[217] Udavindu yathāpi pokkhareti udavindūti vuccati udakathevo.
Pokkharaṁ vuccati padumapattaṁ. Yathā udakavindu padumapatte
na limpati na saṁlimpati nupalimpati alittaṁ asaṁlittaṁ
anūpalittanti udavindu yathāpi pokkhare.
1 Ma. arahanto.

[218] Padume vāri yathā na limpatīti padumaṁ vuccati
padumapupphaṁ. Vāri vuccati udakaṁ. Yathā vāri padumapupphe 1 na
limpati na saṁlimpati nupalimpati alittaṁ asaṁlittaṁ anūpalittanti
padume vāri yathā na limpati.

[219] Evaṁ muni nopalimpati yadidaṁ diṭṭhasutaṁ mutesu vāti
evanti opammasampaṭipādanā. Munīti monaṁ vuccati ñāṇaṁ yā
paññā pajānanā .pe. Saṅgajālamaticca so muni. Lepāti
dve lepā taṇhālepo ca diṭṭhilepo ca .pe. Ayaṁ
taṇhālepo .pe. Ayaṁ diṭṭhilepo. Muni taṇhālepaṁ pahāya diṭṭhilepaṁ
paṭinissajjitvā diṭṭhe na limpati sute na limpati mute na
limpati viññāte na limpati na saṁlimpati nupalimpati alitto
asaṁlitto anūpalitto nikkhanto nissaṭṭho vippamutto visaññutto
vimariyādikatena cetasā viharatīti evaṁ muni nopalimpati yadidaṁ
diṭṭhasutaṁ mutesu vā. Tenāha bhagavā
udavindu yathāpi pokkhare
padume vāri yathā na limpati
evaṁ muni nopalimpati
yadidaṁ diṭṭhasutaṁ mutesu vāti.

[220] Dhono na hi tena maññati
yadidaṁ diṭṭhasutaṁ mutesu vā
1 Ma. Yu. padumapupphaṁ.
Nāññena visuddhimicchati
na hi so rajjati no virajjati.

[221] Dhono na hi tena maññati yadidaṁ diṭṭhasutaṁ mutesu
vāti dhonoti dhonā vuccati paññā yā paññā pajānanā .pe.
Amoho dhammavicayo sammādiṭṭhi. Kiṁkāraṇā dhonā
vuccati paññā. Tāya paññāya kāyaduccaritaṁ dhutañca dhotañca
sandhotañca niddhotañca. Vacīduccaritaṁ dhutañca dhotañca sandhotañca
niddhotañca. Manoduccaritaṁ dhutañca dhotañca sandhotañca niddhotañca.
Rāgo dhuto ca dhoto ca sandhoto ca niddhoto ca.
Doso moho kodho upanāho makkho paḷāso issā
macchariyaṁ māyā sāṭheyyaṁ thambho sārambho māno atimāno
mado pamādo sabbe kilesā sabbe duccaritā
sabbe darathā sabbe pariḷāhā sabbe santāpā sabbākusalābhisaṅkhārā
dhutā ca dhotā ca sandhotā ca niddhotā ca.
Taṁkāraṇā dhonā vuccati paññā. Athavā sammādiṭṭhiyā micchādiṭṭhi
dhutā ca dhotā ca sandhotā ca niddhotā ca. Sammāsaṅkappena
micchāsaṅkappo dhuto ca dhoto ca sandhoto ca niddhoto
ca. Sammāvācāya micchāvācā dhutā ca. Sammākammantena
micchākammanto dhuto ca. Sammāājīvena micchāājīvo dhuto
ca. Sammāvāyāmena micchāvāyāmo dhuto ca. Sammāsatiyā
Micchāsati dhutā ca. Sammāsamādhinā micchāsamādhi dhuto ca.
Sammāñāṇena micchāñāṇaṁ dhutañca. Sammāvimuttiyā micchāvimutti
dhutā ca dhotā ca sandhotā ca niddhotā ca. Athavā
ariyena aṭṭhaṅgikena maggena sabbe kilesā sabbe duccaritā
sabbe darathā sabbe pariḷāhā sabbe santāpā sabbākusalābhisaṅkhārā
dhutā ca dhotā ca sandhotā ca niddhotā ca.
Arahā imehi dhoneyyehi 1 dhammehi upeto samupeto upagato
samupagato upapanno samupapanno samannāgato tasmā arahā
dhono. So dhutarāgo dhutapāpo dhutakileso dhutapariḷāhoti
dhono.
Dhono na hi tena maññati yadidaṁ diṭṭhasutaṁ mutesu vāti
dhono diṭṭhaṁ na maññati diṭṭhasmiṁ na maññati diṭṭhato na
maññati diṭṭhaṁ meti na maññati. Sutaṁ na maññati sutasmiṁ
na maññati sutato na maññati sutaṁ meti na maññati.
Mutaṁ na maññati mutasmiṁ na maññati mutato na maññati
mutaṁ meti na maññati. Viññātaṁ na maññati viññātasmiṁ na
maññati viññātato na maññati viññātaṁ meti na maññati.
Vuttaṁ hetaṁ bhagavatā asmīti bhikkhave maññitametaṁ anasmīti 2
maññitametaṁ bhavissanti maññitametaṁ na bhavissanti maññitametaṁ
rūpī bhavissanti maññitametaṁ arūpī bhavissanti maññitametaṁ saññī
1 Ma. dhonehi.. 2 Ma. Yu. ayamahamasmīti.
Bhavissanti maññitametaṁ asaññī bhavissanti maññitametaṁ nevasaññīnāsaññī
bhavissanti maññitametaṁ maññitaṁ bhikkhave rogo
maññitaṁ gaṇḍo maññitaṁ sallaṁ maññitaṁ upaddavo tasmā
tiha bhikkhave amaññamānena cetasā viharissāmāti evañhi vo
bhikkhave sikkhitabbanti. Dhono na hi tena maññati yadidaṁ
diṭṭhasutaṁ mutesu vā.

