[407] Evaṁ vaggukatho santo vissaṭṭhavacano ca so 1
kasmā pitu ca mātu ca santike na bhaṇī tadā.

[408] Nāhaṁ asandhitā pakkho na badhiro asotatā
nāhaṁ ajivhatā mūgo mā maṁ mūgamadhārayi.
Purimaṁ sarāmahaṁ jātiṁ yattha rajjamakārayiṁ
kārayitvā tahiṁ rajjaṁ pāpatthaṁ nirayaṁ bhusaṁ.
Vīsatiñceva vassāni tahiṁ rajjamakārayiṁ
asītivassasahassāni nirayamhi apaccasiṁ 2 .
Tassa rajjassahaṁ bhīto mā maṁ rajjebhisecayuṁ
tasmā pitu ca mātu ca santike na bhaṇiṁ tadā.
Uccaṅke maṁ nisīdetvā pitā atthānusāsati
ekaṁ hanatha bandhatha ekaṁ kharāpaticchakaṁ.
Ekaṁ sūlasmi ubbetha iccassa anusāsati
1 Ma. casi. 2 Ma. apaccisaṁ. Yu. apaccayiṁ.
Tāyāhaṁ pharusaṁ sutvā vācāyo samudīritā.
Amūgo mūgavaṇṇena apakkho pakkhasammato
sake muttakarīsasmiṁ acchāhaṁ saṁparipluto.
Kasirañca parittañca tañca dukkhena saṁyutaṁ
komaṁ jīvitamāgamma veraṁ kayirātha kenaci.
Paññāya ca alābhena dhammassa ca adassanā
komaṁ jīvitamāgamma veraṁ kayirātha kenaci.
Api ataramānānaṁ phalāsāva samijjhati
vipakkabrahmacariyosmi evaṁ jānāhi sārathi.
Api ataramānānaṁ sammadattho vipaccati
vipakkabrahmacariyosmi nikkhanto akutobhayo.

[409] Ahampi pabbajissāmi rājaputta tavantike
avhayassu maṁ bhaddante pabbajjā mama ruccati.

[410] Rathaṁ niyyādayitvāna anaṇo ehi sārathi
anaṇassa hi pabbajjā etaṁ isībhi vaṇṇitaṁ.

[411] Yadeva tyāhaṁ vacanaṁ akaraṁ bhaddamatthu te
tadeva me tvaṁ vacanaṁ yācito kattumarahasi.
Idheva tāva acchassu yāva rājānamānaye
appeva te pitā disvā patīto sumano siyā.

[412] Karomi te taṁ vacanaṁ yaṁ maṁ bhaṇasi sārathi
Ahampi daṭṭhukāmosmi pitaraṁ me idhāgataṁ.
Ehi samma nivattassu kusalaṁ vajjāsi ñātinaṁ
mātaraṁ pitaraṁ mayhaṁ vutto vajjāsi vandanaṁ.

[413] Tassa pāde gahetvāna katvā ca naṁ padakkhiṇaṁ
sārathi rathamāruyha rājadvāraṁ upāgami.

[414] Suññaṁ mātā rathaṁ disvā ekaṁ sārathimāgataṁ
assupuṇṇehi nettehi rodantī naṁ udikkhati
ayaṁ so sārathi eti nihantvā mama atrajaṁ.
Nihato nūna me putto paṭhabyā bhūmivaḍḍhano
amittā nūna nandanti patītā nūna verino
āgataṁ sārathiṁ disvā nihantvā mama atrajaṁ.
Suññaṁ mātā rathaṁ disvā ekaṁ sārathimāgataṁ
assupuṇṇehi nettehi rodantī naṁ paripucchati 1 .
Kinnu mūgo kinnu pakkho kinnu so vilapī tadā
nihaññamāno bhūmiyā taṁ me akkhāhi sārathi.
Kathaṁ hatthehi pādehi mūgo pakkho vivajjayi
nihaññamāno bhūmiyā taṁ me akkhāhi pucchito.

[415] Akkheyyante ahaṁ ayye dajjāsi abhayaṁ mama
yaṁ me sutaṁ vā diṭṭhaṁ vā rājaputtassa santike.

[416] Abhayaṁ samma te dammi abhīto bhaṇa sārathi
1 Ma. rodantī paripucchi naṁ.
Yante sutaṁ vā diṭṭhaṁ vā rājaputtassa santike.