[507] Mā bāḷhaṁ paridevetha hato sāmoti vādinā
ahaṁ kammakaro hutvā bharissāmi brahāvane.
Issatthe casmi kusalo daḷhadhammoti vissuto
ahaṁ kammakaro hutvā bharissāmi brahāvane.
Migānaṁ vighāsamanvesaṁ vanamūlaphalāni ca
ahaṁ kammakaro hutvā bharissāmi brahāvane.

[508] Nesa dhammo mahārāja netaṁ amhesu kappati
rājā tvamasi amhākaṁ pāde vandāma te mayaṁ.

[509] Dhammaṁ nesāda bhaṇatha katā apacitī tayā
pitā tvamasi amhākaṁ mātā tvamasi pārike.

[510] Namo te kāsirājatthu namo te kāsivaḍḍhana
añjalinte paggaṇhāma yāva sāmānupāpaya.
Tassa pāde samajjantā 1 mukhañca bhujadassanaṁ
saṁsumbhamānā attānaṁ kālamāgamayāmase.

[511] Brahā vāḷamigākiṇṇaṁ ākāsantaṁva dissati
yattha sāmo hato seti candova patito chamā.
1 si. Yu. pavaṭṭantā.
Brahā vāḷamigākiṇṇaṁ ākāsantaṁva dissati
yattha sāmo hato seti suriyova patito chamā.
Brahā vāḷamigākiṇṇaṁ ākāsantaṁva dissati
yattha sāmo hato seti paṁsunā parikuṇṭhito 1 .
Brahā vāḷamigākiṇṇaṁ ākāsantaṁva dissati
yattha sāmo hato seti idheva vasathassame.

[512] Yadi tattha sahassāni satāni nahutāni 2 ca
nevamhākaṁ bhayaṁ koci vane vāḷesu vijjati.

[513] Tato andhānamādāya kāsirājā brahāvane
hatthe gahetvā pakkāmi yattha sāmo hato ahu.

[514] Disvāna patitaṁ sāmaṁ puttakaṁ paṁsukuṇṭhitaṁ
apaviddhaṁ brahāraññe candaṁva patitaṁ chamā.
Disvāna patitaṁ sāmaṁ puttakaṁ paṁsukuṇṭhitaṁ
apaviddhaṁ brahāraññe suriyaṁva patitaṁ chamā.
Disvāna patitaṁ sāmaṁ puttakaṁ paṁsukuṇṭhitaṁ
apaviddhaṁ brahāraññe kalūnaṁ paridevayuṁ.
Disvāna patitaṁ sāmaṁ puttakaṁ paṁsukuṇṭhitaṁ
bāhā paggayha pakkanduṁ adhammo kira bho iti.
Bāḷhaṁ kho tvaṁ pamattosi sāma kalyāṇadassana
yo ajjevaṅgate kāle na kiñcimabhibhāsasi.
1 Ma. patikunthito. 2 Ma. niyutāni.
Bāḷhaṁ kho tvaṁ padittosi sāma kalyāṇadassana
yo ajjevaṅgate kāle na kiñcimabhibhāsasi
bāḷhaṁ kho tvaṁ pakuddhosi sāma kalyāṇadassana
yo ajjevaṅgate kāle na kiñcimabhibhāsasi.
Bāḷhaṁ kho tvaṁ pasuttosi sāma kalyāṇadassana
yo ajjevaṅgate kāle na kiñcimabhibhāsasi.
Bāḷhaṁ kho tvaṁ vimanosi sāma kalyāṇadassana
yo ajjevaṅgate kāle na kiñcimabhibhāsasi.
Jaṭaṁ valinaṁ paṁsugataṁ kodāni saṇṭhapessati 1
sāmo ayaṁ kālakato andhānaṁ paricāriko.
Ko no 2 sammajjanādāya sammajjissati assamaṁ
sāmo ayaṁ kālakato andhānaṁ paricāriko.
Kodāni nhāpayissati sītenuṇhodakena ca
sāmo ayaṁ kālakato andhānaṁ paricāriko.
Kodāni bhojayissati vanamūlaphalāni ca
sāmo ayaṁ kālakato andhānaṁ paricāriko.

[515] Disvāna patitaṁ sāmaṁ puttakaṁ paṁsukuṇṭhitaṁ
aṭṭitā puttasokena mātā saccaṁ abhāsatha.
Yena saccenayaṁ sāmo dhammacārī pure ahu
etena saccavajjena visaṁ sāmassa haññatu.
1 Ma. santapessati. 2 Ma. me.
Yena saccenayaṁ sāmo brahmacārī pure ahu
etena saccavajjena visaṁ sāmassa haññatu.
Yena saccenayaṁ sāmo saccavādī pure ahu
etena saccavajjena visaṁ sāmassa haññatu.
Yena saccenayaṁ sāmo mātāpetibharo ahu
etena saccavajjena visaṁ sāmassa haññatu.
Yena saccenayaṁ sāmo kule jeṭṭhāpacāyiko
etena saccavajjena visaṁ sāmassa haññatu.
Yena saccenayaṁ sāmo pāṇā piyataro mama
etena saccavajjena visaṁ sāmassa haññatu.
Yaṅkiñcitthi kataṁ puññaṁ mayhañceva pitucca te
sabbena tena kusalena visaṁ sāmassa haññatu.

[516] Disvāna patitaṁ sāmaṁ puttakaṁ paṁsukuṇṭhitaṁ
aṭṭito puttasokena pitā saccaṁ abhāsatha.
Yena saccenayaṁ sāmo dhammacārī pure ahu
etena saccavajjena visaṁ sāmassa haññatu.
Yena saccenayaṁ sāmo brahmacārī pure ahu
etena saccavajjena visaṁ sāmassa haññatu.
Yena saccenayaṁ sāmo saccavādī pure ahu
etena saccavajjena visaṁ sāmassa haññatu.
Yena saccenayaṁ sāmo mātāpetibharo ahu
etena saccavajjena visaṁ sāmassa haññatu.
Yena saccenayaṁ sāmo kule jeṭṭhāpacāyiko
etena saccavajjena visaṁ sāmassa haññatu.
Yena saccenayaṁ sāmo pāṇā piyataro mama
etena saccavajjena visaṁ sāmassa haññatu.
Yaṅkiñcitthi kataṁ puññaṁ mayhañceva mātucca te
sabbena tena kusalena visaṁ sāmassa haññatu.