[687] Yaṅkiñci ratanamatthi dhataraṭṭhanivesane
sabbāni te upayantu dhītaraṁ dehi rājino.

[688] Na no vivāho nāgehi katapubbo kudācanaṁ
taṁ vivāhaṁ asaṁyuttaṁ kathaṁ amhe karomase.

[689] Jīvitaṁ nūna te cattaṁ raṭṭhaṁ vā manujādhipa
na hi nāge kuppitamhi ciraṁ jīvanti tādisā.
Yo tvaṁ deva manussosi iddhimantaṁ aniddhimā
varuṇassa niyaṁ puttaṁ yāmunaṁ atimaññasi.

[690] Nātimaññāmi rājānaṁ dhataraṭṭhaṁ yasassinaṁ
dhataraṭṭho hi nāgānaṁ bahūnamapi issaro.
Ahi mahānubhāvopi na me dhītaramāraho
khattiyo ca videhānaṁ abhijātā samuddajā.

[691] Kambalassatarā uṭṭhentu sabbe nāge nivedaya
bārāṇasiṁ pavajjantu mā ca kañci 2 viheṭhayuṁ.
1 Ma. avattathāti. 2 Sī. Yu. kiñci.

[692] Nivesanesu sobbhesu rathiyā caccaresu ca
rukkhaggesu ca lambantu vitatā toraṇesu ca.
Ahampi sabbasetena mahatā sumahaṁ puraṁ
parikkhipissaṁ bhogehi kāsīnaṁ janayaṁ bhayaṁ.

[693] Tassa taṁ vacanaṁ sutvā uragānekavaṇṇino
bārāṇasiṁ pavajjiṁsu na ca kañci viheṭhayuṁ.
Nivesanesu sobbhesu rathiyā caccaresu ca
rukkhaggesu ca lambiṁsu vitatā toraṇesu ca.
Ete disvāna lambante pūthū kandiṁsu nāriyo
nāge soṇḍikate disvā passasante mahuṁ mahuṁ 1 .
Bārāṇasī sabyādhitā 2 āturā samapajjatha
bāhā paggayha pakkanduṁ dhītaraṁ dehi rājino.

[694] Pupphābhihārassa vanassa majjhe
ko lohitakkho vihatantaraṁso 3
kā kambukāyūradharā suvatthā
tiṭṭhanti nāriyo dasa vandamānā.
Ko tvaṁ brahābāhu vanassa majjhe
virocasi ghatasitto va aggi
mahesakkho aññatarosi yakkho
udāhu nāgosi mahānubhāvo.
1 Ma. muhuṁ muhuṁ. 2 Ma. pabyadhitā. 3 Ma. vitatantaraṁso.

[695] Nāgohamasmi iddhimā tejasī 1 duratikkamo
ḍaṁseyyaṁ tejasā kuddho phītaṁ janapadaṁ api.
Samuddajā hi me mātā dhataraṭṭho ca me pitā
sudassanakaniṭṭhosmi bhūridattoti maṁ vidū.

[696] Yaṁ gambhīraṁ sadāvaṭṭaṁ rahadaṁ bhesmaṁ 2 pekkhasi
eso dibyo mamāvāso anekasataporiso.
Mayūrakoñcābhirudaṁ nīlodaṁ vanamajjhato
yamunaṁ pavisa mā bhīto khemaṁ vattavatiṁ 3 sivaṁ.