[607] Jānāsi kho rāja mahānubhāvo
mahabbalo cūḷanībrahmadatto
rājā ca taṁ icchati māraṇatthaṁ
migaṁ yathā okacarena luddo.
Yathāpi maccho balisaṁ vaṅkaṁ maṁsena chāditaṁ
āmagiddho na jānāti maccho maraṇamattano.
Evameva tuvaṁ rāja cūḷaneyyassa dhītaraṁ
kāmagiddho na jānāsi macchova maraṇamattano.
Sace gacchasi pañcālaṁ khippamattaṁ jahissasi
migaṁ panthānupannaṁva mahantaṁ bhayamessasi.

[608] Mayameva bālāmhase elamūgā
ye uttamatthāni tayī lapimhā
Kimeva tvaṁ naṅgalakoṭivaḍḍho
atthāni jānāsi yathāpi aññe.

[609] Imaṁ gale gahetvāna nāsetha vijitā mama
yo me ratanalābhassa antarāyāya bhāsati.

[610] Tato ca so apakkamma vedehassa upantikā
atha āmantayī dūtaṁ mādhuraṁ 1 suvapaṇḍitaṁ.
Ehi samma haritapakkha veyyāvaccaṁ karohi me
atthi pañcālarājassa sālikā sayanapālikā.
Taṁ santhavena 2 pucchassu sā hi sabbassa kovidā
sā nesaṁ sabbaṁ jānāti rañño ca kosiyassa ca.
Āmoti so paṭisutvā mādhuro 3 suvapaṇḍito
agamāsi haritapakkho sālikāya upantikaṁ.
Tato ca kho so gantvāna mādhuro suvapaṇḍito
atha āmantayī sugharaṁ sālikaṁ mañjubhāṇikaṁ.
Kacci te sughare khamanīyaṁ kacci vese 4 anāmayaṁ
kacci te madhunā lājaṁ labbhate sughare tuvaṁ.
Kusalañceva me samma atho samma anāmayaṁ
atho me madhunā lājā labbhate suvapaṇḍita.
Kuto nu samma āgamma kassa vā pahito tuvaṁ
1 Ma. mādharaṁ. Yu. māṭharaṁ. 2 pattharenātipi pāṭho. Ma. bandhanena.
3 Ma. mādharo. ito paraṁ īdisameva. 4 Ma. vesse.
Na ca mesi ito pubbe diṭṭho vā yadi vā suto.

[611] Ahosiṁ sivirājassa pāsāde sayanapālako
tato so dhammiko rājā bandhe moceti bandhanā.
Tassa mekā dutiyāsi sālikā mañjubhāṇikā
taṁ tattha avadhi seno pekkhato sughare mama.
Tassā kāmā hi sammatto āgatosmi tavantike
sace kareyu 1 okāsaṁ ubhayeva vasemhase 2 .

[612] Suvo ca suviṁ kāmeyya sāliko pana sālikaṁ
suvassa sālikāyeva saṁvāso hoti kīdiso.

[613] Yo yaṁ kāme 3 kāmayati api caṇḍālikāmapi
sabbo hi sadiso hoti natthi kāme asādiso.
Atthi jambāvatī 4 nāma mātā sivissa rājino
sā piyā vāsudevassa kaṇhassa ca mahesiyā 5 .
Ratanavatī 6 kiṁpurisī sāpi vacchaṁ akāmayi
manusso migiyā saddhiṁ natthi kāme asādiso.
Handa khohaṁ gamissāmi sālike mañjubhāṇike
paccakkhānupadaṁ hetaṁ atimaññasi nūna maṁ.

[614] Na sirī taramānassa mādhura suvapaṇḍita
idheva tāva acchassu yāva rājāna dakkhasi
sossi saddaṁ mudiṅgānaṁ ānubhāvañca rājino.
1 Ma. kareyya. 2 Ma. vasāmhe. 3 Sī. Yu. yaṁ yaṁ kāmī. 4 Ma. jampāvatī.
5 Ma. kaṇhassa mahesī piyā. 6 Ma. raṭṭhavatī. Sī. Yu. rathavatī.

[615] Yo nu khvāyaṁ tibbo saddo tirojanapade suto
dhītā pañcālarājassa osadhī viya vaṇṇinī
taṁ dassati videhānaṁ so vivāho bhavissati.

[616] Ediso te 1 amittānaṁ vivāho hotu mādhura
yathā pañcālarājassa vedehena bhavissati.
Ānayitvāna vedehaṁ pañcālānaṁ rathesabho
tato naṁ ghātayissati nāssa sakhi bhavissati.