[1087] Anujānāhi maṁ amma pabbajjā mama ruccati
sohaṁ sake abhisasiṁ yajamāno sake pure
sivīnaṁ vacanatthena samhā raṭṭhā nirajjahaṁ
aghantaṁ paṭisevissaṁ
vane vāḷamigākiṇṇe khaggadīpinisevite
ahaṁ puññāni karomi vaṅkaṁ gacchāmi pabbataṁ 2 .

[1088] Anujānāmi taṁ putta pabbajjā te samijjhatu
ayañca maddī kalyāṇī susaññā tanumajjhimā
acchataṁ saha puttehi kiṁ araññe karissati.
1 Ma. dhamminaṁ. 2 Ma. tumhe paṅkamhi sīdatha.

[1089] Nāhaṁ akāmā dāsiṁpi araññaṁ netumussahe
sace icchati anvetu sace nicchati acchatu.

[1090] Tato suṇhaṁ mahārājā yācituṁ paṭipajjatha
mā candanasamācāre rajojallaṁ adhārayi.
Kāsiyāni padhāretvā 1 kusacīraṁ adhārayi
dukkho vāso araññasmiṁ mā hi tvaṁ lakkhaṇe gami.

[1091] Tamabravi rājaputtī maddī sabbaṅgasobhanā
nāhantaṁ sukhamiccheyyaṁ yaṁ me vessantaraṁ vinā.

[1092] Tamabravi mahārājā sivīnaṁ raṭṭhavaḍḍhano
iṅgha maddi nisāmehi vane ye honti dussahā.
Bahū kīṭā paṭaṅgā ca makasā madhumakkhikā
tepi taṁ tattha hiṁseyyuṁ tante dukkhataraṁ siyā.
Apare passa santāse nadīnūpanisevite
sappā ajagarā nāma avisā te mahabbalā.
Te manussaṁ migaṁ vāpi apicāsannamāgataṁ
parikkhipitvā bhogehi vasamānenti attano.
Aññepi kaṇhā jaṭino acchā nāma aghammigā
na tehi puriso diṭṭho rukkhamāruyha muccati.
Saṅghaṭṭayantā siṅgāni tikkhaggāni pahārino
mahisā 2 vicarantettha nadiṁ sotumbaraṁ pati.
1 Ma. mā kāsiyāni dhāretvā. 2 Ma. mahiṁsā.
Disvā migānaṁ yūthānaṁ gavaṁ sañcaritaṁ 1 vane
dhenuva vacchagiddhāva kathaṁ maddi karissasi.
Disvā sampatite ghore dummaggesu plavaṅgame
akhettaññāya te maddi bhavissate mahabbhayaṁ.
Yā tvaṁ sivāya sutvāna muhuṁ uttasate 2 pure
sā tvaṁ vaṅkaṁ anuppattā kathaṁ maddi karissasi.
Ṭhite majjhantike kāle sannisinnesu pakkhisu
suṇateva brahāraññaṁ tattha kiṁ gantumicchasi.

