[577] Pabhāsatimidaṁ byamhaṁ veḷuriyāsu nimmitaṁ
1 Ma. ime nu maccā. 2 Ma. ye.
Upetaṁ bhūmibhāgehi vibhattaṁ bhāgaso mitaṁ.
Ālambarā mudiṅgā ca naccagītā suvāditā
dibbā saddā niccharanti savanīyā manoramā.
Nāhaṁ evaṁ gataṁ jātu evaṁ suruciraṁ pure
saddaṁ samabhijānāmi diṭṭhaṁ vā yadiyā sutaṁ.
Vittī hi maṁ vindati sūta disvā
pucchāmi taṁ mātali devasārathi
ime nu maccā kimakaṁsu sādhuṁ
ye modare saggappattā vimāne.

[578] Tassa puṭṭho viyākāsi mātali devasārathi
vipākaṁ puññakammānaṁ jānaṁ akkhāsijānato.
Yekeci maccā idha jīvaloke sīlavantā 1 upāsakā
ārāme udapāne ca papā saṅkamanāni ca
arahante sītibhūte sakkaccaṁ paṭipādayuṁ
cīvaraṁ piṇḍapātañca paccayaṁ sayanāsanaṁ
adaṁsu ujubhūtesu vippasannena cetasā.
Cātuddasiṁ pañcadasiṁ yā ca pakkhassa aṭṭhamī
pāṭihāriyapakkhañca aṭṭhaṅgasusamāhitaṁ
uposathaṁ upavasuṁ sadā sīlesu saṁvutā
saññamā saṁvibhāgā ca te vimānasmi modare.
1 Sī. Yu. sīlavanto.

[579] Pabhāsatimidaṁ byamhaṁ phalikāsu sunimmitaṁ
nārīvaragaṇākiṇṇaṁ kūṭāgāravirocitaṁ
upetaṁ annapānehi naccagītehi cūbhayaṁ
najjo anupariyāyati 1 nānāpupphadumāyutā.
Vittī hi maṁ vindati sūta disvā
pucchāmi taṁ mātali devasārathi
ayaṁ nu macco kimakāsi sādhuṁ
yo modati saggappatto vimāne.

[580] Tassa puṭṭho viyākāsi mātali devasārathi
vipākaṁ puññakammānaṁ jānaṁ akkhāsijānato.
Mithilāyaṁ gahapati esa dānapatī ahu
ārāme udapāne ca papā saṅkamanāni ca
arahante sītibhūte sakkaccaṁ paṭipādayi
cīvaraṁ piṇḍapātañca paccayaṁ sayanāsanaṁ
adāsi ujubhūtesu vippasannena cetasā.
Cātuddasiṁ pañcadasiṁ yā ca pakkhassa aṭṭhamī
pāṭihāriyapakkhañca aṭṭhaṅgasusamāhitaṁ
uposathaṁ upavasi sadā sīlesu saṁvuto
saññamo saṁvibhāgo ca so vimānasmi modati.

[581] Pabhāsatimidaṁ byamhaṁ phalikāsu sunimmitaṁ 2
1 Ma. cānupariyāti. 2 Yu. veḷuriyāsu nimmitaṁ.
Nārīvaragaṇākiṇṇaṁ kūṭāgāravirocitaṁ
upetaṁ annapānehi naccagītehi cūbhayaṁ
najjo anupariyāyati 1 nānāpupphadumāyutā
rājāyatanā kapiṭṭhā ca ambā sālā ca jambuyo
tiṇḍukā ca piyālā ca dumā niccaphalā bahū.
Vittī hi maṁ vindati sūta disvā
pucchāmi taṁ mātali devasārathi
ayaṁ nu macco kimakāsi sādhuṁ
yo modati saggappatto vimāne.

[582] Tassa puṭṭho viyākāsi mātali devasārathi
vipākaṁ puññakammānaṁ jānaṁ akkhāsijānato.
Mithilāyaṁ gahapati esa dānapatī ahu
ārāme udapāne ca papā saṅkamanāni ca
arahante sītibhūte sakkaccaṁ paṭipādayi
cīvaraṁ piṇḍapātañca paccayaṁ sayanāsanaṁ
adāsi ujubhūtesu vippasannena cetasā.
Cātuddasiṁ pañcadasiṁ yā ca pakkhassa aṭṭhamī
pāṭihāriyapakkhañca aṭṭhaṅgasusamāhitaṁ
uposathaṁ upavasi sadā sīlesu saṁvuto
saññamo saṁvibhāgo ca so vimānasmi modati.
1 Ma. cānupariyāti.

[583] Pabhāsatimidaṁ byamhaṁ veḷuriyāsu nimmitaṁ
upetaṁ bhūmibhāgehi vibhattaṁ bhāgaso mitaṁ
ālambarā mudiṅgā ca naccagītā suvāditā
dibbā saddā niccharanti savanīyā manoramā
nāhaṁ evaṁ gataṁ jātu evaṁ suruciraṁ pure
saddaṁ samabhijānāmi diṭṭhaṁ vā yadivā sutaṁ.
Vittī hi maṁ vindati sūta disvā
pucchāmi taṁ mātali devasārathi
ayaṁ nu macco kimakāsi sādhuṁ
yo modati saggappatto vimāne.

[584] Tassa puṭṭho viyākāsi mātali devasārathi
vipākaṁ puññakammānaṁ jānaṁ akkhāsijānato.
Bārāṇasiyaṁ gahapati esa dānapatī ahu
ārāme udapāne ca papā saṅkamanāni ca
arahante sītibhūte sakkaccaṁ paṭipādayi
cīvaraṁ piṇḍapātañca paccayaṁ sayanāsanaṁ
adāsi ujubhūtesu vippasannena cetasā.
Cātuddasiṁ pañcadasiṁ yā ca pakkhassa aṭṭhamī
pāṭihāriyapakkhañca aṭṭhaṅgasusamāhitaṁ
uposathaṁ upavasi sadā sīlesu saṁvuto
Saññamo saṁvibhāgo ca so vimānasmi modati.

[585] Yathā udayamādicco hoti lohitako mahā
tathūpamaṁ idaṁ byamhaṁ jātarūpassa nimmitaṁ.
Vittī hi maṁ vindati sūta disvā
pucchāmi taṁ mātali devasārathi
ayaṁ nu macco kimakāsi sādhuṁ
yo modati saggappatto vimāne.

[586] Tassa puṭṭho viyākāsi mātali devasārathi
vipākaṁ puññakammānaṁ jānaṁ akkhāsijānato.
Sāvatthiyaṁ gahapati esa dānapatī ahu
ārāme udapāne ca papā saṅkamanāni ca
arahante sītibhūte sakkaccaṁ paṭipādayi
cīvaraṁ piṇḍapātañca paccayaṁ sayanāsanaṁ
adāsi ujubhūtesu vippasannena cetasā.
Cātuddasiṁ pañcadasiṁ yā ca pakkhassa aṭṭhamī
pāṭihāriyapakkhañca aṭṭhaṅgasusamāhitaṁ
uposathaṁ upavasi sadā sīlesu saṁvuto
saññamo saṁvibhāgo ca so vimānasmi modati.