[627] Dadāmidāni te bhariyaṁ nāriṁ sabbaṅgasobhaniṁ
suvaṇṇena paṭicchannaṁ dāsīgaṇapurakkhitaṁ.

[628] Hatthī assā rathā patti senā tiṭṭhanti cammikā
ukkā padittā jhāyanti kinnu maññanti paṇḍitā.

[629] Hatthī assā rathā patti senā tiṭṭhanti cammikā
ukkā padittā jhāyanti kinnu kāhanti paṇḍita.

[630] Rakkhati taṁ mahārāja cūḷaneyyo mahabbalo
paduṭṭho te brahmadatto 1 pāto taṁ ghātayissati.

[631] Ubbedhati me hadayaṁ mukhañca parisussati
nibbutiṁ nādhigacchāmi aggidaḍhḍhova ātape.
Kammārānaṁ yathā ukkā anto jhāyati no bahi
evampi hadayaṁ mayhaṁ anto jhāyati no bahi.

[632] Pamatto mantanātīto bhinnamantosi khattiya
idāni kho taṁ tāyantu paṇḍitā mantino janā.
Akatvāmaccassa vacanaṁ atthakāmahitesino
attapītirato rāja migo kūṭeva ohito.
Yathāpi maccho balisaṁ vaṅkaṁ maṁsena chāditaṁ
āmagiddho na jānāti maccho maraṇamattano.
Evameva tuvaṁ rāja cūḷaneyyassa dhītaraṁ
1 Ma. paduṭṭho brahmadattena.
Kāmagiddho na jānāsi macchova maraṇamattano.
Sace gacchasi pañcālaṁ khippamattaṁ jahissasi
migaṁ panthānupannaṁva mahantaṁ bhayamessasi.
Anariyarūpo puriso janinda
ahīva uccaṅkagato ḍaseyya
na tena mittiṁ kayirātha dhīro
dukkho have kāpurisena saṅgamo.
Yaṁ tveva 1 jaññā puriso 2 janinda
sīlavāyaṁ bahussuto
teneva mittiṁ kayirātha dhīro
sukho have sappurisehi saṅgamo.

[633] Bālo tuvaṁ elamūgosi rāja
yo uttamatthāni mayī lapittho
kimevahaṁ naṅgalakoṭivaḍḍho
atthāni jānissaṁ 3 yathāpi aññe.
Imaṁ gale gahetvāna nāsetha vijitā mama
yo me ratanalābhassa antarāyāya bhāsati.

[634] Mahosadha atītena nānuvijjhanti paṇḍitā
kiṁ maṁ assaṁva sambandhaṁ patodeneva vijjhasi.
Sace passasi mokkhaṁ 4 me khemaṁ vā pana passasi
1 Ma. yadeva. 2 Ma. purisaṁ. 3 Ma. jānāmi. 4 Ma. mokkhaṁ vā.
Teneva maṁ anusāsa kiṁ atītena vijjhasi.

[635] Atītaṁ mānusaṁ kammaṁ dukkaraṁ durabhisambhavaṁ
na taṁ sakkomi mocetuṁ tvaṁ pajānassu 1 khattiya.
Santi vehāyasā nāgā iddhimanto yasassino
tepi ādāya gaccheyyuṁ yassa honti tathāvidhā.
Santi vehāyasā assā iddhimanto yasassino
tepi ādāya gaccheyyuṁ yassa honti tathāvidhā.
Santi vehāyasā pakkhī iddhimanto yasassino
tepi ādāya gaccheyyuṁ yassa honti tathāvidhā.
Santi vehāyasā yakkhā iddhimanto yasassino
tepi ādāya gaccheyyuṁ yassa honti tathāvidhā.
Atītaṁ mānusaṁ kammaṁ dukkaraṁ durabhisambhavaṁ
na taṁ sakkomi mocetuṁ antalikkhena khattiya.

[636] Atīradassī puriso mahante udakaṇṇave
yattha so labhate gādhaṁ tattha so vindate sukhaṁ.
Evaṁ amhañca rañño ca tvaṁ patiṭṭhā mahosadha
tvaṁ nosi mantīnaṁ seṭṭho amhe dukkhā pamocaya.