[567] Tassa puṭṭho viyākāsi mātali devasārathi
vipākaṁ pāpakammānaṁ jānaṁ akkhāsijānato.
Ye jīvalokasmiṁ asādhukammino
parassa dārāni atikkamanti
te tādisā uttamabhaṇḍathenā
teme janā (avaṁsirā) narake pātayanti.
Te vassapūgāni bahūni tattha
nirayesu dukkhaṁ vedanaṁ vedayanti
na hi pāpakārissa bhavanti tāṇā
sakehi kammehi purakkhitassa
te luddakammā pasavetva pāpaṁ
teme janā (avaṁsirā) narake pātayanti.

[568] Uccāvacāme vividhā upakkamā
nirayesu dissanti sughorarūpā
bhayaṁ hi maṁ vindati sūta disvā
pucchāmi taṁ mātali devasārathi
ime nu maccā kimakaṁsu pāpaṁ
yeme janā adhimattā dukkhā tippā 1
1 Ma. tibbā. ito paraṁ īdisameva.
Kharā kaṭukā vedanā vedayanti.

[569] Tassa puṭṭho viyākāsi mātali devasārathi
vipākaṁ pāpakammānaṁ jānaṁ akkhāsijānato.
Ye jīvalokasmiṁ supāpadiṭṭhino
vissāsakammāni karonti mohā
parañca diṭṭhīsu samādapenti
te pāpadiṭṭhī 1 pasavetva pāpaṁ
teme janā adhimattā dukkhā tippā
kharā kaṭukā vedanā vedayanti.

[570] Viditāni te mahārāja āvāsaṁ pāpakamminaṁ
ṭhānāni luddakammānaṁ dussīlānañca yā gati
uyyāhidāni rājisi devarājassa santike.

[571] Pañcathūpaṁ dissatidaṁ vimānaṁ
mālāpilandhā sayanassa majjhe
tatthacchatī nāri mahānubhāvā
uccāvacaṁ iddhi vikubbamānā
vittī hi maṁ vindati sūta disvā
pucchāmi taṁ mātali devasārathi
ayaṁ nu nārī kimakāsi sādhuṁ
yā modatī saggappattā vimāne.
1 Yu. pāpadiṭṭhīsu.

[572] Tassa puṭṭho viyākāsi mātali devasārathi
vipākaṁ puññakammānaṁ jānaṁ akkhāsijānato.
Yadi te sutā biraṇī 1 jīvaloke
āmāyadāsī ahu brāhmaṇassa
sā pattakālaṁ 2 atithiṁ viditvā
mātāva puttaṁ sakimābhinandī
saññamā saṁvibhāgā ca sā vimānasmi modati.

[573] Daddallamānā ābhanti 3 vimānā satta nimmitā
tattha yakkho mahiddhiko sabbābharaṇabhūsito
samantā anupariyāyati nārīgaṇapurakkhito.
Vittī hi maṁ vindati sūta disvā
pucchāmi taṁ mātali devasārathi
ayaṁ nu macco kimakāsi sādhuṁ
yo modati saggappatto vimāne.

[574] Tassa puṭṭho viyākāsi mātali devasārathi
vipākaṁ puññakammānaṁ jānaṁ akkhāsijānato.
Soṇadinno gahapati esa dānapatī ahu
esa pabbajituddissa vihāre satta kārayi.
Sakkaccante upaṭṭhāsi bhikkhavo tattha vāsike
acchādanañca bhattañca senāsanaṁ padīpayaṁ
1 varuṇītipi. 2 Ma. pattakāle. 3 Ma. ābhenti.
Adāsi ujubhūtesu vippasannena cetasā.
Cātuddasiṁ pañcadasiṁ yā ca pakkhassa aṭṭhamī
pāṭihāriyapakkhañca aṭṭhaṅgasusamāhitaṁ
uposathaṁ upavasi sadā sīlesu saṁvuto
saññamo saṁvibhāgo ca so vimānasmi modati.

[575] Pabhāsatimidaṁ byamhaṁ phalikāsu sunimmitaṁ
nārīvaragaṇākiṇṇaṁ kūṭāgāravirocitaṁ
upetaṁ annapānehi naccagītehi cūbhayaṁ.
Vittī hi maṁ vindati sūta disvā
pucchāmi taṁ mātali devasārathi
imā nu nārī 1 kimakaṁsu sādhuṁ
yā 2 modare saggappattā vimāne.

[576] Tassa puṭṭho viyākāsi mātali devasārathi
vipākaṁ puññakammānaṁ jānaṁ akkhāsijānato.
Yākāci nārī idha jīvaloke
sīlavantiyo upāsikā
dāne ratā niccapasannacittā
sacce ṭhitā uposathe appamattā
saññamā saṁvibhāgā ca tā vimānasmi modare.