[527] Dudīpo sāgaro selo mucalindo bhagīraso 1
usinnaro atthako ca assako ca puthuddhano.
Ete caññe ca rājāno khattiyāya brāhmaṇā bahū
puthuyaññaṁ yajitvāna petattaṁ nātivattiṁsu 2 .

[528] Ye adutiyā na ramanti ekikā
vivekajaṁ ye na labhanti pītiṁ
kiñcāpi te indasamānabhogā
te ve parādhīnasukhā varākā.

[529] Addhāyime 3 ativattiṁsu anāgārā tapassino
sattisayo yāmahanu somayāgo manojavo.
Samuddo māgho bharato 4 isi kālapurakkhito
aṅgīraso kassapo ca kīsavaccho akanti ca.

[530] Uttarena nadī sīdā gambhīrā duratikkamā
naḷaggivaṇṇā jotanti sadā kañcanapabbatā.
Paruḷhagacchā taggarā paruḷhagacchā vanā nagā
tatrāsuṁ dasasahassā porāṇā isayo pure.
1 bhagīrathoti maññe. 2 Ma. nātivattisuṁ. 3 Ma. atha yime. 4 Ma. bharato ca.
Ahaṁ seṭṭhosmi dānena saññamena damena ca
anuttaraṁ vataṁ katvā pakīracārī samāhite.
Jātimantaṁ ajaccañca ahamujugataṁ naraṁ
ativelaṁ namassissaṁ kammabandhū hi māṇavā.
Sabbe vaṇṇā adhammaṭṭhā patanti nirayaṁ adho
sabbe vaṇṇā visujjhanti caritvā dhammamuttamaṁ.

[531] Idaṁ vatvāna māghavā devarājā sujampati
vedehamanusāsitvā saggakāyaṁ apakkami.

[532] Imaṁ bhonto nisāmetha yāvantettha samāgatā
dhammikānaṁ manussānaṁ vaṇṇaṁ uccāvacaṁ bahuṁ.
Yathā ayaṁ nimirājā paṇḍito kusalatthiko
rājā sabbavidehānaṁ adā dānaṁ arindamo.
Tassa taṁ dadato dānaṁ saṅkappo upapajjatha
dānaṁ vā brahmacariyaṁ vā katamaṁ su mahapphalaṁ.

[533] Abbhūto vata lokasmiṁ uppajji somahaṁsano
dibbo ratho pāturahu vedehassa yasassino.

[534] Devaputto mahiddhiko mātali devasārathi
nimantayittha rājānaṁ vedehaṁ mithilaggahaṁ.
Ehimaṁ rathamāruyha rāja seṭṭha disampati
devā dassanakāmā te tāvatiṁsā saindakā
Saramānā hi te devā sudhammāyaṁ samacchare.

[535] Tato rājā taramāno vedeho mithilaggaho
āsanā vuṭṭhahitvāna pamukho rathamāruhi.
Abhiruḷhaṁ rathaṁ dibbaṁ mātali etadabravi
kena taṁ nemi maggena rāja seṭṭha disampati
yena vā pāpakammantā puññakammā ca ye narā.

[536] Ubhayeneva maṁ nehi mātali devasārathi
yena vā pāpakammantā puññakammā ca ye narā.