[222] Nāññena visuddhimicchatīti dhono aññena asuddhimaggena
micchāpaṭipadāya aniyyānikapathena aññatra satipaṭṭhānehi
aññatra sammappadhānehi aññatra iddhippādehi aññatra
indriyehi aññatra balehi aññatra bojjhaṅgehi aññatra ariyā
aṭṭhaṅgikā maggā suddhiṁ visuddhiṁ parisuddhiṁ muttiṁ vimuttiṁ parimuttiṁ na
icchati na sādiyati na pattheti na piheti nābhijappatīti nāññena
visuddhimicchati.

[223] Na hi so rajjati no virajjatīti sabbe bālaputhujjanā
rajjanti kalyāṇaputhujjanaṁ upādāya satta sekhā virajjanti
arahā neva rajjati no virajjati. Viratto so khayā rāgassa
vītarāgattā khayā dosassa vītadosattā khayā mohassa vītamohattā.
So vuṭṭhavāso ciṇṇacaraṇo .pe. Natthi tassa
punabbhavoti na hi so rajjati no virajjati. Tenāha bhagavā
Dhono na hi tena maññati
yadidaṁ diṭṭhasutaṁ mutesu vā
nāññena visuddhimicchati
na hi so rajjati no virajjatīti.
Chaṭṭho jarāsuttaniddeso niṭṭhito.
------------------
Sattamo tissametteyyasuttaniddeso

[224] Methunamanuyuttassa (iccāyasmā tisso metteyyo)
vighātaṁ brūhi mārisa
sutvāna tava sāsanaṁ
viveke sikkhisāmase 1 .

[225] Methunamanuyuttassāti methunadhammo nāma yo so
asaddhammo gāmadhammo vasaladhammo duṭṭhullo odakantiko rahasso
dvayadvayasamāpatti. Kiṁkāraṇā vuccati methunadhammo. Ubhinnaṁ
rattānaṁ sārattānaṁ avassutānaṁ pariyuṭṭhitānaṁ pariyādinnacittānaṁ
ubhinnaṁ sadisānaṁ dhammoti taṁkāraṇā vuccati methunadhammo.
Yathā ubho kalahakārakā methunakāti vuccanti ubho bhaṇḍanakārakā
methunakāti vuccanti ubho bhassakārakā methunakāti vuccanti ubho
vivādakārakā methunakāti vuccanti ubho adhikaraṇakārakā methunakāti
vuccanti ubho vādino methunakāti vuccanti ubho sallāpakā
methunakāti vuccanti evameva ubhinnaṁ rattānaṁ sārattānaṁ avassutānaṁ
pariyuṭṭhitānaṁ pariyādinnacittānaṁ ubhinnaṁ sadisānaṁ dhammoti taṁkāraṇā
vuccati methunadhammo. Methunamanuyuttassāti methunadhamme yuttassa
payuttassa āyuttassa samāyuttassa taccaritassa tabbahulassa
taggarukassa tanninnassa tappoṇassa tappabbhārassa tadadhimuttassa
1 Po. Ma. sikkhissāmase. sabbattha īdisameva.
Tadādhipateyyassāti methunamanuyuttassa.

[226] Iccāyasmā tisso metteyyoti iccāti padasandhi
padasaṁsaggo padapāripūri akkharasamavāyo byañjanasiliṭṭhatā padānupubbatāmetaṁ
iccāti. Āyasmāti piyavacanaṁ garuvacanaṁ sagāravavacanaṁ
sappatissavacanametaṁ āyasmāti. Tissoti tassa therassa nāmaṁ
saṅkhā samaññā paññatti vohāro nāmaṁ nāmakammaṁ nāmadheyyaṁ
nirutti byañjanaṁ abhilāpo. Metteyyoti tassa therassa gottaṁ
saṅkhā samaññā paññatti vohāroti iccāyasmā tisso
metteyyo.