[847] Kassapassa vaco sutvā alāto etadabravi
yathā bhadanto bhaṇati mayhametaṁva ruccati.
Ahaṁpi purimaṁ jātiṁ sare saṁsaritattano
piṅgalo nāmahaṁ āsiṁ luddo goghātako pure.
Bārāṇasiyaṁ phītāyaṁ bahuṁ pāpaṁ kataṁ mayā
bahū mayā hatā pāṇā mahiṁsā sūkarā ajā.
Tato cutāhaṁ idha jāto iddhe senāpatikule
natthi nūna phalaṁ pāpe 1 yohaṁ 2 na nirayaṁ gato.

[848] Athettha vījako nāma dāso āsi paṭajjarī 3 .
Uposathaṁ upavasanto guṇasantikupāgami.
Kassapassa vaco sutvā alātassa ca bhāsitaṁ
passasanto muhuṁ uṇhaṁ rudaṁ assūni vattayi.

[849] Tamanupucchi vedeho kimatthaṁ samma rodasi
kinte sutaṁ vā diṭṭhaṁ vā kiṁ maṁ vedesi vedanaṁ.

[850] Vedehassa vaco sutvā vījako etadabravi
natthi me vedanā dukkhā mahārāja suṇohi me.
Ahaṁpi purimaṁ jātiṁ sarāmi sukhamattano
1 Ma. pāpaṁ. 2 Sī. Yu. sohaṁ. 3 Ma. paṭaccarī.
Sāketāhaṁ pure āsiṁ bhāvaseṭṭhī guṇe rato.
Sammato brāhmaṇibbhānaṁ saṁvibhāgarato suci
na cāpi pāpakaṁ kammaṁ sarāmi katamattano.
Tato cutāhaṁ vedeha idha jāto duritthiyā
gabbhamhi kumbhadāsiyā yato jāto suduggato.
Evampi duggato santo samacariyamadhiṭṭhito
upaḍḍhabhāgaṁ bhattassa dadāmi yo me icchati.
Cātuddasiṁ pañcadasiṁ sadā upavasāmahaṁ
na cāpi pāṇe hiṁsāmi theyyañcāpi vivajjayiṁ.
Sabbameva hi nūnetaṁ suciṇṇaṁ bhavati nipphalaṁ
niratthaṁ maññidaṁ sīlaṁ alāto bhāsatī yathā.
Kalimeva nūna gaṇhāmi asippo dhuttako yathā
kaṭaṁ alāto gaṇhāti kitavo sikkhito yathā.
Dvāraṁ nappaṭipassāmi yena gacchāmi suggatiṁ
tasmā rāja parodāmi sutvā kassapabhāsitaṁ.

[851] Vījakassa vaco sutvā rājā aṅgatimabravi
natthi dvāraṁ sugatiyā niyataṁ 1 kaṅkha vījaka.
Sukhaṁ vā yadi vā dukkhaṁ niyataṁ 2 kira labbhati
saṁsārasuddhi sabbesaṁ mā turito 3 anāgate.
Ahampi pubbe kalyāṇo brāhmaṇibbhesu pāvaṭo 4
1 Ma. niyatiṁ. 2 Ma. niyatiyā. 3 Ma. turittho. 4 Ma. byāvaṭo.
Vohāramanusāsanto ratihīno tadantarā.

[852] Punapi bhante dakkhemu saṅgati ce bhavissati.
Idaṁ vatvāna vedeho paccagā sannivesanaṁ.

[853] Tato ratyā vivasane upaṭṭhānampi aṅgati
amacce sannipātetvā idaṁ vacanamabravi.
Candake me vimānasmiṁ sadā kāme vidhentu me
mā mupagacchuṁ 1 atthesu guyhappakāsiyesu ca.
Vijayo ca sunāmo ca senāpati alātako
ete atthe nisīdantu vohārakusalā tayo.
Idaṁ vatvāna vedeho kāmeva bahu maññatha
na cāpi brāhmaṇibbhesu atthe kismiñci pāvaṭo 2 .

[854] Tato dvesattarattassa vedehassatrajā piyā
rājakaññā rucā 3 nāma dhātimātaramabravi.
Alaṅkarotha maṁ amma sakhiyo ca alaṅkarontu me
suve paṇṇaraso dibyo gacchaṁ pitussa santike 4 .
Tassā mālyaṁ abhihariṁsu candanañca mahārahaṁ
maṇisaṅkhamuttāratanaṁ nānāratte ca ambare.
Tañca sovaṇṇamaye pīṭhe nisinnaṁ bahukitthiyo
parikīriya asobhiṁsu 5 rucaṁ ruciravaṇṇiniṁ.

[855] Sā ca sakhīmajjhagatā sabbābharaṇabhūsitā
1 Ma. mā upagaccha. 2 Ma. byāvaṭo. 3 Sī. Yu. rujā. ito paraṁ īdisameva.
4 Ma. issarasantike. 5 pasobhiṁsu.
Sateritā 1 abbhamiva candakaṁ pāvisī rucā.
Upasaṅkamitvā vedehaṁ vanditvā vinaye rataṁ
suvaṇṇakhacite 2 pīṭhe ekamantaṁ upāvisi.

[856] Tañca disvāna vedeho accharānaṁva saṅgamaṁ
rucaṁ sakhimajjhagataṁ idaṁ vacanamabravi.
Kacci ramasi pāsāde anto pokkharaṇiṁ pati
kacci bahuvidhaṁ khajjaṁ sadā abhiharanti te.
Kacci bahuvidhaṁ mālyaṁ ocinitvā kumāriyo
gharake karotha paccekaṁ khiḍḍā ratiratā ahu 3 .
Kena vā vikalaṁ tuyhaṁ kiṁ khippaṁ āharantu te
mano karassu kuṭṭamukhī 4 api candasamaṁ 5 hi te.