[237] Methunaṁ yo nisevatīti methunadhammo nāma yo so
asaddhammo .pe. Taṁkāraṇā vuccati methunadhammo. Methunaṁ yo nisevatīti
so aparena samayena buddhaṁ dhammaṁ saṅghaṁ sikkhaṁ paccakkhāya hīnāyāvattitvā
methunadhammaṁ sevati nisevati saṁsevati paṭisevatīti methunaṁ yo nisevati.

[238] Yānaṁ bhantaṁva taṁ loketi yānanti hatthiyānaṁ assayānaṁ
goyānaṁ ajayānaṁ meṇḍakayānaṁ oṭṭhayānaṁ kharayānaṁ bhantaṁ adantaṁ
akāritaṁ avinītaṁ uppathaṁ gaṇhāti visamaṁ khāṇumpi pāsāṇampi
abhirūhati yānampi ārohakampi bhañjati papātepi papatati. Yathā taṁ
Bhantaṁ yānaṁ adantaṁ akāritaṁ avinītaṁ uppathaṁ gaṇhāti evameva
so vibbhantako bhantayānapaṭibhāgo uppathaṁ gaṇhāti micchādiṭṭhiṁ
gaṇhāti .pe. Micchāsamādhiṁ gaṇhāti. Yathā taṁ bhantaṁ yānaṁ
adantaṁ akāritaṁ avinītaṁ visamaṁ khāṇumpi pāsāṇampi abhirūhati evameva
so vibbhantako bhantayānapaṭibhāgo visamaṁ kāyakammaṁ abhirūhati visamaṁ
vacīkammaṁ abhirūhati visamaṁ manokammaṁ abhirūhati visamaṁ pāṇātipātaṁ
abhirūhati visamaṁ adinnādānaṁ abhirūhati visamaṁ kāmesumicchācāraṁ
abhirūhati visamaṁ musāvādaṁ abhirūhati visamaṁ pisuṇaṁ vācaṁ abhirūhati
visamaṁ pharusaṁ vācaṁ abhirūhati visamaṁ samphappalāpaṁ abhirūhati visamaṁ
abhijjhaṁ abhirūhati visamaṁ byāpādaṁ abhirūhati visamaṁ micchādiṭṭhiṁ
abhirūhati visame saṅkhāre abhirūhati visame pañca kāmaguṇe abhirūhati
visame nīvaraṇe abhirūhati. Yathā taṁ bhantaṁ yānaṁ adantaṁ
akāritaṁ avinītaṁ ārohakampi bhañjati evameva so vibbhantako
bhantayānapaṭibhāgo niraye attānaṁ bhañjati tiracchānayoniyā attānaṁ
bhañjati pittivisaye attānaṁ bhañjati manussaloke attānaṁ bhañjati
devaloke attānaṁ bhañjati. Yathā taṁ bhantaṁ yānaṁ adantaṁ akāritaṁ
avinītaṁ papātepi papatati evameva so vibbhantako bhantayānapaṭibhāgo
jātipapātamhipi 1 papatati jarāpapātamhipi papatati byādhipapātamhipi
papatati maraṇapapātamhipi papatati sokaparidevadukkhadomanassupāyāsapapātamhipi
papatati. Loketi apāyaloke .pe.
1 Ma. jāti ... jarā ... byādhi ... maraṇa ... sokaparidevadukkhadomanassupāyāsapapātampi.
Manussaloketi yānaṁ bhantaṁva taṁ loke.

[239] Hīnamāhu puthujjananti puthujjanāti kenatthena puthujjanā.
Puthu kilese janentīti puthujjanā. Puthu avihatasakkāyadiṭṭhikāti
puthujjanā. Puthu satthārānaṁ mukhullokikāti puthujjanā. Puthu
sabbagatīhi āvuṭāti puthujjanā. Puthu nānābhisaṅkhārehi 1 abhisaṅkharontīti
puthujjanā. Puthu nānāoghehi vuyhantīti puthujjanā.
Puthu nānāsantāpehi santappantīti puthujjanā. Puthu nānāpariḷāhehi
paridayhantīti puthujjanā. Puthu pañcasu kāmaguṇesu rattā
giddhā gadhitā mucchitā ajjhopannā laggā laggitā palibuddhāti
puthujjanā. Puthu pañcahi nīvaraṇehi āvuṭā nivuṭā ophuṭā 2
pihitā paṭicchannā paṭikujjitāti puthujjanā. Hīnamāhu puthujjananti
puthujjanaṁ hīnaṁ nihīnaṁ omakaṁ lāmakaṁ jatukkaṁ 3 parittanti evamāhu
evamāhaṁsu evaṁ kathenti evaṁ bhaṇanti evaṁ dīpayanti evaṁ voharantīti
hīnamāhu puthujjanaṁ. Tenāha bhagavā
eko pubbe caritvāna methunaṁ yo nisevati
yānaṁ bhantaṁva taṁ loke hīnamāhu puthujjananti.

