[1247] Atthi no jīvikā deva sā ca yādisikīdisā
kasirā jīvikā homa uñchācariyāya jīvitaṁ.
Aniddhinaṁ mahārāja dametyassaṁva 2 sārathi
tyamhā aniddhikā dantā asamiddhi dameti no.
Api no kīsāni maṁsāni pitu mātu adassanā
avaruddhānaṁ mahārāja araññe jīvisokinaṁ.

[1248] Yepi te siviseṭṭhassa dāyādappattamānasā
jālī kaṇhājinā cubho brāhmaṇassa vasānugā
accāyikassa luddassa yo ne gāvova sumbhati.
Te rājaputtiyā putte yadi jānātha saṁsatha
pariyāpuṇātha no khippaṁ sappadaṭṭhaṁva māṇavaṁ.

[1249] Ete 3 kumārā nikkītā jālī kaṇhājinā cubho
brāhmaṇassa dhanaṁ datvā putta mā bhāyi assasa.

[1250] Kacci nu tāta kusalaṁ kacci tāta anāmayaṁ
1 Ma. suṇhā. 2 Ma. dametassaṁva. 3 Ma. ubho.
Kacci nu tāta me mātu cakkhu na parihāyati.

[1251] Kusalañceva me putta atho putta anāmayaṁ
atho ca putta te mātu cakkhu na parihāyati.

[1252] Kacci arogaṁ yoggante kacci vahati vāhanaṁ
kacci phīto janapado kacci vuṭṭhi na chijjati.

[1253] Atho arogaṁ yoggamme atho vahati vāhanaṁ
atho phīto janapado atho vuṭṭhi na chijjati.

[1254] Iccevaṁ mantayantānaṁ mātā nesaṁ adissatha
rājaputtī giridvāre pattikā anupāhanā.
Tañca disvāna āyantiṁ mātaraṁ puttagiddhiniṁ
vessantaro ca maddī ca paccuggantvā avandisuṁ.
Maddī ca sirasā pāde sassuyā abhivādayi
maddī ahañhi te ayye pāde vandāmi te husā.

[1255] Maddiñca puttakā disvā dūrato sotthimāgatā
kandantā abhidhāviṁsu vacchā bālāva mātaraṁ.
Maddī ca puttake disvā dūrato sotthimāgate
vāruṇīva pavedhenti thanadhārābhisiñcatha.

[1256] Samāgatāna ñātīnaṁ mahāghoso ajāyatha
pabbatā samanādiṁsu mahī ākampitā ahu
vuṭṭhidhāraṁ pavattento devo pāvassi tāvade.
Atha vessantaro rājā ñātīhi samagacchatha
nattāro suṇisā putto rājā devī ca ekato.
Yadā samāgatā āsuṁ tadāsi lomahaṁsanaṁ
pañjalikā tassa yācanti rodantā bherave vane.
Vessantarañca maddiñca sabbe raṭṭhā samāgatā
tvaṁ nosi issaro rājā rajjaṁ kāretha no ubho.
Chakkhattiyapabbaṁ nāma.