[1117] Idheva tāva acchassu cetaraṭṭhe rathesabha
yāva cetā gamissanti rañño santika yācituṁ.
Nijjhāpetuṁ mahārājaṁ sivīnaṁ raṭṭhavaḍḍhanaṁ
taṁ taṁ cetā purakkhitvā 1 patītā laddhapaccayā
parivāretvāna gacchanti evaṁ jānāhi khattiya.

[1118] Mā vo rucittha gamanaṁ rañño santika yācituṁ
nijjhāpetuṁ mahārājaṁ rājāpi tattha nissaro.
Accuggatā hi siviyo balaggā negamā ca ye
te padhaṁsetumicchanti 2 rājānaṁ mama kāraṇā.

[1119] Sace esā pavattettha raṭṭhasmiṁ raṭṭhavaḍḍhana
idheva rajjaṁ kārehi cetehi parivārito.
Iddhaṁ phītañcidaṁ raṭṭhaṁ iddho janapado mahā
matiṁ karohi tvaṁ deva rajjassamanusāsituṁ.

[1120] Na me chando mati atthi rajjassamanusāsituṁ
pabbājitassa raṭṭhasmā cetaputtā suṇātha me.
Atuṭṭhā siviyo assu balaggā negamā ca ye
pabbājitassa raṭṭhasmā cetā rajjebhisecayuṁ.
1 Ma. purakkhatvā. 2 Ma. te vidhaṁsetu....
Asammodiyaṁpi vo assa accantaṁ mama kāraṇā
sivīhi bhaṇḍanañcāpi viggaho me na ruccati.
Athassa bhaṇḍanaṁ ghoraṁ sampahāro anappako
ekassa kāraṇā mayhaṁ hiṁseyya bahuko jano.
Paṭiggahitaṁ yaṁ dinnaṁ sabbassa agghiyaṁ kataṁ
avaruddhasi maṁ rājā vaṅkaṁ gacchāmi pabbataṁ
okāsaṁ sammā jānātha vane yattha vasemhase.

[1121] Taggha te mayamakkhāma yathāpi kusalā tathā
rājisī yattha sammanti āhutaggī samāhitā.
Esa selo mahārāja pabbato gandhamādano
yattha tvaṁ saha puttehi saha bhariyāya cacchasi.

[1122] Taṁ cetā anusāsiṁsu assunettā rudammukhā
ito gaccha mahārāja ujuṁ yenuttarāmukho.
Atha dakkhasi bhaddante vepullaṁ nāma pabbataṁ
nānādumagaṇākiṇṇaṁ sītacchāyaṁ manoramaṁ.
Tamatikkamma bhaddante atha dakkhasi āpakaṁ
nadiṁ ketumatiṁ nāma gambhīraṁ girigabbharaṁ.
Puthulomamacchākiṇṇaṁ supatitthaṁ mahodakaṁ
tattha nhātvā pivitvā ca assāsetvā saputtake.
Atha dakkhasi bhaddante nigrodhaṁ madhuvipphalaṁ
Rammake sikhare jātaṁ sītacchāyaṁ manoramaṁ.
Atha dakkhasi bhaddante nālikaṁ nāma pabbataṁ
nānādijagaṇākiṇṇaṁ selaṁ kiṁpurisāyutaṁ.
Tassa uttarapubbena mucalindo nāma so saro
puṇḍarīkehi sañchanno setasogandhiyehi ca.
So vanaṁ meghasaṅkāsaṁ dhuvaṁ haritasaddalaṁ
sīhovāmisapekkhīva vanasaṇḍaṁ vigāhiya
puppharukkhehi sañchannaṁ phalarukkhehi cūbhayaṁ.
Tattha bindussarā vaggū nānāvaṇṇā bahū dijā
kūjantamupakūjanti utusampupphite dume.
Gantvā girividuggāni nadīnaṁ pabhavāni ca
so addasa 1 pokkharaṇiṁ karañjakakudhāyutaṁ.
Puthulomamacchākiṇṇaṁ supatitthaṁ mahodakaṁ
samañca caturassañca sādhuṁ appaṭigandhiyaṁ.
Tassā uttarapubbena paṇṇasālaṁ amāpaya
paṇṇasālaṁ amāpetvā uñchācariyāya īhatha.
Vanappavesanaṁ nāma.

