[537] Kena taṁ paṭhamaṁ nemi rāja seṭṭha disampati
yena vā pāpakammantā puññakammā ca ye narā.

[538] Nirayaṁ 1 tāva passāmi āvāsaṁ 2 pāpakamminaṁ
ṭhānāni luddakammānaṁ dussīlānañca yā gati.

[539] Dassesi mātali rañño duggaṁ vetaraṇiṁ nadiṁ
kuṭṭhitaṁ khārasaṁyuttaṁ tattaṁ aggisikhūpamaṁ.

[540] Nemi have mātalimajjhabhāsi 3
disvā janaṁ patamānaṁ vidugge
bhayaṁ hi maṁ vindati sūta disvā
pucchāmi taṁ mātali devasārathi
ime nu maccā kimakaṁsu pāpaṁ
yeme janā vetaraṇiṁ patanti.
1 Ma. niraye. 2 Ma. āvāse. 3 Ma. ...ajjhabhāsatha.

[541] Tassa puṭṭho viyākāsi mātali devasārathi
vipākaṁ pāpakammānaṁ jānaṁ akkhāsijānato.
Ye dubbale balavanto jīvaloke
hiṁsenti rosenti 1 supāpadhammā
te luddakammā pasavetva pāpaṁ
teme janā vetaraṇiṁ patanti.

[542] Sāmā ca soṇā savalā ca gijjhā
kākolusaṅghā ca adenti 2 bheravā
bhayaṁ hi maṁ vindati sūta disvā
pucchāmi taṁ mātali devasārathi
ime nu maccā kimakaṁsu pāpaṁ
yeme jane kākolusaṅghā adenti.

[543] Tassa puṭṭho viyākāsi mātali devasārathi
vipākaṁ pāpakammānaṁ jānaṁ akkhāsijānato.
Yekecime maccharino kadariyā
paribhāsakā samaṇabrāhmaṇānaṁ
hiṁsenti rosenti supāpadhammā
te luddakammā pasavetva pāpaṁ
teme jane kākolusaṅghā adenti.

[544] Sañjotibhūtā paṭhaviṁ kamanti
1 Ma. hiṁsanti rosanti. ito paraṁ īdisameva. 2 Ma. kākolasaṅghā adanti.
ito paraṁ īdisameva.
Tattehi khandhehi ca pothayanti
bhayaṁ hi maṁ vindati sūta disvā
pucchāmi taṁ mātali devasārathi
ime nu maccā kimakaṁsu pāpaṁ
yeme janā khandhahatā sayanti.

[545] Tassa puṭṭho viyākāsi mātali devasārathi
vipākaṁ pāpakammānaṁ jānaṁ akkhāsijānato.
Ye jīvalokasmiṁ supāpadhammino
narañca nāriñca apāpadhammaṁ
hiṁsenti rosenti supāpadhammā
te luddakammā pasavetva pāpaṁ
teme janā khandhahatā sayanti.

[546] Aṅgārakāsuṁ apare thunanti 1
narā rudantā paridaḍḍhagattā
bhayaṁ hi maṁ vindati sūta disvā
pucchāmi taṁ mātali devasārathi
ime nu maccā kimakaṁsu pāpaṁ
yeme janā aṅgārakāsuṁ thunanti 1 .