[937] Te pāvisuṁ akkhamadena mattā
rājā kurūnaṁ puṇṇako cāpi yakkho
rājā kaliṁ viccinamaggahesi
kaṭamaggahi puṇṇako nāma yakkho
te tattha jūte ubhaye 1 samāgate
raññaṁ sakāse sakhinañca majjhe
ajesi yakkho naravīraseṭṭhaṁ
tatthappanādo tumulo babhūva.

[938] Jayo mahārāja parājayo ca
āyūhataṁ aññatarassa hoti
janinda jinnosi 2 varandhanena
jito ca me khippamavākarohi.

[939] Hatthī gavassā maṇikuṇḍalā ca
yañcāpi mayhaṁ ratanaṁ paṭhabyā
gaṇhāhi kaccāna varaṁ dhanānaṁ
1 ubhayotipi. 2 Ma. jinosi. Yu. jitosi.
Ādāya yenicchasi tena gaccha.

[940] Hatthī gavassā maṇikuṇḍalā ca
yañcāpi tuyhaṁ ratanaṁ paṭhabyā
tesaṁ varo vidhuro nāma kattā
so me jito taṁ me avākarohi.

[941] Attā ca me so saraṇaṁ gatī ca
dīpo ca leṇo ca parāyano ca
asantuleyyo mama so dhanena
pāṇena me sadiso esa kattā.

[942] Ciraṁ vivādo mama tuyhamassa 1
kāmañca pucchāma tameva gantvā
eseva no vivaratu etamatthaṁ
yaṁ vakkhati hotu tathā 2 ubhinnaṁ.

[943] Addhā hi saccaṁ bhaṇasi na ca māṇava sāhasaṁ
tameva gantvā pucchāma tena tussāmubho janā.

[944] Saccaṁ nu devā vidahū kurūnaṁ
dhamme ṭhitaṁ vidhurannāmamaccaṁ
dāsosi rañño uda vāsi ñāti
vidhuroti saṅkhyā 3 katamosi loke.

[945] Āmāyadāsāpi bhavanti heke
1 Ma. tuyhañcassa. 2 Ma. kathā. 3 Ma. saṅkhā.
Dhanena kītāpi bhavanti dāsā
sayaṁpi dāsā upayanti heke 1
bhayā panuṇṇāpi 2 bhavanti dāsā
ete narānaṁ caturova dāsā.
Addhā hi yonito ahampi jāto
bhavo ca rañño abhavo ca rañño
dāsohaṁ devassa paraṁpi gantvā
dhammena maṁ māṇava tuyha dajjā.

[946] Ayaṁpi 3 dutiyo vijayo mamajja
puṭṭho hi kattā vivarittha 4 pañhaṁ
adhammarūpo vata rājaseṭṭho
subhāsitaṁ nānujānāsi mayhaṁ.