[1093] Tamabravi rājaputtī maddī sabbaṅgasobhanā
yāni etāni akkhāsi vane paṭibhayāni me
sabbāni abhisambhossaṁ gacchaññeva rathesabha.
Kāsaṁ kusaṁ potakilaṁ usiraṁ muñjapabbajaṁ
urasā panūdahissāmi nāssa hessāmi dunnayā.
Bahūhi vattacariyāhi kumārī vindate patiṁ
udarassuparodhena gohanuveṭṭhanena ca
aggissa pāricariyāya udakummujjanena ca
vedhabyaṁ 3 kaṭukaṁ loke gacchaññeva rathesabha.
Apissā hoti appatto ucchiṭṭhaṁ paribhuñjituṁ 4
yo naṁ hatthe gahetvāna akāmaṁ parikaḍḍhati
vedhabyaṁ kaṭukaṁ loke gacchaññeva rathesabha.
1 Ma. sañcarataṁ. 2 Ma. uttasayī. 3 Sī. Yu. vedhabbaṁ. ito paraṁ īdisameva.
4 Ma. ucchiṭṭhampi bhuñjituṁ.
Kesaggahaṇamukkhepā bhūmyā ca parisumbhanā
datvā ca no pakkamati bahuṁ dukkhaṁ anappakaṁ
vedhabyaṁ kaṭukaṁ loke gacchaññeva rathesabha.
Sukkacchavī vedhaverā datvā subhaggamānino
akāmaṁ parikaḍḍhanti ulūkaññeva vāyasā
vedhabyaṁ kaṭukaṁ loke gacchaññeva rathesabha.
Api ñātikule phīte kaṁsappajjotane vasaṁ
nevātivākyaṁ na labhe bhātūhi sakhinīhi 1 ca
vedhabyaṁ kaṭukaṁ loke gacchaññeva rathesabha.
Naggā nadī anūdakā naggaṁ raṭṭhaṁ arājikaṁ
itthīpi vidhavā naggā yassāpi dasa bhātaro
vedhabyaṁ kaṭukaṁ loke gacchaññeva rathesabha.
Dhajo rathassa paññāṇaṁ dhūmo paññāṇamaggino
rājā raṭṭhassa paññāṇaṁ bhattā paññāṇamitthiyā
vedhabyaṁ kaṭukaṁ loke gacchaññeva rathesabha.
Yā daliddī daliddassa aḍḍhā aḍḍhassa kittimā
taṁ ve devā pasaṁsanti dukkaraṁ hi karoti sā.
Sāmikaṁ anubandhissaṁ sadā kāsāyavāsinī
paṭhabyāpi abhijjantyā vedhabyaṁ kaṭukitthiyā.
Api sāgarapariyantaṁ bahuvittadharaṁ mahiṁ
1 Ma. sakhinīhipi. Sī. Yu. sakhikāhi ca.
Nānāratanaparipūraṁ nicche vessantaraṁ vinā.
Kathannu tāsaṁ hadayaṁ sukharā vata itthiyo
yā sāmike dukkhitamhi sukhamicchanti attano.
Nikkhamante mahārāje sivīnaṁ raṭṭhavaḍḍhane
tamahaṁ anubandhissaṁ sabbakāmadado hi me.

[1094] Tamabravī mahārājā maddiṁ sabbaṅgasobhanaṁ
ime te daharā puttā jālī kaṇhājinā cubho
nikkhippa lakkhaṇe gaccha mayante posayāmase.

[1095] Tamabravī rājaputtī maddī sabbaṅgasobhanā
piyā me puttakā deva jālī kaṇhājinā cubho
tyamhaṁ tattha ramissanti araññe jīvisokinaṁ.

[1096] Tamabravī mahārājā sivīnaṁ raṭṭhavaḍḍhano
sālīnamodanaṁ bhutvā sucimaṁsūpasecanaṁ
rukkhaphalāni bhuñjantā kathaṁ kāhanti dārakā.
Bhutvā satapale kaṁse sovaṇṇe satarājike
rukkhapattesu bhuñjantā kathaṁ kāhanti dārakā.
Kāsiyāni ca dhāretvā khomakodumbarāni ca
kusacīrāni dhārentā kathaṁ kāhanti dārakā.
Vayhāhi pariyāyitvā sivikāya rathena ca
pattikā paridhāvantā kathaṁ kāhanti dārakā.
Kūṭāgāre sayitvāna nivāte phusitaggaḷe
sayantā rukkhamūlasmiṁ kathaṁ kāhanti dārakā.
Pallaṅkesu sayitvāna gonake citrasanthate
sayantā tiṇasanthāre kathaṁ kāhanti dārakā.
Gandhakena vilimpitvā aggalucandanena ca
rajojallāni dhārentā kathaṁ kāhanti dārakā.
Cāmarīmorahatthehi vījitaṅgā sukhe ṭhitā 1
phuṭṭhā ḍaṁsehi makasehi kathaṁ kāhanti dārakā.