[727] Mamaṁ disvāna āyantaṁ sabbakāmasamiddhinaṁ
indriyāni ahaṭṭhāni sāvaṁ jātaṁ mukhaṁ tava.
Padumaṁ yathā hatthagataṁ pāṇinā parimadditaṁ
sāvaṁ jātaṁ mukhaṁ tuyhaṁ mamaṁ disvāna edisaṁ.

[728] Kacci nu te nābhissasi kacci te atthi vedanā
yena sāvaṁ mukhaṁ tuyhaṁ mamaṁ disvāna āgataṁ.

[729] Supinaṁ tāta addakkhiṁ ito māsaṁ adhogataṁ
dakkhiṇaṁ viya me bāhuṁ chetvā ruhiramakkhitaṁ
puriso ādāya pakkāmi mama rodantiyā sati.
Yatohaṁ supinamaddakkhiṁ sudassana vijānāhi
tato divā vā rattiṁ vā sukhaṁ me nopalabbhati.

[730] Yaṁ pubbe parivāriṁsu 1 kaññā ruciraviggahā
hemajālapaṭicchannā bhūridatto na dissati.
Yaṁ pubbe parivāriṁsu 1 nettiṁsavaradhārino
kaṇikārāva samphullā bhūridatto na dissati.
Handadāni gamissāma bhūridattanivesanaṁ
dhammaṭṭhaṁ sīlasampannaṁ passāma tava bhātaraṁ.

[731] Tañca disvāna āyantaṁ bhūridattassa mātaraṁ
bāhā paggayha pakkanduṁ bhūridattassa bhariyāyo.
Puttanteyye na jānāma ito māsaṁ adhogataṁ
1 Sī. Yu. paricāriṁsu.
Mataṁ vā yadi vā jīvaṁ bhūridattaṁ yasassinaṁ.

[732] Sakuṇī hataputtāva suññaṁ disvā kulāvakaṁ
ciraṁ dukkhena jhāyissaṁ bhūridattaṁ apassatī.
Kururī hatacchāpāva 1 suññaṁ disvā kulāvakaṁ
ciraṁ dukkhena jhāyissaṁ bhūridattaṁ apassatī.
Sā nūna cakkavakkīva pallalasmiṁ anūdake
ciraṁ dukkhena jhāyissaṁ bhūridattaṁ apassatī.
Kammārānaṁ yathā ukkā anto jhāyati no bahi
evaṁ jhāyāmi sokena bhūridattaṁ apassatī.

[733] Sālāva sampamadditā 2 mālutena pamadditā
senti puttā ca dārā ca bhūridattanivesane.

[734] Tesaṁ sutvāna nigghosaṁ bhūridattanivesane
ariṭṭho ca subhogo 3 ca padhāviṁsu 4 anantarā
amma assāsa mā soci evaṁdhammā hi pāṇino
cavanti upapajjanti esāssa pariṇāmatā.

[735] Ahaṁpi tāta jānāmi evaṁdhammā hi pāṇino
sokena ca paretasmiṁ bhūridattaṁ apassatī
ajja ce me imaṁ rattiṁ sudassana vijānāhi
bhūridattaṁ apassantī maññe hissāmi jīvitaṁ.

[736] Amma assāsa mā soci ānayissāma bhātaraṁ
1 Ma. kurarī hatachāpāva. 2 Ma. sampamathitā. 3 Sī. Yu. subhago. 4 Sī. Yu.
upadhāviṁsu.
Disodisaṁ gamissāma bhātupariyesanaṁ caraṁ
pabbate giriduggesu gāmesu nigamesu ca
orena sattarattassa 1 bhātaraṁ passa āgataṁ.