[897] Mātā hi tava irandati 3
vidhurassa hadayaṁ dhaniyyati
dullabhaṁ hi vidhurassa dassanaṁ
ko vidhuraṁ idhamānayissati.

[898] Taṁ bhattāraṁ 4 pariyesanaṁ cara
yo vidhuraṁ idhamānayissati.
Pituno ca sā sutvāna vākyaṁ
rattiṁ nikkhamma avassutī cari.

[899] Ke gandhabbe ke rakkhase ca nāge
ke kiṁpurise athavāpi mānuse
1-2 Sī. Yu. dullabhe ... dassane. 3 Ma. irandhati. ito paraṁ īdisameva.
4 Ma. tassa bhattupariyesanaṁ.
Ke paṇḍite sabbakāmadade
dīgharattaṁ bhattā me bhavissati.

[900] Assāsa hessāmi te pati
bhattā te hessāmi anindalocane
paññāhi mama tathāvidhāhi
assāsa hessasi bhariyā mama.

[901] Avacāsi puṇṇakaṁ irandatī
pubbapathānugatena cetasā
ehi gacchāma pitu mamantike
eseva te etamatthaṁ pavakkhati.

[902] Alaṅkatā suvasanā mālinī candanussadā
yakkhaṁ hatthe gahetvāna pitu santikamupāgami.

[903] Nāgavara vaco suṇāhi me
paṭirūpaṁ paṭipajja suṅkiyaṁ
patthemi ahaṁ irandatiṁ
tāya samaṅgiṁ karohi maṁ tuvaṁ.
Sataṁ hatthī sataṁ assā sataṁ assatarī rathā
sataṁ valabhiyo puṇṇā nānāratnassa kevalā
te nāga paṭipajjassu dhītaraṁ dehirandatiṁ.

[904] Yāva āmantaye ñātī mitte ca suhadajjane
anāmantakatakammaṁ taṁ pacchā anutappati.

[905] Tato so varuṇo nāgo pavisitvā nivesanaṁ
bhariyaṁ āmantayitvāna idaṁ vacanamabravi.
Ayaṁ so puṇṇako yakkho yācati maṁ irandatiṁ
bahunā vittalābhena tassa dema piyaṁ mama.

[906] Na dhanena na vittena labbhā amhaṁ irandatī
sace ca kho hadayaṁ paṇḍitassa
dhammena laddhā idha māhareyya
etena vittena kumāri labbhā
nāññaṁ dhanaṁ uttariṁ patthayāma.