[917] Kaccāyano māṇavakosmi rāja
anūnanāmo iti mavhayanti
aṅgesu me ñātayo bandhavā ca
akkhena devasmi idhānupatto.

[918] Kiṁ māṇavassa ratanāni atthi
ye taṁ jinanto hare akkhadhutto
bahūni rañño ratanāni atthi
te tvaṁ daliddo kathamavhayesi.
1 Ma. aggamā. 2 Yu. abhibhosi.

[919] Dhanāharo 1 nāma maṇi mamāyaṁ
dhanāharaṁ 2 maṇiratanaṁ uḷāraṁ
imañca ājaññaṁ amittatāpanaṁ
etaṁ me jinitvā hare akkhadhutto.

[920] Eko maṇi māṇava kiṁ karissati
ājāniyeko pana kiṁ karissati
bahūni rañño ratanāni atthi
ājāniyā vātajavā anappakā.
Dohaḷakaṇḍaṁ nāma.

[921] Idañca me maṇiratanaṁ passa tvaṁ dvipaduttama
itthīnaṁ viggahā cettha purisānañca viggahā.
Migānaṁ viggahā cettha sakuṇānañca viggahā
nāgarāje supaṇṇe ca 3 maṇimhi passa nimmitaṁ.

[922] Hatthānīkaṁ rathānīkaṁ asse pattī ca vammine 4
caturaṅginimaṁ senaṁ maṇimhi passa nimmitaṁ.
Hatthārohe anīkaṭṭhe rathike pattikārake
balaggāni viyūhāni 5 maṇimhi passa nimmitaṁ.

[923] Puraṁ aṭṭālasampannaṁ 6 bahupākāratoraṇaṁ
siṅghāṭake subhūmiyo maṇimhi passa nimmitaṁ.
1 Ma. manoharo. 2 Ma. manoharaṁ. 3 Ma. nāgarājā supaṇṇā ca. 4 Sī.Yu.
dhajāni ca. 5 Ma. viyūḷhāni. 6 Ma. uddhāpasampannaṁ. Sī.Yu. uddapasampannaṁ.
Esikā parikhāyo ca palīghaṁ aggaḷāni ca
aṭṭālake ca dvāre ca maṇimhi passa nimmitaṁ.

[924] Passa toraṇamaggesu nānādijagaṇā bahū
haṁsā koñcā mayūrā ca cakkavākā ca kukkuhā.
Kuṇālakā bahū citrā sikhaṇḍī jīvajīvakā
nānādijagaṇākiṇṇaṁ maṇimhi passa nimmitaṁ.

[925] Passa nagaraṁ supākāraṁ abbhūtaṁ lomahaṁsanaṁ
samussitaddhajaṁ rammaṁ suvaṇṇavālukasanthataṁ.
Passettha paṇṇasālāyo vibhattā bhāgaso mitā
nivesane nivese ca sandhibyūhe pathatthiyo 1 .

[926] Pānāgāre ca soṇḍe ca suddā 2 odaniyā gharā
vesī ca gaṇikāyo ca maṇimhi passa nimmitaṁ.
Mālākāre ca rajake gandhike atha dussike
suvaṇṇakāre maṇikāre maṇimhi passa nimmitaṁ.
Āḷārike ca sūde ca naṭanaṭṭakagāyine 3
pāṇissare kumbhathūnike maṇimhi passa nimmitaṁ.