[240] Yaso kittī ca yā pubbe hāyate vāpi tassa sā
etampi disvā sikkhetha methunaṁ vippahātave.

[241] Yaso kittī ca yā pubbe hāyate vāpi tassa sāti
katamo yaso. Idhekacco pubbe samaṇabhāve sakkato hoti
1 Ma. nānābhisaṅkhāre. 2 Ma. ovuṭā. 3 Ma. chatukkaṁ.
Garukato mānito pūjito apacito lābhī cīvarapiṇḍapātasenāsana-
gilānapaccayabhesajjaparikkhārānaṁ ayaṁ yaso. Katamā kitti.
Idhekacco pubbe samaṇabhāve kittivaṇṇakato hoti paṇḍito
viyatto medhāvī bahussuto cittakathī kalyāṇapaṭibhāṇo suttantikoti
vā vinayadharoti vā dhammakathikoti vā āraññikoti
vā piṇḍapātikoti vā paṁsukūlikoti vā tecīvarikoti vā
sapadānacārikoti vā khalupacchābhattikoti vā nesajjikoti vā
yathāsanthatikoti vā paṭhamassa jhānassa lābhīti vā dutiyassa
jhānassa lābhīti vā tatiyassa jhānassa lābhīti vā catutthassa
jhānassa lābhīti vā ākāsānañcāyatanasamāpattiyā lābhīti vā
viññāṇañcāyatanasamāpattiyā lābhīti vā ākiñcaññāyatanasamāpattiyā
lābhīti vā nevasaññānāsaññāyatanasamāpattiyā
lābhīti vā ayaṁ kitti 1 . Yaso kittī ca yā pubbe hāyate vāpi
tassa sāti tassa aparena samayena buddhaṁ dhammaṁ saṅghaṁ sikkhaṁ
paccakkhāya hīnāyāvattassa so ca yaso sā ca kitti hāyati parihāyati
paridhaṁsati paripatati antaradhāyati vippalujjatīti yaso kittī
ca yā pubbe hāyate vāpi tassa sā.

[242] Etampi disvā sikkhetha methunaṁ vippahātaveti etanti
pubbe samaṇabhāve yaso ca kitti ca aparabhāge buddhaṁ dhammaṁ
saṅghaṁ sikkhaṁ paccakkhāya hīnāyāvattassa ayaso ca akitti ca etaṁ
1 Ma. kittīti.
Sampattivipattiṁ disvā passitvā tulayitvā tīrayitvā vibhāvayitvā
vibhūtaṁ katvāti etampi disvā. Sikkhethāti tisso sikkhā
adhisīlasikkhā adhicittasikkhā adhipaññāsikkhā.
Katamā adhisīlasikkhā. Idha bhikkhu sīlavā hoti pāṭimokkhasaṁvarasaṁvuto
viharati ācāragocarasampanno aṇumattesu vajjesu
bhayadassāvī samādāya sikkhati sikkhāpadesu khuddako sīlakkhandho
mahanto sīlakkhandho sīlaṁ patiṭṭhā ādi caraṇaṁ saṁyamo saṁvaro
mukhaṁ pamukhaṁ kusalānaṁ dhammānaṁ samāpattiyā ayaṁ adhisīlasikkhā.
Katamā adhicittasikkhā. Idha bhikkhu vivicceva kāmehi vivicca
akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ
upasampajja viharati vitakkavicārānaṁ vūpasamā ajjhattaṁ sampasādanaṁ
cetaso ekodibhāvaṁ avitakkaṁ avicāraṁ samādhijaṁ pītisukhaṁ dutiyaṁ jhānaṁ
tatiyaṁ jhānaṁ catutthaṁ jhānaṁ upasampajja viharati ayaṁ adhicittasikkhā.
Katamā adhipaññāsikkhā. Idha bhikkhu paññavā hoti udayatthagāminiyā
paññāya samannāgato ariyāya nibbedhikāya sammādukkhakkhayagāminiyā
so idaṁ dukkhanti yathābhūtaṁ pajānāti ayaṁ
dukkhasamudayoti yathābhūtaṁ pajānāti ayaṁ dukkhanirodhoti yathābhūtaṁ
pajānāti ayaṁ dukkhanirodhagāminī paṭipadāti yathābhūtaṁ pajānāti
ime āsavāti yathābhūtaṁ pajānāti ayaṁ āsavasamudayoti yathābhūtaṁ
pajānāti ayaṁ āsavanirodhoti yathābhūtaṁ pajānāti ayaṁ āsavanirodhagāminī
Paṭipadāti yathābhūtaṁ pajānāti ayaṁ adhipaññāsikkhā.
Methunanti methunadhammo nāma yo so asaddhammo .pe. Taṁkāraṇā
vuccati methunadhammo. Etampi disvā sikkhetha methunaṁ
vippahātaveti methunadhammassa pahānāya vūpasamāya paṭinissaggāya
paṭippassaddhiyā adhisīlampi sikkheyya adhicittampi sikkheyya adhipaññampi
sikkheyya. Imā tisso sikkhā 1 āvajjento sikkheyya
jānanto sikkheyya passanto sikkheyya paccavekkhanto sikkheyya
cittaṁ adhiṭṭhahanto sikkheyya saddhāya adhimuccanto sikkheyya
viriyaṁ paggaṇhanto sikkheyya satiṁ upaṭṭhapento sikkheyya cittaṁ
samādahanto sikkheyya paññāya pajānanto sikkheyya abhiññeyyaṁ
abhijānanto sikkheyya pariññeyyaṁ parijānanto sikkheyya pahātabbaṁ
pajahanto sikkheyya bhāvetabbaṁ bhāvento sikkheyya sacchikātabbaṁ
sacchikaronto sikkheyya ācareyya samācareyya samādāya
vatteyyāti etampi disvā sikkhetha methunaṁ vippahātave.
Tenāha bhagavā
yaso kittī ca yā pubbe hāyate vāpi tassa sā
etampi disvā sikkhetha methunaṁ vippahātaveti.

