[637] Atītaṁ mānusaṁ kammaṁ dukkaraṁ durabhisambhavaṁ
na taṁ sakkomi mocetuṁ tvaṁ pajānassu senaka.
1 Sī. Yu. tvampi jānassu.

[638] Suṇohi metaṁ vacanaṁ passasenaṁ mahabbhayaṁ
senakadāni pucchāmi kiṁ kiccaṁ idha maññasi.

[639] Aggiṁ vā dvārato dema gaṇhāmase vikantanaṁ 1
aññamaññaṁ vadhitvāna khippaṁ hissāma jīvitaṁ
mā no rājā brahmadatto ciraṁ dukkhena mārayi.

[640] Suṇohi metaṁ vacanaṁ passasenaṁ mahabbhayaṁ
pukkusadāni pucchāmi kiṁ kiccaṁ idha maññasi.

[641] Visaṁ khāditvā miyyāma khippaṁ hissāma jīvitaṁ
mā no rājā brahmadatto ciraṁ dukkhena mārayi.

[642] Suṇohi metaṁ vacanaṁ passasenaṁ mahabbhayaṁ
kāmindadāni pucchāmi kiṁ kiccaṁ idha maññasi.

[643] Rajjuyā bajjha miyyāma papātā papatemase 2
mā no rājā brahmadatto ciraṁ dukkhena mārayi.

[644] Suṇohi metaṁ vacanaṁ passasenaṁ mahabbhayaṁ
devindadāni pucchāmi kiṁ kiccaṁ idha maññasi.

[645] Aggiṁ vā dvārato dema gaṇhāmase vikantanaṁ
aññamaññaṁ vadhitvāna khippaṁ hissāma jīvitaṁ
na no sakkoti mocetuṁ sukheneva mahosadho.

[646] Yathā kadalino sāraṁ anvesaṁ nādhigacchati
evaṁ anvesamānā naṁ pañhaṁ nājjhagamāmase.
1 Sī. Yu. vikattanaṁ. 2 Ma. papatāmase.
Yathā simbalino sāraṁ anvesaṁ nādhigacchati
evaṁ anvesamānā naṁ pañhaṁ nājjhagamāmase.
Adese vata no vuṭṭhaṁ kuñjarānaṁvanūdake
sakāse dummanussānaṁ bālānaṁ avijānataṁ
ubbedhati me hadayaṁ mukhañca parisussati
nibbutiṁ nādhigacchāmi aggidaḍḍhova ātape.
Kammārānaṁ yathā ukkā anto jhāyati no bahi
evampi hadayaṁ mayhaṁ anto jhāyati no bahi.