[1097] Tamabravī rājaputtī maddī sabbaṅgasobhanā
mā deva paridevasi mā ca tvaṁ vimano ahu
yathā mayaṁ bhavissāma tathā hessanti dārakā.
Idaṁ vatvāna pakkāmi maddī sabbaṅgasobhanā
sivimaggena anvesi putte ādāya lakkhaṇā.

[1098] Tato vessantaro rājā dānaṁ datvāna khattiyo
pitu mātuñca vanditvā katvā ca naṁ padakkhiṇaṁ.
Catuvāhiṁ rathaṁ yuttaṁ sīghamāruyha sandanaṁ
ādāya putta dārañca vaṅkaṁ pāyāsi pabbataṁ.

[1099] Tato vessantaro rājā yenāsi bahuko jano
āmanta kho taṁ gacchāma arogā hontu ñātayo

[1100] Nikkhamitvāna nagarā nivattitvā vilokite
1 Ma. sukhedhitā.
Tadāpi paṭhavī kampi sineruvanavaṭaṁsakā.

[1101] Iṅgha maddi nisāmehi rammarūpaṁva dissati
āvāso siviseṭṭhassa pettikaṁ bhavanaṁ mama.

[1102] Taṁ brāhmaṇā anvagamuṁ te taṁ asse ayācisuṁ
yācito paṭipādesi catunnaṁ caturo haye.

[1103] Iṅgha maddi nisāmehi cittarūpaṁ na dissati
migā rohiccavaṇṇena dakkhiṇassā vahanti maṁ.

[1104] Athettha pañcamo āgā so taṁ rathamayācatha
tassa taṁ paṭiyādāsi 1 na cassu pahato mano.

[1105] Tato vessantaro rājā oropetvā sakaṁ janaṁ
assāsayi assarathaṁ brāhmaṇassa dhanesino.

[1106] Tvaṁ maddi kaṇhaṁ gaṇhāhi lahukā esā kaniṭṭhakā 2
ahaṁ jāliṁ gahessāmi garuko bhātiko hi so.