Bālaṁ dahanti mithu aññamaññanti mithūti dve
janā dve kalahakārakā dve bhaṇḍanakārakā dve bhassakārakā
dve vivādakārakā dve adhikaraṇakārakā dve vādino dve
sallāpakā te aññamaññaṁ bālato hīnato nihīnato omakato
lāmakato jatukkato parittato dahanti passanti dakkhanti olokenti
nijjhāyanti upaparikkhantīti bālaṁ dahanti mithu aññamaññaṁ.

[276] Vadanti te aññasitā kathojjanti aññaṁ satthāraṁ
dhammakkhānaṁ gaṇaṁ diṭṭhiṁ paṭipadaṁ maggaṁ nissitā sannissitā allīnā
upagatā ajjhositā adhimuttā. Kathojjaṁ vuccati kalaho bhaṇḍanaṁ
viggaho vivādo medhagaṁ. Athavā kathojjanti anojavantī sā
kathā. Kathojjaṁ vadanti kalahaṁ vadanti bhaṇḍanaṁ vadanti viggahaṁ
vadanti vivādaṁ vadanti medhagaṁ vadanti bhaṇanti dīpayanti voharantīti
vadanti te aññasitā kathojjaṁ.