[547] Tassa puṭṭho viyākāsi mātali devasārathi
vipākaṁ pāpakammānaṁ jānaṁ akkhāsijānato.
1 Ma. phuṇanti. Yu. phunanti.
Yekeci pūgāya dhanassa 1 hetu
sakkhiṁ karitvā iṇaṁ jāpayanti
te jāpayitvā janataṁ janinda
te luddakammā pasavetva pāpaṁ
teme janā aṅgārakāsuṁ thunanti.

[548] Sañjotibhūtā jalitā padittā
padissati mahatī lohakumbhī
bhayaṁ hi maṁ vindati sūta disvā
pucchāmi taṁ mātali devasārathi
ime nu maccā kimakaṁsu pāpaṁ
yeme janā (avaṁsirā) lohakumbhiṁ patanti.

[549] Tassa puṭṭho viyākāsi mātali devasārathi
vipākaṁ pāpakammānaṁ jānaṁ akkhāsijānato.
Ye sīlavantaṁ samaṇaṁ brāhmaṇaṁ vā
hiṁsenti rosenti supāpadhammā
te luddakammā pasavetva pāpaṁ
teme janā (avaṁsirā) lohakumbhiṁ patanti.

[550] Luñcanti gīvaṁ atha veṭhayitvā
uṇhodakasmiṁ pakilodayitvā 2
bhayaṁ hi maṁ vindati sūta disvā
1 Sī. Yu. pūgāyatanassa. 2 Ma. pakilotayitvā. Sī. Yu. pakiledayitvā.
Pucchāmi taṁ mātali devasārathi
ime nu maccā kimakaṁsu pāpaṁ
yeme janā luttasirā sayanti.

[551] Tassa puṭṭho viyākāsi mātali devasārathi
vipākaṁ pāpakammānaṁ jānaṁ akkhāsijānato.
Ye jīvalokasmiṁ supāpadhammino
pakkhī gahetvāna viheṭhayanti
te heṭhayitvā sakuṇaṁ janinda
te luddakammā pasavetva pāpaṁ
teme janā luttasirā sayanti.

[552] Bahutatoyā anikhātakūlā 1
nadī ayaṁ sandati suppatitthā
ghammābhitattā manujā pivanti
pivatañca 2 tesaṁ thusa 3 hoti pāni
bhayaṁ hi maṁ vindati sūta disvā
pucchāmi taṁ mātali devasārathi
ime nu maccā kimakaṁsu pāpaṁ
pivatañca tesaṁ thusa hoti pāni.

[553] Tassa puṭṭho viyākāsi mātali devasārathi
1 Ma. anigādhakūlā. 2 Ma. pītañca. ito paraṁ īdisameva. 3 Ma. bhusa. ito paraṁ
īdisameva.
Vipākaṁ pāpakammānaṁ jānaṁ akkhāsijānato.
Ye suddhadhaññaṁ palāsena missaṁ
asuddhakammā kayino dadanti
ghammābhitattāna pipāsitānaṁ
pivatañca tesaṁ thusa hoti pāni.

[554] Usūhi sattīhi ca tomarehi
ubhayāni passāni tudanti kandataṁ
bhayaṁ hi maṁ vindati sūta disvā
pucchāmi taṁ mātali devasārathi
ime nu maccā kimakaṁsu pāpaṁ
yeme janā sattihatā sayanti.

[555] Tassa puṭṭho viyākāsi mātali devasārathi
vipākaṁ pāpakammānaṁ jānaṁ akkhāsijānato.
Ye jīvalokasmiṁ asādhukammino
adinnamādāya karonti jīvitaṁ
dhaññaṁ dhanaṁ rajataṁ jātarūpaṁ
ajeḷakañcāpi pasuṁ mahiṁsaṁ 1
te luddakammā pasavetva pāpaṁ
teme janā sattihatā sayanti.

[556] Gīvāya bandhā kissime puneke
1 Sī. Yu. mahīsaṁ.
Aññe vikantā 1 vilakatā sayanti 2
bhayaṁ hi maṁ vindati sūta disvā
pucchāmi taṁ mātali devasārathi
ime nu maccā kimakaṁsu pāpaṁ
yeme janā vilakatā sayanti.