[1107] Rājā kumāramādāya rājaputtī ca dārikaṁ
sammodamānā pakkāmuṁ aññamaññaṁ piyaṁvadā.
Dānakaṇḍaṁ nāma.

[1108] Yadi keci manujā enti anumagge paṭipathe
maggante paṭipucchāma kuhiṁ vaṅkatapabbato.
Te tattha amhe passitvā kalūnaṁ paridevayuṁ
1 Ma. tassa taṁ yācito dāsi. 2 Ma. kaniṭṭhikā.
Dukkhante paṭivedenti dūre vaṅkatapabbato.

[1109] Yadi passanti pavane dārakā phalite 1 dume
tesaṁ phalānaṁ hetumhi uparodanti dārakā.
Rodante dārake disvā ubbiggā 2 vipulā dumā
sayamevonamitvāna upagacchanti dārake.
Idaṁ accherakaṁ disvā abbhūtaṁ lomahaṁsanaṁ
sādhukāraṁ pavattesi maddī sabbaṅgasobhanā.
Accheraṁ vata lokasmiṁ abbhūtaṁ lomahaṁsanaṁ
vessantarassa tejena sayamevonatā dumā.

[1110] Saṅkhipiṁsu pathaṁ yakkhā anukampāya dārake
nikkhantadivaseneva cetaraṭṭhamupāgamuṁ.

[1111] Te gantvā dīghamaddhānaṁ cetaraṭṭhamupāgamuṁ
iddhaṁ phītaṁ janapadaṁ bahumaṁsasurodakaṁ.

[1112] Cetiyo parikariṁsu 3 disvā lakkhaṇamāgataṁ
sukhumālī vatāyayyā 4 pattikā paridhāvati.
Vayhāhi pariyāyitvā sivikāya rathena ca
sājja maddī araññasmiṁ pattikā paridhāvati.

[1113] Taṁ disvā cetapāmokkhā rodamānā upāgamuṁ
kacci nu deva kusalaṁ kacci deva anāmayaṁ.
1 Ma. phaline. 2 Ma. ubbiddhā. 3 Ma. parivāriṁsu. 4 Ma. vata ayyā.
Kacci pitā arogā te sivīnañca anāmayaṁ
ko te balaṁ mahārāja ko nu te rathamaṇḍalaṁ.
Anassako arathako dīghamaddhānamāgato
kaccāmittehi pakato anuppattosimaṁ disaṁ.

[1114] Kusalañceva me sammā atho sammā anāmayaṁ
atho pitā arogā me sivīnañca anāmayaṁ.
Ahaṁ hi kuñjaraṁ dajjaṁ īsādantaṁ uruḷhavaṁ
khettaññuṁ sabbayuddhānaṁ sabbasetaṁ gajuttamaṁ.
Paṇḍukambalasañchannaṁ pabhinnaṁ sattumaddanaṁ
dantiṁ savālavījaniṁ setaṁ kelāsasādisaṁ.
Sasetacchattaṁ supattheyyaṁ 1 sāthabbanaṁ sahatthipaṁ
aggayānaṁ rājavāhiṁ brāhmaṇānaṁ adāsahaṁ.
Tasmiṁ me siviyo kuddhā pitā cupahatomano
avaruddhasi maṁ rājā vaṅkaṁ gacchāmi pabbataṁ
okāsaṁ sammā jānātha vane yattha vasemhase 2 .

[1115] Svāgatante mahārāja atho te adurāgataṁ
issarosi anuppatto yaṁ idhatthi pavedaya.
Sākaṁ bhiṁsaṁ madhuṁ maṁsaṁ suddhaṁ sālīnamodanaṁ
paribhuñja mahārāja pāhuno nosi āgato.
1 Ma. saupādheyyaṁ. 2 Ma. vasāmase. ito paraṁ īdisameva.

[1116] Paṭiggahitaṁ yaṁ dinnaṁ sabbassa agghiyaṁ kataṁ
avaruddhasi maṁ rājā vaṅkaṁ gacchāmi pabbataṁ
okāsaṁ sammā jānātha vane yattha vasemhase.