[497] Kassa nu eso padasaddo manussasseva āgato
neso sāmassa nigghoso ko nu tvamasi mārisa.
Santaṁ hi sāmo vajati santaṁ pādāni neyati
neso sāmassa nigghoso ko nu tvamasi mārisa.

[498] Rājāhamasmi kāsīnaṁ pilayakkhoti maṁ vidū
lobhā raṭṭhaṁ pahitvāna migamesaṁ carāmahaṁ.
Issatthe casmi kusalo daḷhadhammoti vissuto
nāgopi me na muñceyya āgato usupātanaṁ.

[499] Svāgatante mahārāja atho te adurāgataṁ
issarosi anuppatto yaṁ idhatthi pavedaya.
Tiṇḍukāni piyālāni madhuke kāsamāriyo
1 Ma. tayā.
Phalāni khuddakappāni bhuñja rāja varaṁ varaṁ.
Idampi pānīyaṁ sītaṁ ābhataṁ girigabbharā
ito 1 piva mahārāja sace tvaṁ abhikaṅkhasi.

[500] Nālaṁ andhā vane daṭṭhuṁ ko nu vo phalamāhari
anandhassevāyaṁ sammā nivāpo mayha khāyati.

[501] Daharo yuvā nātibrahā sāmo kalyāṇadassano
dīghassa kesā asitā atho sunaggavellitā.
So have phalamāharitvā ito ādāya kamaṇḍaluṁ
nadiṁ gato udahāro maññe na dūramāgato.

[502] Ahantaṁ avadhiṁ sāmaṁ yo tuyhaṁ paricārako
yaṁ kumāraṁ pavedetha sāmaṁ kalyāṇadassanaṁ.
Dīghassa kesā asitā atho sunaggavellitā
tesu lohitalittesu seti sāmo mayā hato.

[503] Kena dukūla mantesi hato sāmoti vādinā
hato sāmoti sutvāna hadayaṁ me pavedhati.
Assatthasseva taruṇaṁ pavālaṁ māluteritaṁ
hato sāmoti sutvāna hadayaṁ me pavedhati.

[504] Pārike kāsirājāyaṁ so sāmaṁ migasammate
kodhasā usunā vijjhi tassa mā pāpamicchimhā.

[505] Kicchā laddho piyo putto yo andhe abharī vane
1 Ma. tato.
Tamekaputtaghātimhi kathaṁ cittaṁ na kopaye.

[506] Kicchā laddho piyo putto yo andhe abharī vane
tamekaputtaghātimhi akkodhaṁ āhu paṇḍitā.