[387] Kammāsapādena viheṭhitattha
talāvutā assumukhā rudantā
na jātu dubbhetha imassa rañño
saccappaṭiññaṁ me paṭisuṇātha.

[388] Kammāsapādena viheṭhitamhā
talāvutā assumukhā rudantā
na jātu dubbhema imassa rañño
Saccappaṭiññaṁ te paṭisuṇoma.

[389] Yathā pitā vā athavāpi mātā
anukampakā atthakāmā pajānaṁ
evampi 1 vo hotu ayañca rājā
tumhe ca vo hotha yatheva puttā.

[390] Yathā pitā vā athavāpi mātā
anukampakā atthakāmā pajānaṁ
evampi 1 no hotu ayañca rājā
mayampi hessāma yatheva puttā.

[391] Catuppadaṁ sakuṇañcāpi maṁsaṁ
sūdehi randhaṁ sukataṁ suniṭṭhitaṁ
sudhaṁva indo paribhuñjiyāno
hitvā katheko ramasī araññe.
Tā khattiyā vellivilākamajjhā
alaṅkatā samparivārayitvā
indaṁva devesu pamodayiṁsu
hitvā katheko ramasī araññe.
Tambūpadhāne bahugoṇakamhi
subhamhi 2 sabbassayanamhilaṅkate
sayanassa 3 majjhamhi sukhaṁ sayitvā
1 Ma. evameva. 2 Sī. Yu. sucimhi. 3 Ma. seyyassa.
Hitvā katheko ramasī araññe.
Pāṇissaraṁ kumbhathūnaṁ nisīde 1
athopi ve nippurisaṁpi tūriyaṁ
bahuṁ sugītañca suvāditañca
hitvā katheko ramasī araññe.
Uyyāna sampannapahūtamālyaṁ
migājinūpetapuraṁ 2 surammaṁ
hayehi nāgehi rathehupetaṁ
hitvā katheko ramasī araññe.

[392] Kāḷapakkhe yathā cando hāyateva suve suve
kāḷapakkhūpamo rāja asataṁ hoti samāgamo.
Yathāhaṁ rasakamāgamma sūdaṁ kāpurisādhamaṁ 3
akāsiṁ pāpakaṁ dhammaṁ yena gacchāmi duggatiṁ.
Sukkapakkhe yathā cando vaḍḍhateva suve suve
sukkapakkhūpamo rāja sataṁ hoti samāgamo.
Yathāhaṁ tuvamāgamma sutasoma vijānahi
kāhāmi kusalaṁ kammaṁ yena gacchāmi suggatiṁ.
Thale yathā vāri janinda vuṭṭhaṁ
anaddhaneyyaṁ na ciraṭṭhitīkaṁ
1 nissivetipi. 2 Sī. Yu. migācirūpetapūraṁ. 3 Sī. Yu. sūdakaṁ purisādhamaṁ.
Evaṁ me hoti asataṁ samāgamo
anaddhaneyyo udakaṁ thaleva.
Sare yathā vāri janinda vuṭṭhaṁ
ciraṭṭhitīkaṁ naravīraseṭṭha
evaṁpi me 1 hoti sataṁ samāgamo
ciraṭṭhitīko udakaṁ sareva.
Abyāyiko hoti sataṁ samāgamo
yāvampi tiṭṭheyya tatheva hoti
khippaṁ hi veti asataṁ samāgamo
tasmā sataṁ dhammo asabbhi ārakā.

[393] Na so rājā yo ajeyyaṁ jināti
na so sakhā yo sakhāraṁ jināti
na sā bhariyā yā patino na vibheti
na te puttā ye na bharanti jiṇṇaṁ.
Na sā sabhā yattha na santi santo
na te santo ye na bhaṇanti dhammaṁ
rāgañca dosañca pahāya mohaṁ
dhammaṁ bhaṇantāva bhavanti santo.
Nābhāsamānaṁ jānanti missaṁ bālehi paṇḍitaṁ
bhāsamānañca jānanti desentaṁ amataṁpadaṁ.
1 Ma. ve.
Bhāsaye jotaye dhammaṁ paggaṇhe isinaṁ dhajaṁ
subhāsitaddhajā isayo dhammo hi isinaṁ dhajoti
sutasomajātakaṁ pañcamaṁ.
--------
Tassuddānaṁ.
Sumukho pana haṁsavaro ca mahā
sudhabhojaniko ca paro pavaro
sakuṇāladijādhipativhayano
sutasomavaruttamasavhayano.
Asītinipātaṁ niṭṭhitaṁ.
----------
Mahānipātaṁ
1 temiyajātakaṁ 1

[394] Mā paṇḍiccayaṁ 2 vibhāvaya bālamato bhava sabbapāṇinaṁ
sabbo tañjano ocināyatu evaṁ tava attho bhavissati.

[395] Karomi te taṁ vacanaṁ yaṁ maṁ bhaṇasi devate
atthakāmāsi me amma hitakāmāsi devate.

[396] Kinnu santaramānova kāsuṁ khaṇasi sārathi
puṭṭho me samma akkhāhi kiṁ kāsuyā karissasi.