[867] Athāsanamhā oruyha rājā byamhitamānaso 3
nāradaṁ paripucchanto idaṁ vacanamabravi.
Kuto nu āgacchasi devavaṇṇī
obhāsayaṁ sabbadisā 4 candimā va
akkhāhi me pucchito nāmagottaṁ
kathannu jānanti manussaloke.

[868] Ahañhi devato idāni emi
obhāsayaṁ sabbadisā 4 candimā va
akkhāmi te pucchito nāmagottaṁ
jānanti maṁ nārado kassapo cāti.

[869] Acchariyarūpaṁ 5 tava yādisañca
vehāyasaṁ gacchasi tiṭṭhasi ca
pucchāmi taṁ nārada etamatthaṁ
atha kena vaṇṇena tavāyamiddhi.
1 Ma. addā. 2 Ma. puratthato. 3 Ma. byathitamānaso. 4 Sī. Yu. saṁvariṁ.
5 Ma. accherarūpaṁ.

[870] Saccañca dhammo ca damo ca cāgo
guṇā mamete pakatā purāṇā
teheva dhammehi susevitehi
manojavo yenakāmaṁ gatosmi.

[871] Acchariyamācikkhasi 1 puññasiddhiṁ
sace hi 2 evaṁ yathā tvaṁ vadesi
pucchāmi taṁ nārada etamatthaṁ
puṭṭho ca me sādhu viyākarohi.

[872] Pucchassu maṁ rāja tavesa attho
yaṁ saṁsayaṁ kurute bhūmipāla
ahantaṁ nissaṁsayataṁ gamemi
nayehi ñāyehi ca hetubhi ca.

[873] Pucchāmi taṁ nārada etamatthaṁ
puṭṭho ca me nārada mā musā bhaṇi
atthi nu devā pitaro nu atthi
loko paro atthi jano yamāha.

[874] Attheva devā pitaro ca atthi
loko paro atthi jano yamāha
kāmesu giddhā ca narā pamuḷhā
lokaṁ paraṁ na vidū mohayuttā.
1 Ma. acchera-. 2 Ma. sace hi etehi yathā vadesi.

[875] Atthīti ce nārada saddahāsi
nivesanaṁ paraloke matānaṁ
idheva me pañcasatāni dehi
dassāmi te paraloke sahassaṁ.

[876] Dajjemu kho pañcasatāni bhoto
jaññāmu ce sīlavantaṁ vadaññuṁ
luddantaṁ bhontaṁ niraye vasantaṁ
ko codaye paraloke sahassaṁ.
Idheva yo hoti adhammasīlo 1
pāpācāro alaso luddakammo
na paṇḍitā tasmiṁ iṇaṁ dadanti
na hi āgamo hoti tathāvidhamhā.
Dakkhañca posaṁ manujā viditvā
uṭṭhānakaṁ sīlavantaṁ vadaññuṁ
sayameva bhogehi nimantayanti
kammaṁ karitvā punamāharesi.