[1067] Uggā ca rājaputtā ca vesiyānā ca brāhmaṇā
hatthārohā anīkaṭṭhā rathikā pattikārakā
nāgadānena khīyanti tasmā pabbājayanti taṁ.

[1068] Hadayaṁ cakkhumpahaṁ dajjaṁ kiṁ me bāhirakaṁ dhanaṁ
hiraññaṁ vā suvaṇṇaṁ vā muttā veḷuriyā maṇi
dakkhiṇaṁ vāmahaṁ 1 bāhuṁ disvā yācakamāgate
dadeyyaṁ na vikampeyyaṁ dāne me ramatī 2 mano.
Kāmaṁ maṁ siviyo sabbe pabbājentu hanantu vā
neva dānā viramissaṁ kāmaṁ chindantu sattadhā.

[1069] Evantaṁ siviyo āhu negamā ca samāgatā
kontimārāya tīrena girimārañjaraṁ pati
yena pabbājitā yanti tena gacchatu subbato.

[1070] Sohaṁ tena gamissāmi yena gacchanti dūsakā
rattindivaṁ me khamatha yāva dānaṁ dadāmihaṁ.

[1071] Āmantayittha rājā naṁ maddiṁ sabbaṅgasobhaniṁ
yaṁ te kiñci mayā dinnaṁ dhanaṁ dhaññañca vijjati
hiraññaṁ vā suvaṇṇaṁ vā muttā veḷuriyā bahū
sabbantaṁ nidaheyyāsi yañca te pettikaṁ dhanaṁ.
1 Ma. vāpahaṁ. 2 Ma. ramate.

[1072] Tamabravi rājaputtī maddī sabbaṅgasobhanā
kuhiṁ deva nidahāmi taṁ me akkhāhi pucchito.

[1073] Sīlavantesu dajjesi dānaṁ maddi yathārahaṁ
na hi dānā paraṁ atthi patiṭṭhā sabbapāṇinaṁ.

[1074] Puttesu maddi dayesi sassuyā sassuramhi ca
yo ca taṁ bhattā maññeyya sakkaccantaṁ upaṭṭhahe.
No ce taṁ bhattā maññeyya mayā vippavasena te
aññaṁ bhattāraṁ pariyesa mā kilittha 1 mayā vinā.

[1075] Ahaṁ hi vanaṁ gacchāmi ghoraṁ vāḷamigāyutaṁ
saṁsayo jīvitaṁ mayhaṁ ekakassa brahāvane.

[1076] Tamabravi rājaputtī maddī sabbaṅgasobhanā
abhumme kathaṁ nu bhaṇasi pāpakaṁ vata bhāsasi.
Nesa dhammo mahārāja yaṁ tvaṁ gaccheyya ekako
ahaṁpi tena gacchāmi yena gacchasi khattiya.
Maraṇaṁ vā tayā saddhiṁ jīvitaṁ vā tayā vinā
tadeva maraṇaṁ seyyo yañce jīve tayā vinā.
Aggiṁ ujjālayitvāna ekajālasamāhitaṁ
tattheva maraṇaṁ 2 seyyo yañce jīve tayā vinā.
Yathā āraññakaṁ nāgaṁ dantiṁ anveti hatthinī
jessantaṁ giriduggesu samesu visamesu ca.
1 Ma. kilittho. 2 Ma. tattha me maraṇaṁ seyyo.
Evantaṁ anugacchāmi putte ādāya pacchato
subharā te bhavissāmi na te hessāmi dubbharā.