[1123] Ahu vāsī kaliṅgesu jūjako nāma brāhmaṇo
tassāpi daharā bhariyā nāmenāmittatāpanā.
Tā naṁ tattha gatāvocuṁ nadīudakahāriyā
1 Sī. Yu. dakkhasi.
Thiyo naṁ paribhāsiṁsu samāgantvā kutūhalā.
Amittā nūna te mātā amitto nūna te pitā
ye taṁ jiṇṇassa pādaṁsu evaṁ dahariyaṁ satiṁ.
Ahitaṁ vata te ñātī mantayiṁsu rahogatā
ye taṁ jiṇṇassa pādaṁsu evaṁ dahariyaṁ satiṁ.
[1]-
Dukkaṭaṁ vata te ñātī mantayiṁsu rahogatā
ye taṁ jiṇṇassa pādaṁsu evaṁ dahariyaṁ satiṁ.
Pāpakaṁ vata te ñātī mantayiṁsu rahogatā
ye taṁ jiṇṇassa pādaṁsu evaṁ dahariyaṁ satiṁ.
Amanāpaṁ vata te ñātī mantayiṁsu rahogatā
ye taṁ jiṇṇassa pādaṁsu evaṁ dahariyaṁ satiṁ.
Amanāpavāsaṁ vasi jiṇṇena patinā saha 2
yā tvaṁ vasasi jiṇṇassa matante jīvitā varaṁ.
Na hi nūna tuyhaṁ kalyāṇī pitā mātā ca sobhane
aññaṁ bhattāraṁ vindiṁsu
ye taṁ jiṇṇassa pādaṁsu evaṁ dahariyaṁ satiṁ.
Duyiṭṭhante navamiyaṁ akataṁ aggihuttakaṁ
ye taṁ jiṇṇassa pādaṁsu evaṁ dahariyaṁ satiṁ.
Samaṇe brāhmaṇe nūna brahmacariyaparāyane
1 Ma. amittā vata te ñātī mantayiṁsu rahogatā
ye taṁ jiṇṇassa pādaṁsu evaṁ dahāriyaṁ satiṁ.
2 Sī. Yu. evaṁ dahariyā satī.
Sā tvaṁ loke abhissasi 1 sīlavante bahussute
yā tvaṁ vasasi jiṇṇassa evaṁ dahariyaṁ satiṁ 2 .
Na dukkhaṁ ahinā daṭṭhaṁ na dukkhaṁ sattiyā hataṁ
tañca dukkhañca tippañca yaṁ passe jiṇṇakaṁ patiṁ.
Natthi khiḍḍā natthi rati jiṇṇena patinā saha
natthi allāpasallāpo jagghitampi 3 na sobhati.
Yadā ca daharo daharā mantayiṁsu 4 rahogatā
sabbe sokā vinassanti 5 yekeci hadayassitā.
Daharā tvaṁ rūpavatī purisānaṁbhipatthitā
gaccha ñātikule accha kiṁ jiṇṇo ramayissati.

[1124] Na te brāhmaṇa gacchāmi nadiṁ udakahāriyā
thiyo maṁ paribhāsanti tayā jiṇṇena brāhmaṇa.

[1125] Mā me tvaṁ akarā kammaṁ mā me udakamāhari
ahaṁ udakamāhissaṁ mā bhotī kuppitā ahu.

[1126] Nāhaṁ tamhi kule jātā yaṁ tvaṁ udakamāhare
evaṁ brāhmaṇa jānāhi na te vacchāmihaṁ ghare.
Sace me dāsaṁ dāsiṁ vā nānayissasi brāhmaṇa
evaṁ brāhmaṇa jānāhi na te vacchāmi santike.