[243] Saṅkappehi pareto so kapaṇo viya jhāyati
sutvā paresaṁ nigghosaṁ maṅku hoti tathāvidho.
1 Ma. sikkhāyo.

[244] Saṅkappehi pareto so kapaṇo viya jhāyatīti kāmasaṅkappena
byāpādasaṅkappena vihiṁsāsaṅkappena diṭṭhisaṅkappena
phuṭṭho pareto samohito samannāgato [1]- kapaṇo viya mando viya
momūho viya jhāyati pajjhāyati nijjhāyati avajjhāyati 2 . Yathā
ulūko rukkhasākhāyaṁ mūsikaṁ gamayamāno 3 jhāyati pajjhāyati nijjhāyati
avajjhāyati 4 yathā kotthu nadītīre macche gamayamāno 5 jhāyati
pajjhāyati nijjhāyati avajjhāyati 6 yathā vilāro sandhisamalasapaṅkatīre
mūsikaṁ gamayamāno jhāyati pajjhāyati nijjhāyati avajjhāyati
yathā gadrabho vahacchinno sandhisamalasapaṅkatīre jhāyati pajjhāyati
nijjhāyati avajjhāyati evameva so vibbhantako kāmasaṅkappena
byāpādasaṅkappena vihiṁsāsaṅkappena diṭṭhisaṅkappena phuṭṭho pareto
samohito samannāgato kapaṇo viya mando viya momūho viya
jhāyati pajjhāyati nijjhāyati avajjhāyatīti saṅkappehi pareto so
kapaṇo viya jhāyati.

[245] Sutvā paresaṁ nigghosaṁ maṅku hoti tathāvidhoti paresanti
upajjhāyakā 7 vā ācariyakā vā samānupajjhāyakā vā samānācariyakā
vā mittā vā sandiṭṭhā vā sambhattā vā sahāyā vā codenti
tassa te kho āvuso alābhā tassa te dulladdhaṁ yaṁ tvaṁ
evarūpaṁ uḷāraṁ satthāraṁ labhitvā evaṁ svākkhāte dhammavinaye
pabbajitvā evarūpaṁ ariyagaṇaṁ labhitvā hīnassa methunadhammassa kāraṇā
1 Ma. Yu. pihito. 2-4-6 Ma. apajjhāyati. 3-5 Ma. Yu. magayamāno.
7 Ma. upajjhāyā vā ācariyā vā.
Buddhaṁ dhammaṁ saṅghaṁ sikkhaṁ paccakkhāya hīnāyāvattosi saddhāpi
nāma te nāhosi kusalesu dhammesu hiripi nāma te nāhosi
kusalesu dhammesu ottappampi nāma te nāhosi kusalesu dhammesu
viriyampi nāma te nāhosi kusalesu dhammesu satipi nāma te
nāhosi kusalesu dhammesu paññāpi nāma te nāhosi kusalesu
dhammesūti tesaṁ vacanaṁ byappathaṁ desanaṁ anusiṭṭhiṁ sutvā suṇitvā
uggahetvā upadhārayitvā upalakkhayitvā maṅku hoti pīḷito ghaṭṭito
byatthito 1 domanassito hoti. Tathāvidhoti tathāvidho tādiso
tassaṇṭhito tappakāro tappaṭibhāgo yo so vibbhantakoti
sutvā paresaṁ nigghosaṁ maṅku hoti tathāvidho. Tenāha bhagavā
saṅkappehi pareto so kapaṇo viya jhāyati
sutvā paresaṁ nigghosaṁ maṅku hoti tathāvidhoti.

[246] Atha satthāni kurute paravādehi codito
esa khvassa mahāgedho mosavajjaṁ pagāhati.